كيف الرجوع الي المصنع؟؟

اهلي وعشيرتي ...بينما كنت اتجول في منتدي من منتديات حلفا لفت انتباهي نفرا من الناس مسافرين عبر الأثير الي حلفا فحملت امتعتي ورافقتهم الي أن وصلنا المصنع وكانت المفاجئه عندما وصلت المصنع وساعتها ادركت أني لم ارافقهم الا احساسي الذي راودني بأنهم منا ومن تلك الديار التي جمعتنا كاسرة واحده وغرست فينا حب الجميع وتتبع اخبارهم اينما كانو فوددت ان تكونو معي في الرحلة .............
تعالو جميعا لتعرفو من هم
التحيه لى ناس حلفا من مواصلاتنا فى السوق الشعبى مرورا بى محطات اهلنا فى الشرق .. من حنتوب وتبدا تباشير الشرق .. الخيارى.. الفاو.. القدمبليه.. المشاريع الزراعية ثم قضارف الخير .. وجبال الشرق العريقه ولهجاتنا الحنينه .. والقطاطى مكسوه بحله خضراء من نبات الليف الجميل المتسلق بلون زهرته البنفسجيه والبيضاء والصفراء .. وحيشان الصريف مرورا بالشوك وخيراتها الكثيره خاصة اسماكها الدسمه وفاكهة البطيخ الحلوه لحد الارواء .. ونعرج عبر الترع والاراضى الخصبه متوجهين لى حلفا ..عبر اشرنكيل.. والقهاوى ولهجات اهلنا الهدندوه والجبنه المحكره فى طبلية الخشب .. جبنه الحديد الصغيره بحجم فنجال او اثنين فقط .. وما احلاها من قهوه ..وما احلا كلام وطيبة اهلنا فى الشرق .. وتبدا رحلتنا عبر الطريق الممتد من خشم القربه الزلط الى ..مدينة حلفا .. وما اجملها معناة فى هذا الطريق عبر بصات النيسان .. فى فترة الخريف .. شاقين قرى اهلنا الطيبين فى طقس جميل ونسيم عليل .. وسط الحواشات .. وقطيع الابقار والاغنام ..انها حقا بلدا غنية بخيراتها وطقسها المتميز دون مناطق بلدنا الحبيب .. فى فصل الخريف تكاد تجزم انك سوف تلامس هذه السحب الداكنه بيدك ..من كثافتها وبرودتها التى تحسها وتستمتع بها ..
وفى المدينه العريقه الجميله المتميزه بمبانيها المتشابهه من مساكن الموظفين وغيرها .. تاتى الى مسامعك تحايا اهلنا فى حلفا بمختلف اللهجات واللغات ..لكن المعنى واحد .. الطيبه الكرم الجود الاصاله ..
دعنا نفارق المدينة وندخل خط المصنع (القصب ،،، الترلات ،،، الكاتاكو ،،، المولاص ،،، السكر ،،، خمسين بيت ، عشرة بيوت ، عشرين بيت ، المصنع ، الورش الزراعية ، الإدارة ، ميز المهندسين ميز الموظفين ،، ميز الفنيين ،، البركس ،،، (معليش لا أريد أن أنسى الترعة العفنة) ولا حريق القصب في الموسم
ثم تبدا رحلتنا الى المصنع .. الذى يبعد ثلث الساعة من حلفا المدينة ..قاطعين الترع والحواشات .. وتتميز عربات المنطقه بى اللاندروفر نسبة لطبيعه الارض الخصبه الطينيه ..التى يصعب السير باى سيارات اخرى فى فصل الخريف .. وفى الطريق نرى الكثير من سيارات وشاحنات النقل وترلات المصنع .. ومع نسيم الطين ياتى لنا المصنع بتباشير ريحة القصب والمولاص .. هل تعرفون المولاص ؟؟ .. . ومن البعد يلوح لنا مبنى المصنع العريق والسوق والبركس ..ثم عشرين بيت والسنير.. ويبدا سلام اهلنا اشتقت حقيقة لها كلها ..اشتقت لى الصلابيه المخلالات الفطائر المش حتى اكل حلفا له طعم ونكهه خاصة مثلما اهلها لهم طعم ونكهه خاصةاشتقت لى اى شارع ومنطقة فيها واشتقت واشتقت واشتقت ووووووووووووووو
ومشيت المصنع ..وفتحت جرح عميــــــــــــــــــــق ما بندفن .. مشيت معاك لفه ..لفه وشارع شارع ..لحدى ما وصلنا عشرين بيت .. وفى نهاية الصف الاول ..شفت الامية بتاعة الكهرباء .. وشفت بيت الناظر .. ناظر المدرسة .. ........ البيت ده كان بيتنا يا ولياب .. والناظر ده كان ابوى .. هل معقول انا تانى اقدر امشى حلفا ؟؟؟ وامشى المصنع ؟؟؟؟؟ الكل حا يلاقينى بالنحيب ..لو كان فى زول من الايام ديك .. المدرسة معلق فيها النعى لغاية تاريخ اليوم .. ليه ؟ لانه الناظر مات ......... الناظر مات فجأة .. وجات حلفا باكية حزينه .. بى ناسها وطيبتها .. حتى بيوتها بكت الناظر . بكاه الشجر . وبكاه المطر .. وبكتو اقلام المدارس والورق .. انا من قبيل بساسق بى بره بره .. بزازى بى الترع والحواشات .. بعاين بى هنا وبى هناك .. ما سالتنى ليه ؟ هل ما عاجبنى المنظر الجميل .. والوصف البوصف ليكم فيه ؟ لوحات طبيعيه مرسومه ومنحوته فى خيالى .. لكن الوجعه والصدمة كانت ناااااار .. مولعه وما زالت مؤججه فى جوفى .. بتلتهب فى الحظه مليون مره .. وبتفتح جرح ما بندمل .لمن اغيب عن هذة الفانيه ام قدود .. انا حقو انسحب من الرحلة الجميله دى .. اقشش دميعاتى الما بجفن .. واودعكم ..على امل القاكم فى بقعه تانيه من بقاع بلدى الطاهر .. وبتمنى ليكم رحله جميله .. وسلموا على اهلى كلهم واصحابنا واحبابنا .. واتمنى انهم يعذرونى ..لانه الجيه ليهم اصعب مما يتخيلوا .. زمان كيف.. وهسه كيف .. من سنه ونص والذكريات الجميله المحفوره فى جوانا .. كل ناس البيت .بقت زى بركان من نار ..كل ما نفتحوا يولع زياده .. نحن بنحاول نخليه مدفون .. صحيح نارو بتفضل جوانا لى ما شاء الله ..لكن على الاقل ما بنفتحها عشان ما نألم الحوالينا .. ارجو ان تعذرونى لو المت اى زول فيكم .. فقط ارجو ان تترحموا معى على والدى الاستاذ الجليل المرحوم صديق الطيب
هل عرفتو من هي صاحبة القلم المبدع التي ، صورت المشاهد وكأنها حية تماثل أمام ناظرينا انها الشاعرة الجميله اسماء صديق الطيب بنت المرحوم الاستاذ العظيم الف رحمة على العم وأستاذ الأجيال الذي كان يعرفه الداني والقاصي ومن هنا ندعو الاخت اسماء صديق بالانضمام الي منتدي السكر وان تمتعنا باشعارها ونقول لها لو ابعدتنا الامكنه فنحن هنا متجمعون فلكي التحية ولاسرتك العريقه مليون سلاااااااام

بالرغم من اختلاف المناطق التى اتو منها وهو نموزج لسودان مصغر ولكن الجميل والمدهش فى مجتمع المصنع ان مستوى الترابط يفوق متانة ترابط الاسرة الواحدة فمن المستحيل ان تجد مجتمعا بمثل هذه الصفات الممتازة حتى فى مصانع السكر الاخرى وندعو الله ان تستمر المحبة والاخوة وسط هذا المجتمع المتفرد فى كل شيئ