السلام عليكم ورحمة الله وبركاته
عالم الإتيكيت أو علم الإتيكيت أو نقول فن الإتيكيت بمعنى أصح .. فن جدّاً جميل وراقي
بحب أقرا عنّو .. بلقى حاجات متفقة مع المفروض يحصل .. وحاجات خياليّة صعبة نعملا في مجتمعنا السوداني
الليلة عايزين نتكلم ونقارن بين الإتيكيت في تقديم وإستقبال وإختيارالهدايا
وبين الحاصِل في مجتمعاتنا السودانية
مثلاً من الإتيكيت أننا لمّا يكون الزول العايزين نهدي ليهو هديّة مقرّب لينا .. نقوم نشوف هو محتاج لي شنو ونهديهو الشي المحتاجه
عندنا غالِباً في المناسبات بيكون صاحِب المناسبة عندو .. علب حلاوة وشوكليت أشكال وألوان ممكن يفتح بيها دكّان وكمان مشروبات غازيّة وحاجات من هذا ( القبيل )
كمان الإتيكيت بيقول أننا لمّا نهدي زول هديّة نديهو الهديّة في يدو
لكن عندنا لمّا نمشي لي زول عنده مناسبة بنقوم نخت الهديّة في أبعد مكان عن صاحِب البيت .. ونحاول نخليهو ما يشوفا .. وهو زاتو بعمل نايم ويتلفت منّك لمن تختها .. ولو إضطر وشافك لازم يقول بالله لي شنو ما كان ضروري .. مع أنّو الأولى الشكر في هذا ( المقام )
وكمان الإتيكيت بيقول أننا نفتح الهديّة قدام الزول الجابا عشان نشكره ونمدحها قدّامه
وبرضو نحن بنحاول نعمل نايمين وماشايفين لمّن الضيف يمشي
ولو طفل لمس الهديّة قدّام صاحبها .. ممكن يقدّم لمحاكمة عسكريّة بعد ما الدنيا تروق والناس يمشو
طيب
ليه عاداتنا ضد الإتيكيت
طيّب الصح وين في اللي نحن بنعمله ولا في الإتيكيت
ولا كمان الإتيكيت دا كلام فاضي حق ناس فاضيين
طيّب ليه نحن ما بنمشي مع الإتيكيت طالما ما بيتعارض مع ديننا وقيمنا
عايزين رايكم وتعليقاتكم وأفكاركم
