يلا يا توفا بعد ما تشربي اللبن بحجيك .. لكن أنا دايره شاي بلبن ..لا .. لا .. يا توفا اسمعي كلام ماما ..الأطفال قبل النوم بشربو اللبن عشان يكبرو والناس الكبار بشربو الشاي باللبن ولاآيسكريم خلو عسان جاب آيسكريم ..ولا آيس كريم لبن وبس ..خلاص كان شربت بتحجيني ..؟ طوالي وكمان أنا عايزه غنيه ..ما في مانع ..أها شربت اللبن أول غني لي ..طيب أنا بغني وإنتي غني وراي ..السمبريه يا أم قدوم ..قدوم شنو يعني ..القدوم هو الخشم ..مش بناكل بخشمنا ..أيوا ..يلا السمبريه يا أم قدوم السمبريه شنو يعني ..السمبريه طيره كبيره بتجي مع المطر ..السمبريه يا أم قدوم عيش أبوي بقوم متين .. بقوم باكرمع العساكر..العساكر كيف ..العساكر زي الشرطه ..مش بابا شرطه وعندي صوره معلقه في الحيطه ..ده ياهو لبس العساكر ..السمبرينه يا قلقوم ..قدوووم مش قلقوم ..سيبك من الغنا .. نجي للحجا .. حجيتك ما بجيتك ..خيراً جات وجات ..كان في راجل عندو دكان وعندو ولد كسلااان اسمو سليمان ..شغال مع أبوهو في الدكان ..وعندهم قدرة فول كدا ..قدره كيف ..قدرة الفول المصري .. مش كل مره بنمشي بالعربيه لبقالة وجع راس نشتري منو الفول والرغيف ..آآي والطعميه كمان ..يلا أبوه متعبو بالشغل لا بخليهو يلعب كوره ولا بشوف مسلسلات ولما صلاة المغرب تجي الراجل يمشي بيتم ينوم ويقول لولدو سليمان نضف الفول وكب فيهو مويه والصباح بدري يصحيهو عشان يمشي يخت قدرة الفول في النارولامن وقت الفطور يجي يكون الفول نجض .. بس مره سليمان الكسلان لقا ليهو خاتم دهب واقع قال بختي أمشي أبيعو و اشتري بالقروش حا جات ..قام الخاتم اتكلم معاهو قال ليهو أنا ما خاتم خاتم البلبسوه في اللصابعين ..أنا إسمي خاتم المني ..أي حاجه عاوزا أعملا ليك ...سليمان الكسلان صنقع ودنقرقال ليهو أنا عاوز ..عاوز قدرة الفول حقتنا أصلها ما تكمل ..قال ليهو خلاص غمد ..لما غمد وفتح مشي الدكان لقي قدرة الفول مليانه فول وكلما يغرف منها ما تكمل ..خلاص ..سليمان الكسلان بقا فرحان ولا بشتغل ..مره نسي الخاتم في البيت قام أبوهو لقاهو وعشان ما ولدو يتعلم الكسل دسا منو الخاتم ورجع سليمان بطل الكسل وبقا يحب يشتغل في الدكان والقصه انتهت .
