حنين

انت حنينة وراقية وطيبة ومابستاهلي جفوة قلبي...
انت الصادقة وحبك طاهر وما دايرلك تعرفي غلبي..
عشت الحب في قلبك راهب وبرضو قليبك عاش في حبي..
وكانت بينا مدائن فرحة ولسة الريد يادوب متشبي..
عايني كمان ياغالية وشوفي واسمعي زين الكان متخبي..
عيشي معاي الواقع برضو اخدي كمان انفاسك وهبي..
شوية شوية حنمشي ونمشي صبري قلبك وسيري معايا..
اسمعي اخر القول والقصة واحكمي في الاخير بالجاية..
سبتو طريقك شان مصلحتك وتلقي طريقك واشقي شقايا..
وابقي معذب طول عمري وطيفك ورسمك شلتو كفايا..
وباقي هواك خليهو في قلبي وما محتاج تديهو وصايا..
شوفي سعيد الحظ ياغالية عشيشي حياتك وحققي راية..
كلو قدر ياغالية بعرفولاقي قليبك بروضو وصابك..
ولو الدنيا امراضها تصيبك تلقي قليبي يحبك دابك..
وبعصر منو اشواقو وطيبتو عشان اسقيك حنانو شرابك..
بس ياسمحة بريد احكيلك والافرح اتلمت وجاتك..
عن الاهل الما حيرضو دقيقة حياتي وثانية حياتك..
والافراح الكان لمتنا فيها تعيشي تضوقي عزابك..
وتلقي سواد الليل الداكن ويبدأ ظلامو يزيل احلامك..
وجرحة قلبك قاسيا عليا وجرحة قلبي كمان قدامك..
شفتي الهم الواقع فيهو وكيف خايفلك وعارفو غرامك..
قصة غريبة وقاسية عليا وسيبي دريب الهم بالفيهو..
زي ماسبتك غصبا عني شوفي طريقك عيدي مشيهو..
تمي خطاوي الريد بالفرحة وخلي دعائم قلبك فيهو..
عشان ما تنشب بينا الخوة وتاني دريبك ابدأ اجيهو..
حنين ياغالية بريدك كنت الا حقولك غاب غريدها..
وما ظنيت البيت اتكون وما ظنيتك تبقي شديدة..
غصبا عني خلاص ياغالية الف وداع لي زهرة فريدة..
كل سلامي وروحي وزاتي الف سلام للحب والريدة..
واصلي مسيرك وعيشي حياتك كوني قريبة وكوني صديقة..
بدل الحب حاتفضل خوة وبالايمان حتبقي اكيدة..
واعدي قليبك ينسي هوايا ارسمي باكر لوحة جديدة...

اخي عمر كم كانت صادقة هذه الكلمات التى لم توضح لنا غير الصدق فالتوفيق لك ونتمنى رؤية المزيدوانت تتلمس درب القافية الطويل