انت سوداني
عارفك انت سوداني
ومولود في بلد تاني
دايرك تعرف السودان
وتنقل عني الحاني
اكلت الكسرة باللوبه؟؟
بتعرف تقلب الهوبه ؟؟
وعمرك شفته راكوبه؟؟
في يوم فلقوك بي طوبه ؟؟
لبسته الجبه مقلوبه ؟؟
حضرت العرضة والنوبه ؟؟
بتعرف يمه حبوبه ؟؟
وكت تمرق سعن روبه
لعبت شليل شليل وين راح ؟؟
عضم بالليل عضم وضتـاح
جهاله غبش نفتشو صاح
ونلعب يومى ما بترتاح
بتعرف تمشي كداري
تسوق العجله سداري
وتركب في الحمار جاري
تشوت الكورة ضفاري
هوي يا بنيه قشي الحوش
ومشطي شعرك المنكوش
وخلي البيت دوام مرشوش
وفرشي في البرنده بروش
وكت حماد قعد صنقر
وحلب البقره واتحكر
ومرق العجلة من الكر
وقال للكلبه ابعدي جر
اشرح لي قولة عــر
معاها الدوكه والقنقر
وقندول الفريك اخدر
والفرة البتخلع فر
ادليت عقرت خدار
ودحشك فر منك وعاار
وحشيت في الجنينة عدار
وغنيت في الفجر مسدار
اكيد ما بتعرف الزغرود
وما جربت ضرب السوط
ولا غنن لك البنوت
ولا غنمك رعن حنثوت
اياديك ناعمة ما حشن
ولا جربت مويه الشن
وما قفيت غنم طشن
لقيتن في الخدار خشن
في شركت لي طيره
وشركك هبت في غيرا
في ديك عمتك خيره
وترقد صوف وفريرة
بتحضر مولد المختار
وتسمع للمديح بالطار
والدرويش يلف دوار
ونلف برا نحن صغار
في يوم قرقرت زمباره
حضرت الحفلة في الحاره
وباريت ليك طمباره
سمعت الدنيا زوااره
تعرف الليقة والتربال
شال طوريتو راس المال
وحرم التكة والسروال
وقال للواطه جوكي رجال
رجال تسقي الخدار بالليل
اياديهن خشن بالحيل
بياكلو حلال حليلن ديك
كرام والله زي النيل
خروف مضبوح عشان الضيف
وجه مطروح صديق ما زيف
خصالن تتعب الوصيـــف
وكان واصلت ما حاقيف
سمعت الساقيه لافة تدور
ونضم السلياق للتور
والحاحايه فيها سرور
زهجان علبو الزرزور
ديك حسبان مع الواسوق
واحد يشد وواحد يسوق
وديك حنيات هناك بي فوق
يشتتو في الخدارمادوق
هداك اللوري شايك السوق
وحس البوري سوا القوق
سيدو الحاج شهامة وزوق
وما فات ليه قط مخلوق
جدودك في الدواس ظاهرين
وساعة الحارة معروفين
اسود الخشه نابت شين
يقصو الزول عديل نصين
السودان كريم وحبيب
بلد مضيان وسيع وحيب
اسال عنه اي غريب
بقول ليك زيو مافي قرين
اخيرا بسال الرحمن
يسلم بلدك السودان
يرقيها ويعلي الشان
وتصبح عاليه اعلى مكان
كلمات الاستاذ // عماد الدين عبد الوهاب مساعد
