ما احلى ايام الفريق وذكرياته التى لا تموت واحداثه التى حملناها منذ ذاك الماضى البعيد
حتى تجسدت فينا هذه الذكريات واصبحت صوتنا الذى نصيح به ضد الانكسار والبطش وظلم الايام
فما احلاها من حكايات
كوع رقد شجر الدليب
وكتين لمح خوف الفريق
والناس تخاف
قبال يكون الخوف رفيق
الله اكبر
كان بداية اليوم هناك
صوت المؤذن
والكل صحا
حاج ابكر
والتومه بت الشول كمان
والحسره كانت
قسمة الزمن الكعب
حاجه فى الكل مشترك
حاج ابكر فات للفرض
والتومه هبشت للضرع
ضرع الغنيمات والبقر
شان الوليدات والنعيم
وشاى الصباح للنعيم
والشافع البشبه يتيم
ولقت الضرع
ناشف بنادى على الودر
حبة لبن
تديهو راحة انو
كمل واجبو زى باقى الخلق
والتومه كانت وش صلاح
حمدت المولى ومشت
نادت على ام الخضر
هل باقى ليك شئ من لبن
والناس هنا
ما بعرفو ا البخل السجم
وام الخضر
ادت التومه اللبن
والحال تمر
تمشى وتجي
ام الخضر تدي وتشيل
لامن دخل
السوس
وفرق للاهل
ام الخضر
ضاقت قروش بيع اللبن
والتومة زي ام الخضر
ورابط الاهل المتين
اصبح عدم
التومة في جلسة حريم
تقطع تسب ام الخضر
وام الخضر
في قولا ما تعرف شكر
التومة غشاشة اللبن
وحاج ابكر
فات اغترب
ولامن رحع
حلف اليمين
الاغتراب اكبر وجع
لا قريشات منه جات
مع انو كان حضن القروش
الا الطمع
الجاءهو في العمر
خلاءهو يحلف باليمين
مع انو كان انسان نبيل
بيقسم لقيمتو مع القريب
كان مزارع
والسر قديم
اجدادو عشاق للارض
والجود صفه
مكتوبة حكرا للارض
الا السفر
بدل صفات حاج ابكر
كتف اياديهو وسكن
وهاك الجميلة بقت عكس
والوليدات في الفريق
بين بين وبين
شله هجت للمدن
وشله حاضناهو الشجر
والبنيه الكان اخت
بقت الرفيقة
الكائسة وين درب الضياع
مسكوا الغرام من غير فهم
ديك خشت بيت فلان
وديك طلعت من فلان
وديك كانت في المدن
عربيدة في ليل السجم
وجفت جنائن الناس في هم
الكان بيزرع في الارض
باعا في غفلة ورحل
وانبهم سر الفريق
الخوف مع الكل زي صديق
الخوفوا انو المال يضيع
والخوفوا انو السر يضيع
الا زولا
اسمو كان ود الخزين
ماسك على الوجع القديم
لو جيتوا في حر الشمس
تلقاهو في عز
وليك يقول
نحمد المولى الكريم
وغير الحمد ما ليهو قول
وطوريتوا في اليد
زي رضيع
في رعاية من ود الخزين
والطين هو كان
ام الرضيع
وود الخزين
شائل صفات شجر الدليب
شموخو من شجر الدليب
وبشوف بعيد
زي الدليب
وحاشاهوا يرفض ليك طلب
مع انو زول
بالجد بسيط
يبسم ويسرد مقال
عن الككر
والجد زمان
سنار جدودنا
الختوا ساسنا
وعلوا راسنا
وصالوا ما عرفوا التعب
وود الخزين
يحكي
وكأنو كان
حاضر زمان
وفي اخر القول يرثي ليك
المحقة في الزمن الصعيب
ويضحك تشوف جور الزمن
ما خشمو مشتاق للسنون
والشيب وشاح
طرد السواد
الا الجسد
في قوة حيرت الشباب
وود الخزين
اصل الفريق
بيعرف الناس بالاسم
المبروك فلان
ابوهو كان
وجدو كان
وفي الخريف مولود فلان
وفي موسم الجوع
جاب فلان
وفي القومة تلقى كلام جميل
يحفظك ربي العليم
دعوة من ود الخزين
########
