منتديات مصنع سكر حلفا الجديدة
منتديات مصنع سكر حلفا الجديدة ترحب بالزوار من ابناء المنطقة وجميع الاحباب والمريدين داعين لمد جسور التعارف بين الجميع ودوام التواصل
منتديات مصنع سكر حلفا الجديدة
منتديات مصنع سكر حلفا الجديدة ترحب بالزوار من ابناء المنطقة وجميع الاحباب والمريدين داعين لمد جسور التعارف بين الجميع ودوام التواصل
منتديات مصنع سكر حلفا الجديدة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات مصنع سكر حلفا الجديدة


 
الرئيسيةأحدث الصورالتسجيلدخولمركز تحميل المصنع     مجموعة الفيس بوك

اهلا وسهلا بناس المصنع عزيزى العضو فى منتدى مصنع سكر حلفا الجديدة تفضل بالدخول الي المنتدي واذا ما مسجل معانا تكرم بالتسجيل والتمتع معنا ولقاء الاحبة والاخوان ومن فرّقتك عنهم طرق الحياةولو ما عارف كيف تسجل في المنتدي فقط إضغط زر ( تسجيل ) واتبع الخطوات ,واحدة واحدة,(الادارة بتفعل حسابك )

 

 قصيدة النخلة للشاعر محمد الحسن سالم حميد

اذهب الى الأسفل 
3 مشترك
كاتب الموضوعرسالة
مصطفى مولى
عضو جديد
عضو جديد
مصطفى مولى


عدد المساهمات : 16
نقطة : 8550
تاريخ التسجيل : 29/07/2012

قصيدة النخلة للشاعر محمد الحسن سالم حميد Empty
مُساهمةموضوع: قصيدة النخلة للشاعر محمد الحسن سالم حميد   قصيدة النخلة للشاعر محمد الحسن سالم حميد Emptyالخميس 02 أغسطس 2012, 9:56 am

النخلة
شعر : محمد الحسن سالم حميد
النخلة
في الليل المهول
وحِّيدا
في عز الرياح
فارس يدارِق
في الرماح
الجايّة من كلِّ


اتجاه
<><><
رغم الجراح
شُح ألمِي والزاد
والسلاح
راكز.. يصول
لا أنّة.. لا حنى للجباه
لا خان بصيرتو
الإنتباه
لا حتى قال
يل المغول
ولا ختاه.. آه..
على عز قديم
روّح عجول
<><><
طوّل مداميك الصبر
سدابّة
شرمات النباح
كل ما نزف
من جوفو دم
كل ما عزف لحنو
الصباح
نجم الميامين الحِمِش
ينضارى
شان تشرق شمش
تدّي الحياة
الناس.. الحقول
الدابّة.. والطير
والبِمش
لكنو ماب يخبر افول
<><><
والأرض
مخلاية التعب
مصلاية العِشق
الصعب
ماب تستباح
زي نخلة
في الليل المهول
كانت بتبتخر
الفصول
كانت بتمتحن

الرياح
كل ما تطول
<><><
والدنيا خوف
عابر.. يشوف
عنف الرياح... النخلة
ولا النخلة
عنف الرياح
ليل مهول
طوالي راح يحلف
يقول
النخلة ماب ترجي
الصباح
والطيب الصابر سنين
راجيا.. باكر
حقو .. راح
لا فك دين
لا سدّ جوف
رزقو المعلق في السبيط
مشهادو أصبح بين بين
فالنخلة ماب ترجي
الصباح..
لكن
ضراعاً في البلد
عارف عروق النخلة
وين
خابر صمودا
المِن متين
ضامن ثبات ساقه
الهطيط
سامع مناتقة الرياح
ساكت صياح
<><><
فالنخلة ماب تقدر
تخون الأرض
ما بتقدر تكون
غير المراح
لي همبريب
يغشى البيوت
عند الصباح
نُص النهار عند المغيب
وشان تدّي ضُل
والصيف غريب
تاخد الهجائر بارتياح
<><><
وكل الرياح فوقا التمر
ومن كل أصناف الرياح
النخلة ماب تخبر
خلاف ريح اللقاح
عز الرياح أم التمر
تتفاني تتجاسر تصون
عش الطيور البينا
تفرج للجناح
ترقص تميد
ما الساق هطيط
والجو براح
وفي الأرض ماشي
عرِق بعيد
هو عِرِق نصاح
<><><
ييبس جريد
ينحت سبيط
والنخلة تشده بالجريد
النخلة تتعب في اللقيط
<><><
النخلة ياها النخلة
لاب تعرف تخاف
قل المطر تُقل الجفاف
لا فتوة الريح العبيط
طوالي في أجمل
وشاح
<><><
وكل الرياح فوقا بتمر
من كل أصناف الرياح
النخلة ماب تخبر خلاف
ريح اللقاح والهمبريب
<><><
ما ليها غير تطرح تمور
تملأ الشواويل والقفاف
ينتم زين... ينحل دين..
يطلق ضهر زولاً بسيط
واقف على حد الكفاف
ومن ركة الرزق المتاح
رزقو المعلق في السبيط
ينزل كما الطير الخفاف
يقدل نشيط
يخضر زي شتل الضفاف
كلما النشاف بدأ
في السبيط
<><><
حلَّل صيامك

يا الرسول
باركيها بالهز يا البتول
تأتيكي بالقدسي
اليقول
أنا ود حلالك
ومُو سفاح
باركيها عمتنا
التفج غمتنا
عند ساعة نواح
<><><
من ساقة
نتعلم نطول
الجو براح الله
وما حوشلو زول
نصعد على مر الجراح
زي نخلة صاح
عوافي...
لو عنف الرياح الصاقعة
أهوال الفصول..
البودي.. آفات الذبول
قِدرن على ساقه
الهطيط
تقع... وآب تموت
روحا المدردحة
ماب تفوت جسدا
المعمر بالخلود
قلبه المقمّر بالكفاح
<><><
زي السلام, تلقاها
خشّت في البيوت
وبي كل صراح
<><><
تقروفة, سجاجة طهورة
طبق من العرجون
ضنيب هبابة
طاب.. طبطابة
قُفة.. وكسكسيكة
حبل متين
فتلوهو في
ضل الدليب
نشلوبو من بئر للشراب
نسجوبو بنبر وعنقريب
<><><
زي كل عيد
والعيد مع شفق الصباح
ما بيجينا ليل
تلقاها خشت
في البيوت
جوبيل.. جريد
يعرش سقوف

بيتاً جديد
أول دخلتو
عريس سعيد
كبريت دخلتو
طلح بعيد
مبسوط يقرقر بانشراح
<><><
يا بيضا يا مسواك جريد
بت
انحنتلو مع الصباح
طرَّا أمها الطير الرقص
طرَّاها
طارات المحس والزفة
ليلاته الملاح
<><><
ما أنعم مشاط
من شوكا كان
وشقة مسايرك
يا أم سماح
<><><
عوافي كيف؟
بي خيرا
زي زخلة خريف
تمرق على تامزين
صريف
قدامو خيل العمدة
جم حضرة
حمال الدايي
بت عنقال تقيف
فوق الحفير دومي
وتحت دروة
وعبير المسقي فاح
في حين
حسيس الساقي ناح
<><><
عوافي كيف
أو حتى واقوداً
تدفسو السمحة
في نار بارتياح
لي يوم عزيز يطلع خبيرز
دكاي صفاح
يمرق ملاح
بروبو ناساتا ضيوف
أو زول وراهو
شغل بعيد
جابرا الظروف
يكرف قهيوتو
وشاي صباح
آخر المطاف
والموت بيشرق نسمة
في كف الصبا
الموت بيسرق بسمة
من شال الصبا
وتوب الزفاف
<><><
والموت هو
الحقّ الجلي
النقدر نقول يف الدنيا
ما سواهو زول
<><><
الموت مفاكهة المثول
ما بين وعيك والذهول
يشبه متاوقة الحبيب
والغيبة
في محيا الخجول
<><><
أو بي يكون بي ذاتو
أول خطوة
من درب الرحول
لي ذاتو
في درب الوصول
<><><
وزي كل طائر
وكل زول
زي كل جواد
زي كل ما بين البحار
والأنهر المتراوحات
من سابحات
<><><
النخلة ترباية العباد
بجلاله تتحول رماد
ورماده يتحول سماد
وسمادا يدخل كم بلاد
وديانة تخضر والبطاح
<><><
أستغفر الله بس يكاد
منو وجديد الباد يعاد
والكلو في الكون
عندو روح ما من جماد
إلا الجاد مادب بوذو
وضحك منُّو الزناد
شوف كيف
كفاح النخلة.. يوت.. لا
حيلة
تتحدى الرياح
عبر على مر الحياة
وتتمطق الموت
بي جلد
من بعد ما ملت البلد
شتلاً مخلف بارتياح
طول المصير

النخلة حوت الصحراء
أو جدي الجروف
تلقاها مرتاحة الضمير
يكفيها دا ويكفيها صاح
بجراحة رجتنا الصباح
يا القلتو ماب
ترجي الصباح
النخلة تحت الواطة
سر
والنخلة فوق
جهرة نصاح
والأرض أعمق ما تكون
والجو براح
<><><
يكفيها صباح
عز المطر.. عز الجفاف
ما استسلمت
لي ريح غريب
وكل الرياح فوقا بتمر
من كل أصناف الرياح
النخلة ماب تخبر
خلاف ريح الصلاح
<><><
يا معوض الليل بالصباح
ومعود النار اللهيب
روض نخلنا على الرياح
وفي لجة البحر الغريب
أد الرواويس الصلاح.
الرجوع الى أعلى الصفحة اذهب الى الأسفل
خالد حسن بخيت
مشرف
مشرف
خالد حسن بخيت


عدد المساهمات : 1936
نقطة : 12641
تاريخ التسجيل : 10/02/2010
العمر : 47
الموقع : www.3aza.com/vb
المزاج : مسلم

قصيدة النخلة للشاعر محمد الحسن سالم حميد Empty
مُساهمةموضوع: رد: قصيدة النخلة للشاعر محمد الحسن سالم حميد   قصيدة النخلة للشاعر محمد الحسن سالم حميد Emptyالخميس 02 أغسطس 2012, 11:01 am

عوافي كيف؟
بي خيرا
زي زخلة خريف
تمرق على تامزين
صريف
قدامو خيل العمدة
جم حضرة
حمال الدايي
بت عنقال تقيف
فوق الحفير دومي
وتحت دروة
وعبير المسقي فاح
في حين
حسيس الساقي ناح



الله الله ..
شكرا علي الاطلالة الجميلة .. كلمات محتاجة لي ديوانكم الفي الري .. عشان الواحد يشعر فعلاً بسعادة داخلية وراحة نفسية .. شكر يا ود مولي ..
الرجوع الى أعلى الصفحة اذهب الى الأسفل
http://www.3aza.com/vb
عوض احمد ادريس
مشرف سابق
مشرف سابق
عوض احمد ادريس


عدد المساهمات : 1205
نقطة : 10669
تاريخ التسجيل : 07/11/2011
الموقع : امدرمان
المزاج : سودانى

قصيدة النخلة للشاعر محمد الحسن سالم حميد Empty
مُساهمةموضوع: رد: قصيدة النخلة للشاعر محمد الحسن سالم حميد   قصيدة النخلة للشاعر محمد الحسن سالم حميد Emptyالجمعة 03 أغسطس 2012, 10:39 am

سلامات ود مولى وخير البدايات هى التى يكون موضوعها حميد النهر...النخله.....الصمود ....الصرخه ضد الجمود والانكسار فحميد والذى حسب اعتقادى البسيط ثروه لم نحسن التعامل معها حتى الان فقصائده
يمكن ان تكون دليل لتربيتنا وطنيا وثقافيا
ويمكن ان تفتح لنا افاق الحلم بمستقبل اجمل
فلك التحيه والاشواق ورمضان كريم ايها الانسان ود مولى
الرجوع الى أعلى الصفحة اذهب الى الأسفل
مصطفى مولى
عضو جديد
عضو جديد
مصطفى مولى


عدد المساهمات : 16
نقطة : 8550
تاريخ التسجيل : 29/07/2012

قصيدة النخلة للشاعر محمد الحسن سالم حميد Empty
مُساهمةموضوع: رد: قصيدة النخلة للشاعر محمد الحسن سالم حميد   قصيدة النخلة للشاعر محمد الحسن سالم حميد Emptyالإثنين 06 أغسطس 2012, 12:13 pm

شكرا لمروركم الرائع ياخالد وعوض وان ش الله نتلاقى وننداح فى الونسه والاشعار
الرجوع الى أعلى الصفحة اذهب الى الأسفل
 
قصيدة النخلة للشاعر محمد الحسن سالم حميد
الرجوع الى أعلى الصفحة 
صفحة 1 من اصل 1
 مواضيع مماثلة
-
» اجمل ماقال الشاعر محمد الحسن سالم حميد
» عن حميد
» حوار معلم الاجيال والشاعر المرحوم جعفر محمد عثمان خليل
» غيم الوداد للشاعر خالد شقوري
» الشاعر .. الحسن ود سالم

صلاحيات هذا المنتدى:لاتستطيع الرد على المواضيع في هذا المنتدى
منتديات مصنع سكر حلفا الجديدة  :: المنتديات الادبية :: الشعر-
انتقل الى: