منتديات مصنع سكر حلفا الجديدة
منتديات مصنع سكر حلفا الجديدة ترحب بالزوار من ابناء المنطقة وجميع الاحباب والمريدين داعين لمد جسور التعارف بين الجميع ودوام التواصل

منتديات مصنع سكر حلفا الجديدة


 
الرئيسيةبحـثالأعضاءالتسجيلدخولمركز تحميل المصنع     مجموعة الفيس بوك

اهلا وسهلا بناس المصنع عزيزى العضو فى منتدى مصنع سكر حلفا الجديدة تفضل بالدخول الي المنتدي واذا ما مسجل معانا تكرم بالتسجيل والتمتع معنا ولقاء الاحبة والاخوان ومن فرّقتك عنهم طرق الحياةولو ما عارف كيف تسجل في المنتدي فقط إضغط زر ( تسجيل ) واتبع الخطوات ,واحدة واحدة,(الادارة بتفعل حسابك )

شاطر | 
 

 شجرة الحيارى (يا عم)

اذهب الى الأسفل 
كاتب الموضوعرسالة
ناصر البهدير
مدير عام سابق
avatar

عدد المساهمات : 3668
نقطة : 12256
تاريخ التسجيل : 30/01/2010
العمر : 49
الموقع : البحرين

مُساهمةموضوع: شجرة الحيارى (يا عم)   الإثنين 05 نوفمبر 2012, 3:37 pm

شجرة الحيارى أو يا عم
لم أجدها بذات الألق والضجيج الذي يسكن جذعها وساقها الهطيط وقلب كل عابروها رغم الخضرة التي تكسو محياها وكل أطرافها وأفرعها التي تعانق عنان السماء ..لمحتها في نهايات يونيو الماضي خالية حتى من تلك العصافير التي عرفت بها كشامة جميلة تزين جيدها الشامخ..
عوالم لا تنسى .. شجرة تتوهط طرقات المصنع الدافئة والحنينة من كل الاتجاهات وتسكن مفاصل الناس وتملأ أحداق عيونهم وأجفانهم ترسم عليها حدائق من البهجة وألوان من الجمال وما تشتهي نفوسنا جميعاً.. ملاذاً لكل العابرون صغاراً وكباراً .. يعبر الناس بها كل يوم لدنيواتهم الصغيرة وأحلامهم الكبيرة .. لا تزال صامدة رغم الاهمال القاتل الذي يحتشد في نطاق خصرها الناحل وحجم العمران المتسارع بالبلد من حولها حيث تحيط بها الأرض المتناقصة والشوارع التي لا تبقى على حال في كل يوم يتغير مسارها وتتأكل أطرافها كما تتأكل كل أطراف الوطن الكبرى ..
وحتى أهل القرية (22) اسكان العابرون لهم منها نصيب كما للاخرين .. يفترشون ظلالها ويتحلقون حول جدولها العذب المنهل وفي هجعتهم راحة واتكاءة ومقيل يحلو تحت ظلال وفوق أوراقها المتناثرة والمتضامة ..
شجرة مترعة بحنين الانس الشفيف وعندها كنا نحتطب بين فروعها الغراء ونمضي في مناكب خضرتها الوريفة
أطلقنا عليها ما شئنا من الأسماء .. شفيفها وجميلها ..
(شجرة الحيارى) .. (شجرة يا عم) ..




شدرة يا عم
سموها شدرة الحيارى وناس تانين من نفس الطينة سموها شدرة ياعم .. ولكل اسم مذاق ونكهة مختلفة وانت في ياتو صف؟ خليك واضح وصريح!!..
الونسة فيها عالم تاني لا يخلو من المغامرات .. عمك سلك مشحوط واقف منتظر .. خلوق ما ليها حد ..
قرصة يا عم! .. السوق معاك ياعم !.. ياعم وصلني معاك قدام! .. عبارات نتداولها كلنا على اللسان لما نكون في الشدرة ..
احتمال تركب وتكون محظوظ لو ركبك عم كلكيز واحتمال كبير تتمو مشي باقي المشوار وتركب كرعينك وتقطع السكة حديد وتكون مبسوط طول السكة تترنم بنشيد (قد كان عندي طائر في قفص حلو الريش .. او ببيض الحمائم على شفاه اخوات البعيو)..
وشارع الترلات مليان غبار وازعاج وصوت شفع المدرسة .. اولاد الكنابي واي واحد جاري ليهو قصباية .. اولاد التفتيش الخامس بصفحة راجين اللاندروفر اربعة شنكل اللونو رمادي ومن الجهة التانية راتعين في القصب ... سمبرية وكبرجل وصلاح وام جمعة وديل كلهم اولاد الصافي بكار.. عيسي ود الجبل ومهدي الصغير اخوه.. حافظ ونادر اولاد عمك عوض فرح هو البسوق العربية ..
حتى محمد ادم جاموس برجا اللاندروفر عشان على الاقل يقدمو قدام ويمشي كمبو واحد وخمسين لأهلو.. شفتو كيف الناس كان بتتعب من اجل القراية!!
والماشي المستشفى ما تنساه تلقاه ياخد ليهو تكية وسندة فيها يرتاح من وجعو حتى مواصلات المستشفى السوق كانت عندها الشدرة محطة مهمة وكبيرة في طريقها..
وأجمل حاجة بنات حى الالمان راجعات اخر البيوت فكوهن من المدرسة .. اللافحة طرحته والكاربها بى كم قصبة والماسكاها تلعب بيها .. وقدامن ست فاطمة مديرة المدرسة ..والبتعتع وترجع لى ورا عشان تشيل ليها قصبة وتخمها تجري بيها فرحانة فرحا قدر الدنيا التقول لقت قروش قارون..
والبنات مزركشات بزيهن الاخضر الجميل زى الوهج واللهيب كان ليهو شنة ورنة حتى الدمورية الجابه ابا عاج ما قصرت الا حرمت البنات من اكل القصب بعد دا في وحدات بحبن القصب حب شديد زى أمير صاحبي واقعات فيهو زى النمل الكابس العضم وزى نمل السكر وقت يكبسك يا مصنعني الجميل.. متوشحات بيهو زى العصافير الراكات على فروع الشدرة كل اليوم ..
واتذكرك زى يوم اسه وقت الترلة دقشتك في شارع الترلات وفاضت روحك الطاهرة.. كلو بى سبب قصبة فكرته تشيله من الترلة وهى ماشه والكلام دا كان ما بين شدرة الحيارى وسنتر زراعة القصب الجديد والكان قريب لى جبرونا وحى الالمان على الشارع الرئيسي .. والشدرة شاهدة على رحيلك يا ابن الكنابي .. رحمة الله عليك ..
وتبقى الشدرة بينا مرتع ذكريات جميلة لا ينضب معينها ..




لست مستقلاً بل منحازاً إلى ديني ووطني ومصنعي
الرجوع الى أعلى الصفحة اذهب الى الأسفل
خالد حسن بخيت
مشرف
مشرف
avatar

عدد المساهمات : 1936
نقطة : 8783
تاريخ التسجيل : 10/02/2010
العمر : 42
الموقع : www.3aza.com/vb
المزاج : مسلم

مُساهمةموضوع: رد: شجرة الحيارى (يا عم)   الأحد 11 نوفمبر 2012, 9:34 am

هنا وهذه المحطة الاولي لانطلاق الروعة والجمال .. هنا كانت اسمي آيات الحضور تنتابنا قشعريرة ونحن ننظر اليها في هذه الصورة التي اعادت الي اذهاننا الجمال .. كنا هناك وكل المرور يرشفنا بالتحايا .. وتحفهم ابتسامات الرضا ..
شجرة كشجرة الحديبية بالنسبة لاهل المصنع .. فتعاهد الجمال والصداقةت والمحبة والاخاء تكون تحتها .. ولولاها لما عرف الجالسون تحت وريفها معاني كثيرة قد لا نجدها الا فيها وتحتها .. وكل الحياري الذي لا يملكون المقدرة علي السير بالاقدام وكل المرضي .. وكبار السن والطائشين من الشباب .. تجدهم كأنهم ( بنات حفرة ) كلهم مبتسمون وآثرون علي انفسهم لغيرهم ..
لك الله يا بهدير .. فهل لنا من جمال كذاك الذي مضي ؟؟



..

مشرف المنتديات الأدبية

الرجوع الى أعلى الصفحة اذهب الى الأسفل
http://www.3aza.com/vb
منى احمد
عضو نشيط
عضو نشيط


عدد المساهمات : 144
نقطة : 5984
تاريخ التسجيل : 03/01/2011

مُساهمةموضوع: رد: شجرة الحيارى (يا عم)   الثلاثاء 08 يناير 2013, 11:52 pm

كل صورة من المصنع حتى لو طرف بترجع شريط الزكريات لاجمل بقعة واجمل مكان لاجمل سنين لحياة نابضة انسابت من بين ايدينا لم نستطع ان نقبض عليها لابد الابدين التحيه لك الراقى ناصر ولذكرياتك العطرة .امطرنا بالمزيد.
الرجوع الى أعلى الصفحة اذهب الى الأسفل
 
شجرة الحيارى (يا عم)
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات مصنع سكر حلفا الجديدة  :: المنتديات العــــــــــامة :: التوثيق-
انتقل الى: