هى بعض متغيرات او دليل يشرح المتغيرات التى اصابت مجتمعنا السودانى الذى نسال الله ان يعطيه الشفاء
هذا النص لايرمز الا لانسان وطنى الذى اتعبنى البحث عنه
كانت زمان ست الفريق
والصوت يلعلع زى لهيب
تنهر
تكورك
زى غريق
والخشم غير النضم ما ليه شئ
الا الزمن
سلطان بادب فى صبر
مات الامير حاج ابكر
دهسوا المرض
كتلوا الضغط
لامن خسر مالو الكتير
والبنك صادر ما فضل
واتشردت
عائلة ابونا الكان نكر
انو القروش فى جيبو
ما بعرف فقر
مع انو كان افقر فقير
فى يومو داك
جاءهو كان عبد الحليم
داير يشيل منو النصيب
شراكه فى دية النذير
هاج ابكر
طرد الرفيق
وقال ليهو
قوم وامشى على الارض
بيع الخراب
وادفع الليك فى الصباح
زعل الرفيق
وقال ليهو فى حسره ومشا
خساره انك تبقا زول
والليله شوفوا الحاله كيف
رحل ابكر
سكن القبر
والتومه راحله على المدن
شفناها فى نص الغلابه
قالت تتاجر كان تعيش
شطه ومدمس
وباقى حاجات
ما بتساوى تمن رغيف
الا بت الشول رضت
وشدت رحالا على اليقين
وندمت على الكان فى جهل
الفشخره وقلت الذوق للاهل
والامان الكان زمان
فى اليد حقيقه
لحقو الضياع
سكن الهلع
بلديه تخمش دون اذن
دوريه ما بتعرف هى مين
وناس النظام
القالو عام
ما بعرفوا كيف يكون حلو الكلام
خلوها تترك بيعا غصبا
ودون كلام
وقالت احاكى البت حنان
واقعد ابيع الشاى كمان
ورجعت تحك فى الوش كتير
ولبست هدوم
بيروت وهوليود الدمار وقعدت
تحاور فى اللبان
اتنكرت
وقالت انو العمر راح
فوق القرايه
الما بتفيد
ومع انو ما بتعرف حرف
وهاك يا مشاغله وانبساط
واتعلمت كم من لفظ
من وين هو جاء
ربك عليم
ومره كان عبد الحليم
فى زياره قاصد للحكيم
ولامن تعب
والراس ضرب
قرر يشوف الشاى
والقهوة من بت المدن
صنقر قعد
وسرح الغريب
فاكر عقابو الفى الفريق
ولدوا داك عبد الرحيم
والمويه لطين الحنين
والبهم وكتين تعود
فى المغربيه على البيوت
وجاتو بت الشول
بت المدن ست المحل
تسرق وتصنع فى الضحك
وفى الساعه ديك
عبد الحليم ما كان عرف
انو بت الشول هى بت
ولامن عرف
قال ليها
يا حليل ابكر
يا حليل سنينك والفريق
يا حليل خصامك للغريب
الا بت الشول ابت
وصرت الوش المصنع فى المدن
تقصد منو
يا جاى من بلد الغجر
وعبد الحليم فى عزه قال
التومه بت الشول هنا
التومه مين
والشول شنو
اسمى يا زول ننويه بس
وقبال يبين سر الحديث
ناس النظام قطعوا الكلام
التومه لمت للعفش
وفاتت تكوس
وين المفر
وعبد الحليم فى صوت حزين
يعيد يقو ل
التومه بت الشول هنا &
