مديدة الدخن

بسم الله الرمن الرحيم
اخواتى حبيباتى كما تعلمون رمضان على الابواب والشبابيك كمان
عشان كدا نلحقكم بمديدتين للدخن عسى ان تستفدن منها
1) مديدة الدخن المطحون
مكونات هذه المديدة دخن مطحون - عطرون-ذرات ملح-سكر
نقوم بغلى الماء حسب الكمية المطلوبة
بعدذلك نضع كمية الدخن المراد طبخه فى اناء ونخلطة بالماء وغالبا ما تكون الكمية مقدار كباية شاى ممتلئة نصب هذا الخليط على الماء المغلى تدريجيا حتى يتجانس ثم نضيف ذرات من الملح
ونتركة لمدة عشرة دقائق ثم نضيف الية السكر نتركه حتى ينضج ويقدم دافئا
وبالهنا

عايده ماتنسي الجيران
ترسلي مع فارس
كوريه كبيره
وبالهناء

تسلمى اختى عائدة ولك التحايا والاشواق بالله اطبتى الشغلة دى ورسلى لمحمود جارك واضيفى قليل من العطرون وما تكتريه وبالهنا
والوصفة الجاية ام جنقر
ام جنقر دى زماااااان كان جيرانى فى حلفا بيرفعوها لى بالحيطة
لكن هنا فى الخرطوم اتعلمته الطريقة وبقيت خبرة
المقادير دخن مقشور وليس مطحون - هبهان - زنجبيل- ممكن بالروب او الليمون او العرديب لكن حسب خبرتى بالروب اجمل واحلى
سكر
الطريقة نقسم الدخن الى ثلاثة اجزاء التلت الاول يسحن ناعم- التلتين يكون مدروشين يعنى اخشن شوية نضع قليل من الماء مقدار كوبين شاى على النار حتى تصل درجة الغليان
نمزج التلتين بالماء ونصبهم تدريجيا على الماء المغلى ونتركهم حتى ينضجو لفترة نصف ساعة تقريبا ثم بعد ذلك نمزج التلت الناعم ونصبه على الكمية السايق ونتركة لمدة عشرة دقائق ثم نضيف الروب او الذبادى ثم نضيف السكر ونتركة لمدة عشرة دقائق الهبهان والزنجبيل تضاف مع ماء الغليان السابق يعنى قبل اضافة الدخن
بعد ان تستوى المديدة تنزل من على النار وتقدم دافئة البعض يفضل اضافة الطحنية
ملحوظة : هذة المديدة لا يضاف اليها الملح
وبالهناء للجميع

لك التحية اختنا ام تساب
وبمناسبة رمضان اصله جاى جاى قلنا نفتح ليكم اضنينكم عشان تقوموا تجهزوا الكراتين للمغتربين انا هس ذاتى قايمة اجهز للولد دا كرتونته
وطبعا رمضان دا حأصومه برة بيتنا ما عارفه شكله حيكون كيف لكن الحمد لله رمضان فى اى مكان واى زمااان شهر خير وبركة وربنا يبلغنا رمضان تاميييين ولاميييين ى رب
وبخصوص المديدة فعلا ممكن نضيف ليها اللبن وبتكون احلى بس كدى جربى ام جنقر دى

تحياتي للجميع
الاخ ناصر انا ماجيت قاصد عديل
لكن انا كنت بيقادي ليهم شميت ريحة مديده
قلت اسال بت سيد رمضان ثبتوه ولا شنو
جيت لقيت الجماعه ناس اشراقه وعايده
قاعدين يجقموا المديده
وسامع حسك من بعيد
اخوي مع السلامه المديده جايبنها لي في البيت