خطرفات زوله

موضوع: خطرفات زوله الجمعة 06 يوليو 2012, 8:10 pm

خطرفات زوله 1
زوله من ضمن الغبش احلامها لا تتعدى بعض الخطوات تحلم ولكنها جبانة فى الاحلام لانها وبكل بساطه نشاءت فى
وسط من جعلها موطن بل مستنقع للخوف الذى لا يرحل
احلامها وطن وطن خالى من كل الاشياء التى تجلب الاحزان ولكنها تركت هذا الحلم واصبحت تبحث عن غيره
ولماذا تركته فهذا هو الذى ياتى بالغثيان
امبرياليه وراسماليه وعلمانيه واسلاميه وايدلوجيه
اقسمت بالله بان من جعلها تكره حلمها الوطن هو هذه الالفاظ الغريبة عليها والتى جعلتها تخاف اكثر بعد الخوف الذى
لديها
وصارت تسرع الخطوات نحو حلمها الاخر حلم الحبيب الوطن دخرى الحوبه اخو البنات الما عندهن للدنيا حاجه غير الجمال
والستره فى الزمن الشين وصارت تحلم به ولكنه كان يحلم
بالوهم الذى سكن هذا الوطن قالوا دهب
ملعون ابو الدهب البنسى الزول انو مخلوق للمشاعر ونبضه الشوق للحبيبه الاغلى من كل الدهيبات والجواهر
انتوا ياسر عرفات ده كتلوا ناس منوا فى ناس تقول ليك مين ومين بس الحقيقه هى ان اسرائيل تقتل فينا كل يوما
كل ثائر لانها وباختصار كانت تخاف منا ولكنها اليوم تعيش بيننا
وفى ناس مننا جارين عليها جرى
ماذا حدث هناك وهنا عندهم وعندنا
ومن احبه قال عنى ووصفنى باننى مجنونه لاننى وباختصار احبه كزوله مجنونه
سلامى ليكم كلكم

نقطة : 39702 تاريخ التسجيل : 01/01/1970

شكراً ايها القادمه بقوة السيل علي هذه الخواطر التي صدرت منك الي الامام متمناً ان تجدي كل ما تودين رويته عبر هذه النافذه مجدداً لك الشكر علي استجابة نداء المصنع وتدورعجلات الانجاز بسواعد الافزاز وخالص الامنيات بقضاء اوقات بيننا

موضوع: رد: خطرفات زوله السبت 07 يوليو 2012, 10:23 am

شكرا وانا سعادتى لا توصف ولم اصدق بعد اننى موجوده هنا بينكم وساظل اقدم لكم ما استطيع تقديمه
عرفانا بهذا الجميل الذى وجدته منكم
وسلامى ليكم كلكم

ناهد يحيى علي"]زوله من ضمن الغبش احلامها لا تتعدى بعض الخطوات تحلم ولكنها جبانة فى الاحلام لانها وبكل بساطه نشاءت فى
وسط من جعلها موطن بل مستنقع للخوف الذى لا يرحل
احلامها وطن وطن خالى من كل الاشياء التى تجلب الاحزان ولكنها تركت هذا الحلم واصبحت تبحث عن غيره
ولماذا تركته فهذا هو الذى ياتى بالغثيان
امبرياليه وراسماليه وعلمانيه واسلاميه وايدلوجيه
اقسمت بالله بان من جعلها تكره حلمها الوطن هو هذه الالفاظ الغريبة عليها والتى جعلتها تخاف اكثر بعد الخوف الذى
لديها
وصارت تسرع الخطوات نحو حلمها الاخر حلم الحبيب الوطن دخرى الحوبه اخو البنات الما عندهن للدنيا حاجه غير الجمال
والستره فى الزمن الشين وصارت تحلم به ولكنه كان يحلم
بالوهم الذى سكن هذا الوطن قالوا دهب
ملعون ابو الدهب البنسى الزول انو مخلوق للمشاعر ونبضه الشوق للحبيبه الاغلى من كل الدهيبات والجواهر
انتوا ياسر عرفات ده كتلوا ناس منوا فى ناس تقول ليك مين ومين بس الحقيقه هى ان اسرائيل تقتل فينا كل يوما
كل ثائر لانها وباختصار كانت تخاف منا ولكنها اليوم تعيش بيننا
وفى ناس مننا جارين عليها جرى
ماذا حدث هناك وهنا عندهم وعندنا ومن احبه قال عنى ووصفنى باننى مجنونه لاننى وباختصار احبه كزوله مجنونه
سلامى ليكم كلكم

الأخت ناهد .. تحياتي وتاني مرحب بيك

فكر إضافي لهذا المنتدي

ثم دعي عنك الخترفات

لنحقق أحلامنا ينبغي علينا أولآ أن نؤمن بهذه الأحلام

حتي نزيل عنها صفة الوهم والخيال كخطوة أولي

لتصبح حقيقة نجتهد لتحقيقها ونبذل في سبيل ذلك كل ما نستطيع

من جهد وتضحية ..حتي نحقق أهدافنا التي نبغي

لأن مطاردة الوهم والخيال تفضي نتيجته إلي الفشل

لك التحية والتقدير

مع الأمنيات بتحقيق كل أحلامك

ناهد ؟؟؟
لعلي اطرق باباً اكثرت عليه الطرق قبلا .. !!
او لعلها اضغاث احلام تراود فتي قد بلغ من الكبر عتياً ؟؟
او لعلها سانحات الدهر تاتي كما زخرات عبق الانتشاء ؟؟
لا ادري ولكنني اود بذات الدهشة ان ارحب بمقدمك الجميل اولاً .. ثم ما افتأ في دهشة اخري بما تختارينه من ابداع وتحريك لهذا المنتدي .. وكيف لا ومن اسمك عرفنا انك تحملين الكثير من الدهشة ..
فقط هي شارات نود ان بقي بقربها ساعاات وايام وشهور .. نستوقف عجلة الومن لنتفيأ ظلال عشق ابدي اختلط بالروح فجعلها كالمعلقة وغير معلقة .. ولكنك سانحة اللقاء حتي ولو كان اسماً فقط فهو يهدينا اجمل ايام عمرنا التي عشناها تهدهدنا البراءة والطفولة ..

قول انك زولة .. كفاني ضنا البحث عن هويتك وهوية البحث ولاتفكير العميق في مدولالات البوست .. لان ( الزولة ) هي مبعث الحنان والدفء والوطن والملجأ لكل ( زول ) فهي الكنداكة التي نسمي بها جمعتنا القادمة لاقتلاع من سرقونا وطناً تعيش فيه اسمي معاني الانسانية من ( الزولات ) امثالك .. ومن البقاء معهن وبينهن .. نحملهن بين ظهرانينا ويبعثن في دواخلنا كل اسباب البقاء ..
يكفيك ان ابتدرت قول بأنك ( زولة ) ويكفيني انك ( ناهد ) ..
هي فقط هترشات رجل في غربة ليس بها انيس ولا صديق .. وبحث عن امثالكم .. يا ايها الحلوون الجميلون يا اصدقاء النبض ...

الله يديك العافيه اخوى خالد وانا ما قادره اوصف حالة الفرح الطفولى التى تغمرنى وانا استمع الى كلماتك
التى منحتنى الدافعيه اكثر للتواجد وتقديم المستحيل من اجلكم وارد الله غربتكم اخوى واخو كل البنات اخوات
الولد الراكز وابشر يا خالد

شكرا ناهد ..
قسماً من اسمك هذا احس بالروح تنهض .. وتتسلل من بين جوانح الجسد المنهك .. فكم من نواهد ظللنا غدواً ورواحا من بين شهيق الحلم وزفير الواقع .. فرحلن الي ديار اخري مع اناس آخرين .. ولكنهن احياء بدواخلنا غير اموات .. فيا لهاتيك اللحيظات التي استشعرها عندما اراك تجوبين هذا المنتدي وتزعين بين اقسامه ذرات الحياة وتسكبين فيه ماء الامل ..
شكرا ناهد .. علي كل ما تقومين وتجودين به ..

موضوع: خطرفات زوله 2 الإثنين 23 يوليو 2012, 12:23 am

وسكه حديد تهز وترز
كلام سمح وزين للناس العاشوا وشافوا عزة السكه حديد الخلت شعراء الشعب يحبوها الا وين والسكه حديد بقت
ذكرى مدفونه فى الاعماق
اخترتك وتانى لو الزمن خير بختارك يا زول سكن فى كل حاجه زول لزوله من الناس
وشن فضل فى الدنيا غير الليك
وقالوا رمضان شهر التسامح والاخلاق الجميله الا فى ناس بتتجرس بالحيل والجرسه بتظهر فى الوش المصرور
شوف المواصلات تقتنع لامن غلط
هو انت مش صائم لربك طيب الزم والادب للناس فى كم كان ما قادر اقعد فى بيتكم
رمضان جميل وشهر كريم الله يقبل مننا ومنكم
انتوا سيد البلد اخباروا شنوا قالو راقد ليهو فوق راى وداير يادب ناس النجمه الوصيف الدائم فى كل الازمان
الله يحضرنا
ونحنا نسير فوق هذه البسيطه بكل عنفوان لاننا غرباء فيها لا نملك فيها سوى الذكرى وسمح الكلام
يبقا سامح وكلم بادب واحترام وخلى الكلمه الطيبه ذادك لانو القبر قريب
احبك الى درجة الموت ايها السودان الوطن الذى وهبنى شخصا يعلمنى الاغانى ويعطينى لحظات الامان الجميل
وبرضوا يا زول مجنونه عجبك ولا ما عجبك
وسلامى ليكم كلكم

سيد اللبن ما عندو غير الرجوع الى بيت الطاعة... يمسكو ساكواها ولا كلتشي ولا يراقبو المعز ما يتشربك تاني غايتو الله يسترها معاكم المعادلة صعبة

معتز صباح الخير عليك الله انت من ناس بنى وصيف سجمك وغضب الدنبا متحمدك انت من زمن سكوها
الناس مع المرعب سانى وسادومبا وكاريكا والمدينه وجع الوجع قال سيد اللبن قال

الحمد لله الذي جعلني مسلما ومشجعا للزعيم على امل توبتك وعودة صوابك من تشجيع الصفر الدولي...

سلامات العزيزه ناهد وانت تواصلين مشوار الخطرفه الجميل وحقيقه الزول لا يدرى عن ماذا يكتب وانت تاتين
بالعديد من المداخل التى يمكن للشخص ان يكتب فيها منعدة زوايا
لك التحيه وهاتى كل ما لديك من ابداع
مع خالص شكرى وتقديرى

لك التحايا استاذى وعزيزى عوض وانت ترد على هذه الخطرفات التى اعاهدك على مواصلتها لانها من خطرفات الزمان

الله يخلى لينا رمضان شهر البركه والتواصل والعلاقات الجميله بين الاهل والناس فى كل مكان شهر بشيل كل العيوب الماشا بين الناس
الما بتواصل ارحاما شهر والله يا اخوانى حلو جنس حلاوه
البنات ديل دايرات يصلن وين ربك عليم مالكن ومال خلقة ربنا خلن الامور لله والمكتوب من الله هى البتكون وخوفى خسارتك تبقا
خسارة مال وعمر خلى ايمانك بالله قوى
انتوا يا اهلى الحرابه الفى سوريا دى بتنتهى متين والزول بشار ده حكايتوا شنو ودينوا شنو ده من ياتوا كوكب وملعون ابو السلطه
البتخلى الزول يكتل ويكذب ويسرق ده سلطة شنو انشاءالله ما ترك
سلطه مبنيه على جثث ناس ياما كانو طيبين
وحليلك يا اميرنا احمد شوقى
قم ناجى جلق وانشد رسم من بانوا
فهى اليوم دمار وسجم يا سيدى يا جميل
اها اخبار زيادة الكهرباء شنو الناس ديل مالم علينا يعنى نوم ما ننوم ولا الحاصل شنو افيدونا افادكم الله
وتسلم لى يا انت يا الزول الجاب للدنيا الزوله
وسلامى ليكم كلكم

اخبار فتاوي الافطار شنو اتحركت من بورتسودان بلد الحر الشديد الى الخرطوم بلد الاسعار المولعة نارولا لسه؟؟؟ حليل الدكوة بالطماطم وجبة الغلابة ... كنت معزوم افطار والطبق الرئيسي طماطم ناضرة تسر الناظرين

موضوع: خطرفات زوله 4 الإثنين 30 يوليو 2012, 12:45 am

ورجعنا يا احباب للخطرفه والكلام الدقدق والماعاجبو ا معليش وتانى معليش
الليله عاشر يوم والجرسه بدت الناس هاك يا رش مويه ويا وجع كلى ومصران وقرحه الجرسه كترت ويا ناس
الله الصبر واليقين وين كلها ايام وتعدى ياما ناس صابره والله ليها
الحيكومه زادت الكهرباء وما معروف القصد شنو يا حيكومه الكهرباء هى الحياه وخلونا نحس بالانسانيه ولو مره
والدنيا رمضان ارحموا الخلق شان الله يرحمكم وتطلعوا من المحن الانتوا فيها

واتذكروا انو للصبر حدود يا الله ادينا الصبر
اها العيد قرب والحاله الاقتصاديه هى الفاصل والاسر فى زنقه الله يحلها ويحلنا من قبضة الما عندهم احساس بالوجع
برامج رمضان مملله جنس ملل مافى حاجه جاذبه كلوا بيقلد فى كلوا معقوله البلد دى بقت يابسه للدرجه دى
ما فى مبدع اموا دعت ليهو يطرد السجم البعملوا فيهو العاملين مبدعين ديل
وين الافكار والتجديد والروعه
الله نصرك يا هلالنا وانشاءالله دائما
وانا دائما هكذا ايها العزيز عندى ابحث عنك وانت معى فى كل اللحظات والدروب لاننى انثى امنت بك
الى درجة اللا رجوع فكن معى ولا تتركنى لهذا الزمن اللص النكبه فهل انت معى
وسلامى ليكم كلكم

*المتجرسين يسافرو بورتسودان..إفطار بفتوى...
*زيادة الكهرباء فى رمضان زيادة فى الأجر..معاناة..
*الشمولية عكس الإبداع والتجديد..رياء ونفاق..
*الموج الأزرق قادم...مندوكرو سوانى مريخابى ساكت كده..ياخ أنا ما عبدالحميد..
*الله يجيبو ليك سالم..

نخطرف معاكم ..
لطالما هناك اجتماع بين جرسة رمضان وجرسة الوصيفاب ..
علي كل لنا خطرفة :
رمضان السودان رغم ما به من الم لكنه جميل بالوان طيفه والتقاء الاحبة والاصدقاء فيه .. وليالي السمر ومشاوير ما بعد المساء ..
اما رمضان الدمام .. فهم وغم .. والم .. فلا صديق تسر النفس طلعته .. ولا خرابيط .. ولا خطرفات ..

ووبرجع تاني : بقول يا زمن ارحم شوية ..

يا زمن ارحم شويه
تحياتى للرائعين جميعا وهم يخطرفون خطرفة الجمال والبال الذى ينظر بعيدا
فلكم التحيه احبتى

عبد الرحمن موسي ادريس" ..
الموج الأزرق قادم...مندوكرو سوانى مريخابى ساكت كده..ياخ أنا ما عبدالحميد.

سلام يا عبدو ..أظنها بعض زهايمر..أو خترفات سااااي

جرستي في رمضان ..السنةدي ناس السودان ما رسلوا لينا (حلو مر )شفت الجرسة دي كيف

.. بالجد رمضان بدون آبري مسيخ ياخ .. رغم أننا إستعنا في الإجابة ببعض الأصدقاء

سلم لي عليهو أب صلعة دا

السلام عليكم جميعا وشكرا لخطرفتكم ومشاركاتى الخطرفات والعاقبه عندكم فى كل اللحظات

موضوع: رد: خطرفات زوله الخميس 02 أغسطس 2012, 1:20 am

و اصلى ياسيدة الخطرفات والألق...
علنا فى هذا الزمن الرمادى نبدع حالة صدق
وشفافية نحن أحوج مانكون إليها...

عجائب وغرائب فى بلد الحبائب عجائب فى كل حاجه من اعلاها لحدى التحت وعمال النضافه القالوا معتصمين
ومعاهم الحق لانهم بعملوا فى اوضاع اكتر من كعبه
وبعدين يا ناس ما كفايه علينا وسخ الضمائر
تشوف سوق امدرمان يجيك الاحباط اوساخ فى اوساخ الله يحلنا منك يا رباط السجم
والبغيظ يقولوا ليك عاصمه حضاريه يا خى امشوا بلا حضاريه بلا حراميه
والقنوات الفضائيه لا جديد سوى التكرار كلوا بكرر فى العندو وكلوا بجيب فى البعرفوا من زمن الطفوله حاجه تحير
وبعد ده كلوا يكرهوك بالتطوير والتعديل والترقيع عالم تقرف وتجيب الضغط والنعاس

وما هى الاخبار فى مصر بلد العروبه وما هو الذى يحدث فيه فى كل العالم تتشابه الخرفان فى افغانستان والشيشان
والسودان والصومال وكل البلاد التى كبرت فيها الخرفان يا خى الخرفان دقشت مصر واستوطنت
قال سيناء قال اللعبه معروفه يا زول يا مرسى يعنى شنو ما نحنا برضوا بنشاهد دراما مصريه
والله يعينك يا طنطاوى
شفتوا كيف برضوا بنعرف سياسه
ويا انت هناك انا شائفاك
وسلامى ليكم كلكم

شكرا ناهد الم اقل لك اننا افتقدناك
الجميل فى الخطرفات انها واقعية بتذكرنى بى ساخر سبيل للمبدع بحق جبرا
وجعنا مع عمال النضافة خليه ساى وزيدى على كده مطر يجى كابى ينزل فى تلال الاوساخ يجيب تلال ذباب لحدى المسا تستلم الوردية الباعوضة والنتيجة الحتمية بلا شك امراض واوبئة وربك يعين ،،،،،،،،،،،،،
اما عن مصر والاخوان ومرسى وطنطاوى يا بتى دى مناطحة تيران نحن غايتو بنتفرج وامريكا تحرك كلب الشطرنج محل ما هى عايزة وبرضو ربك يسهل
وقالوا بلد سياحى وجاذب ومشجع للاستثمار ونحن الموية عادى قاطعة والكهرباء كذلك وبرضو ربك يسهل
اها اقعدى عافية

شكرا يازولة ياسمرا يا.... واضحة
إنها حقائق وليست بخطرفات ... وزادها وضوحا
التحليلات السياسية والاجتماعية للسيدة أم تساب ....
مجددا لكنَ التحية ( ناهد واشراقة)ولاأدري إن كانت
كلمة "لكٌنَ" صحيحة ومتلائمة مع الميزان الصرفي
مع أن كمية الاوجاع والغبائن جعلتنا نفتقد التوازن ونعيش
في توهان مستمر,,,,,,,,,,,,,,,,,,,,,,,, وكونو بخير

شكراً ياأميرة...
مايحيرنى هذه الأيام الرقص والهز اللى ماشى فى البلد اليومين دول...
رقص وهز وصالات كيف... دقون ترقص..وأخرى تعرض...
والناس ياسادتى فى الإقليم الشرقى وبحر أبيض غارقون ومحاصرون بالمياه... من أسبوعين فى ناس فى العراء مالاقين ليهم خيام تقيهم شر المطر.. ولقمة تسد الرمق .. وماء صالح للشرب.. وناس الخرطوم هاك يارقيص ... وهشك .. بشك... ورقصنى ياجدع..

هناك المويه غرقت الناس ونحنا فى امدرمان بنطارد فى المويه تصدق
وهناك الناس محاصره بالمويه ونحنا محاصرين بالاوساخ تصدق وتسال يقولوا ليك نا س النفايات معتصمين
سلامى ليك يا ام تساب ويا الغالى عائد وابوى عبدالرحمن

جنس مهدله وجنس حب للممرطه ناس تخاف وما تختشى
ناس تابها مملحه وتفتشا قروض اتفاق النفط الذى فضح الكتير ما ياما صرحنا وقلنا وما خلينا قول وفى النهايه
رقدنا سلطه وهاك يا لتيق كالعاده فى الزمن الضائع واتعلموا من بحر الفشل الانتوا فيهوا
كان فى داعى لطولة اللسان والفصاحه الفى الفاضى
البلد دى مشكلتها كبيره فىها ناس فاهما وعامله فيها ما فاهما وفى ناس ما فاهما وعامله فيها فاهما
شفتوا كيف
المشكله انو ا اسياد الموقف هم الصنف التانى صنف الفشل والضياع الله يكون فى العون
تشوف حبيبى مفلس والناس الفى الكافتريات والارصفه تقول خلاص الاقتصاد اقتصاد السويد والناس دى بالا رائق
ولكن كلوا نفاق اجتماعى وكضب
يا ناس ارحمونا واحترموا الزمن قولوا هيا الى الكفاح وهيا الى العمل
شوف البت وقوة عينا وقفت فى نص البيت وقالت دايره ودايره يا بت عارفين العيد بس انتى ما عارفا حال البلد
البتحنن اى زول فى قلبوا رحمه تصدقى انو فى ناس قالت ووووووووب
ويظل النفاق هو الماشى بينا الناس تنافق الحاصل شنو
و يا دوب خوفة نيروبى راحت وكت شفتا بيت جدى الخليفه والطابيه والنيلين وجميله انتى يا خرطوم ويا زول
عليك الله والرحمه الفى قلبك ما تخلينى اسافر تانى
مع انك معى فى كل الدروب والمدن ولكنى اشتاق اليك والى حروفك التى فيها اعيش
وسلامى ليكم كلكم

موضوع: خطرفات زوله 7 الخميس 27 سبتمبر 2012, 11:25 pm

سلامى للناس كلهم القدام والجداد يا اهل المنتدى الطيبين وعليكم الله اخباركم شنو
والخبر الاكيد قالوا ليبيا فتحت وهاك يا سفر دكاتره ومعلمين ومهندسين وعمال يا ناس الله يهديكم
والله بالطريقه دى حتسافروا كلكم وتجوا تلقو الجماعه باعوا البلد يا ناس حافظوا على الفضل ما البلد بلدنا
ولا انا غلطانه لاعليكم الله انا غلطانه
شفتوا العملوا انصاف البشر فى البلد دى واحد بكره الانشاء ويجى يقول ليك انا صحفى ورئس تحرير وكضب كتير
وبكتب فى جريده رياضيه وفى شبهو بهناك عاملين فيها مشجعين وهاك يا تكسير
يا عالم اتعلموا الاستاد ذنبوا شنو دى بلدنا كلنا هلال مريخ ومورده
وكان ما كده والله بورسعيد فى الباب والموت بالمجان هو البلد دى وناسا ناقصين الله يهديكم اعرفوا ادب التشجيع
وخليكم عاقلين
المى حار ما لعب قعونج زى ما قالوا ناسنا
انت فى شنو فى اديس ابابا والله انا ما عارفه صدقونى بس الظاهر فى حاجات تحت تحت ولا كيف
شيل شيلتك بقيت للنص
ياجماعه خافوا الله فى اهلكم واولادكم وخلق الله وكلوا يشوف المكتوب عليه ويتذكر انو اى زول مسئول امام الكريم
كفايه استهتار كرهنا البلد نبقا جادين ونشوف البحصل شنو
يا زول يا زول كنتا فاكره انى بريدك براى بس لقيت كل الناس بتريدك لقيتك رفيق لكل الناس الطيبه
بس برضو ا انا اكتر زوله بتريدك والله بريدك جنس ريده

*يازولة يارايقة ..وينك...
* برضو الناس لو ما متضايقة ما كانت تمشى ليبيا...
أهو معاملة سيئة فى بلدك وفلس..أحسن منها معاملة سيئة بعيد وفيها حبة قريشات...
ولا ماكده.. معادلة جد صعبة...
*أديس أبابا..
واحد من خوازيق البلد الزادت وفاتت حدها.. وكلو بسبب التكبر وعزل المكونات الأخرى..
داير يعدلها جابها ضقلها يكركب..
* مايحدث فى ملاعبنا لايستثنى من الدغمسة الحاصلة فى البلد...
{التوم ود عم البصل}
*كسرة:
{كُفى عنى بعض جمالك هذا الساطع... كى أتمكن أعرف كيف أراكِ...

موضوع: خطرفات زوله 8 الإثنين 13 مايو 2013, 4:26 pm

يا ناس الله سلام الله عليكم وبالجد انا مشتاقه ليكم شوق شوق ناس كده راجين تدفق البترول بس انا شوقى ما زيهم
شوق بيتحدى زمن الاكاذيب والضلال
يا ناس سامعنى والله مشتاقين
وحات الله والرسول
وحات طيبتكم يا حلويين وسامحونى عليكم الله وما تزعلوا من غيابى الطال ما اصلى جيتكم شائله حنان الدنيا كلوا
ونبداء نخطرف ولا لسه
انت قصة الكويت حصل فيها شنو
هم صحى دايراين بنات حلوات وصفر ولا الحاصل كان شنو
بعدين مع حالة الرماد الجابوها الجماعه فضلت فى السودان ده بت ما صفراء
الله يلعن يومكم وتف على رجولتكم التى لا تشبه باقى الرجال انتو ما من البلد دى ولا شنو الحصل
وين اتنو من البدى وما بقول اديت من ساتر بنات الفريق اخو الاخوات فارس الحوبه
الله لاجاب ليكم باقى ويحرق عقابكم الفضل
انتو ام روابه مالا والبحصل كضب ولا صح وكان صح الرماد كال خشمنا نحنا ما جائبين خبر انو البلد جنينه وخفيرها حرامى
الله يحمينا قادر يا كريم
وياريت السنه دى مجانين الكوره وناس هلال مريخ يقعدوا فى الواطه ويعرفوا انو لمن زرعوا الفشل فى الدنيا زرعوه لينا انحنا
وهو منو فى الدنيا دى فاشل زينا
بس كيف نعرف الحقيقه
نحنا بشر زى الطير واخير الطير ماشين ساى بدون تخطيط والله يجازى العمل فينا ده لصوص الليل عبيد اليانكى
يالله بلا كنفدراليه بلا ابطال
وهو الالمان سابوا حاجه يطير برشلونه والريال
دايرين بلى فى زول حريف بلى ما هو شان تعيش فى السودان ده لازم تكون حريف بلى
او مافى داعى هو فضلت حاجه فوقكم ديل ناس فى انتظار النهايات والضمير
ويا انت منك تنتهى الريده وبعدك ريده جد مافى
اقيف ولا ازيد

موضوع: رد: خطرفات زوله الإثنين 13 مايو 2013, 8:41 pm

هي يا ناس البوست دا تذكرتي كيف
غايتو ماشاءالله ذاكرة سمحة شديد
ــــ
نسبة لطول البوست وعدد المداخلات الكتيرة غلبتني القراية
لكنو كلام سمح بدون شك
فتك عافية

الف سلامة وما تطولي الغيبة وخلي الخطرفات ترد الروح

أم روابة هينة تراها ولعت فوانيسه من جديد
الكلام في (المر) الكل يوم ميت في حتة!!
غايتو بقى عندو اكتر من سبع أرواح مع الرجافييين ديل..

» جاءتكم زوله
» اوصاف زوله
» زوله حنينه .. قلبها ابيض