بين امبارح وبكرة وبعدو

بين أمبارح وقبلو وقبلو
وبين الليلة وبكرة وبعدو
بركة موية
وسكين ميته
وصحن إستيل ممدود بالحيطة
وقولت اصحو الزمن إتاخر
الطابور الساعة تمنية
وبينا وبين المدرسة شارع
كان الشمس إحساسه طبيعي
وجرس الحصة بيرجف طالع
وكنا بنلقى عوالم سمحه
الأصحاب أصحاب بالجد
والبتشخبت لازم نمحى
وكنا وكنا بنجري ونلعب
وهسه بتلعب بينا الدنيا
بين اوجاع
وافراح مخنوقة
والأحلام الصبحت باهته
والأشكال الما مألوفة
مليون مجرى بصب في قلبي
مليون دمعه ومليون آهة
الأصحاب أصحاب في الهم
هم البلد الطالع عينه
هم الناس الواقفة بتشحد
الله يعينا والله يعينه
هم الغيم التخا من بدري
ونحنا القلنا عليو العينه
كل الناس بتشابهو جداً
طعنة خلف
ومغايس ألف
حس الخوف اليومي بيكبر
وكيس العيش للنفر الواحد
وربنا عالم وربنا شاهد
بالمسروق
ورفع الدعم عن المحروق
حجة قديمة
وصوت الحق بالزل مخنوق
وصوت محبوبي الأمل الفاضل
وحس محبوبي الحس العادل
قادر يمرجح حس الزيف
قادر يخلي قليبي نضيف
قادر يضحك
صادق وطيب
والأمال تتفرهد تاني
والاشواق الفي العينين
بكرة بتوصل ليك ياغالي
وبكرة ح نتلمى الاتنين