هي اطلالة زكريات عطرة وايام خوالي عشناها في زمنا كله فرح وضحك ومزاح قضيناها في مصنع سكر حلفا عالقة في الزهن لا تبارحنا فنزكرها عند كل شدة اوكرب من تقلبات الحياة التي تدور في دولاب من الحزن والاسي والسعادة والفرح هي زكريات تزول بها تلك الشدة اليوم نحكي عن شخص من ابناء تلكم المنطقة فتربي بها وترعرع ونال من فكاهتها وسكرها من عزب الحديث ولطافته وسرعة البديها في الرد الذي لا ينتظر ثواني معدودة هو رجل الطرائف صلاح سعيد عبدالله او ابو السوس او (اب صلعة)كما يحلو لشباب حي خمسين بيت فله من الطرائف ما لا يحصي ومن المواقف المضحة الكثير من طرائفه هو والمرحوم عوض القفلة نسأل الله له الرحمة والمغفرة انه في يوما من الايام وفي ميز حي المان الذي يسكن فيه صلاح وعوض القفلة في غرف مجاورة بينما حل الظلام وكل فرد لجأ لغفرته للنوم اذ بشخص يتاوه من الألم وينادي صلاح صلاح ففزع صلاح وفتح النور اذ يتفاجا بالاستاذ حسن الطيب او بسكوته امد الله في عمره وهو كان جارهم في الميز وتمدد في السرير لا اذكر ان كان مرضه ضغط او سكري فنادي صلاح سعيد عوض القفلة وقال له :خليك مع استاذ حسن ان بمشي اجيب عربية واجيك نوديهو المستشفي فاسرع صلاح الي حي المان و كان يهرول ما بين منزل عمنا محمد صالح بشير ومنزل عتيبة ويطرق باب كل واحد منهم وبينما هو يهرول نظر الي عوض القفلة من بعيد يقف في نور كشافة ويأشر له بايديه الاثنين في شكل تقاطع ففهم صلاح ان الاستاذ توفي بينما هو علي هذا الحال والحزن باين في وجهه خرج عمنا محمد صالح بشير قال ليهو :خير يا زول الحاصل شنو؟ فشرح له صلاح الحاصل وركبو السيارة واسرعو للميز فتفاجأ صلاح بان استاذ حسن حي ولكن يتألم فازعفوه الي المستشفي بسرعة ودخلوه للدكتوروبعد ان تحسنت حالته جلس عوض القفلة وصلاح في حوش المستشفي لوحدهم وقال صلاح لعوض بلهجة استغراب: يا زول انت قبيل مالك بتأشر لي ان الزول دا مات؟فرد عوض :لا انا ما قاصد ليك انو مات انا بسألك لقيت عربية!!!فتبسم صلاح من قصده فرد لي عوض :ديل ناس القفلة بأشرو للزول اللقأ عربية كدا بتقاطع الايدين والله خلعتني لي هسه ارجف قلته خلاص الزول دا مات بس نعمل الواجب نوديه المستشفي فضحك عوض @@@
موقف طريف أخر لي صلاح سعيد وفي رمضان كان فاطر معانا اسرة سيداحمد الحسن وكنا جميع الصف نفطر في جامع خمسن بيت وبعد الفطور ونحنا راجعين البيت تفاجأ صلاح بأن نعاله واحدة موجودة والاخري مبدلة فتعجب من هذا الامر وتنحي جانبا في حيرة من امره. سألته: مالك يا صلاح؟ فرد قال: في زول بدل شبشبي خلا لي فردة وشال فردة عشان كدا نحنا ما بنجي الجامع عشان الحركات دي احسن الزول يصلي في البيت .
سألنا الناس . يا اخوانا في زول بدل فردة شبشب صلاح دا ؟ فرد عمنا ابوزيد حسن علي فقال: ايوااا والله ما انتبهتا ليها .فرد صلاح دا البوليس بيعمل كدا الناس التانين يعملو شنو؟!!!!!!
صلاح سعيد فاكهة ميدان خمسين بيت وتمرين كرة القدم فتمرين يوجد به صلاح تتأكد انه حتمنا سيكون جميل وشيق وفي نفس الوقت تمرين جاد لان صلاح داخل الميدان جاد جدآ ففي يوم من الايام والتمرين مسخن اختلف وليد عوض مع شخص ما وكان وليد عوض وفائز الشيخ العبيد كثيرآ ما يهرجلون التمرين فيوما وليد ويوما فائز .بعد ان كثر الحديث من وليد اطلق صلاح سعيد صفارته واجمع ناس التمرين وبدأ يخاطبهم:ياخوانا ما ممكن نحنا يومي مع وليد وفائز يبيخو لينا التمرين عشان نفرين كل يوم ما قادرين نتمرن هي ساعات معدودة الناس ما قادرة تلتزم شوفو ليكم حل للمشكلة دي بدأ الناس يتشاورون ويتحدثون الي وليد وينصحونه ويرشدونه وبينما علي هذا الحال تحدث صلاح سعيد اليهم مرة اخري قائلآ:يا اخوانا شوفو وليد عوض دا مافي حل غير نمشي لي امو مريم عوض هي الوحيدة البتقدر ليهو كان ما قدرة ليهو نشيلو كلنا ونمشي بيهو البان ونقطع صيطان من شجر البان ونجلدو عشان يستعدل دا الحل الوحيد كان رضيتو بيهو يلاكم علي امو! فضحك جميع من في الميدان والجمهور وضحك وليد عوض وقال يا اخوانا انا خلاص استعدلته ما ببيخ ليكم التمرين تاني@@
وفي تمرين اخر كان اخونا الصادق احمد او الصادق الجامع نسبة لانه يسكن في الجامع يلعب في الجناح فتلعب له الكرة ويجري بها ويقدمها مسافة منه حتي تتطلع للاوت فصاح صلاح سعيد : يا الصادق انتا الكورة دي بتمشي بيها وين علي زريبة ناس يوسف كتائب العب الكورة دي جوا الميدان!!!!!
[b]
