أمثال سودانية

من

أكل دومى ولا تفاح الغير

كترت الطين في الكرعين ماببقي نعلين

ده كل عرفناا
اولاد ام خير اخير منهم الخير والخير اخير منه الخلا
ديل ناس منو يا العارفين هاها

يا الزول السمح تتمسح ذنوبك يا رب
والله كل ما افتح موقع السكرية ده والقاك خالف رجلك وتقول لصاحبن البريد الرد عليه
في انتظار المزيد كانك قعدتك ده ما بتغير
يا عمنا اتحرك شويه وخفف الالم علي

اسامه محمد خير جبارة كتب:

يا الزول السمح تتمسح ذنوبك يا رب
والله كل ما افتح موقع السكرية ده والقاك خالف رجلك وتقول لصاحبن البريد الرد عليه
في انتظار المزيد كانك قعدتك ده ما بتغير
يا عمنا اتحرك شويه وخفف الالم علي

الاستاذ الحبيب اسامة محمد خير جبارة

ازيك يا جميل .. يا اخ كل من الوسيلة ( مؤذن جامع السوق )

حسن دروشة .. دفعتي .. وكان الالفة بتاعنا .. وكل يوم يكتبني مهرجل ..

عوض .. اخي الصغير ..

وكل بقية افراد العائلة .. لكم جميعاً التحية والاشواق ..


وبجيك في بوست في الاجتماعي براااااااااااااااااااااااااااااك .. عشان ما نخرب البوست بتاع اختنا علياء ..

ِ شكرا جزيلا أختنا الراقية علياء على مشاركاتك القيمة...
وماأكثرها وماأروعها أمثالنا العامية لانها نتيجة لعصارة
التجارب والخبرات المكتسبة من مدرسة الحياة,,, واسمحي لي أن
ازيد عليها الاتي :-
(1) البيتو من زجاج ما يجدع الناس بالطوب
(2) شوكت الشقي في الكبدة تتلقي
(3) المجبور يجيب موية بروده
(4) جارك القريب ولا ود امك البعيد
(5) التسوي كريت في القرض تلقاه في جلدها
(6)الزاد كان ماكفي ناس البيت حرم علي الجيران
(7)اخوك كان حلقوا ليه بل راسك واقعد استني
( الحسنة في المابسواها اذية للسواها
(9) الحسنة في المنعول ذي الشرا في القندول
(10) المافيهو خير لي نفسو مافيهو خير للناس
(11) الشكية لي غير الله مذلة
(12)التسويه بي ايدك يغلب اجاويدك
(13)درب السلامة للحول قريب
(14) الما شفتو في بيت ابوك بخلعك
(15) الجمرة بتحرق الواطيها
(16) المابعرف شيلك بجلفقك ,,, خالص التحايا

تمشى تقع تمشى كويس(العترة بتصلح المشية )

{الداير الغنى يعمل حساب لفقرو}
{سيد الرايحة يفتح خشم البقرة}
{الكريم بأم عيالو}
{البجيك متحزم قابلو عريان}
{الشجرة بتقع على عروقها}
{الحارى ولا المتعشى}
{أرجى السفيه ما ترجى باطل}
{القلب كان غاب الجتة بالخراب}
{المكتوب فى الجبين لابد تشوفو العين}

{الفشَ غبينتو خرب مدينتو}
هذا المثل الحبيب ناصر قاله الإمام محمد أحمد المهدى
وهو على مشارف الخرطوم على وشك الدخول إليها عندما
بلغه أن بعض المجاهدين يقولون أنهم عند دخولهم الخرطوم
سيفشون غبينتهم ....وكانت هذه المقولة بمثابة الدرع الواقى
للمدينة من ماكان ينوى البعض القيام به...

{جارك القريب ولا ود أمك البعيد}
{القرد فى عين أمو غزال}
{كل زول يعجبو الصاريِهُ}
{الفولة بتنملى..والبقارة يجو}
{الجمل ما بشوف عوجة رقبتو}
{البيتو من قزاز ما يجدع الناس بالحجار}
{الكلمة الطيبة بخور الباطن}

أم جركم مابتاكل خريفين..

السنة دي امجركم بتاكل شتاء صيف والخريف الجاي ( امصلمبيتي ولا كتكاي زول) سلامات يامير

(فراق الطريفى لجملو) هذا المثل يضرب لمن يفارق شيئ عزيز عليه فراق لارجعة فيه وهو مثل مشهور فى السودان والطريفى هذا من أهالى منطقة الشبارقة شرق النيل بالقرب من مدنى على طريق القضارف
وقصة هذا الرجل أنه كان يملك جملاً عزيزاً عليه ويحبه كثيراً وفى يوم من الأيام إختفى الطريفى تاركاً جمله فى مربطه ولم يعود أبداً حتى اليوم..وسار المثل (فارق فراق الطريفى لجملو)..
أين ذهب الطريفى؟ هل تصدقون؟
الطريفى سافر من مدنى إلى سواكن فى أربعينيات القرن الماضى ومن هناك إتجه إلى طوكر للعمل فى الدلتا التى كانت تشتهر فى ذلك الزمان الزاهر بالحياة الرغدة والمنعمة ومستوى الدخل المرتفع للفرد وكانت قبلة العمالة وطالبى الثراء من كل أنحاء السودان بل وإفريقيا والعالم العربى..
نعود لعمنا الطريفى الذى عمل فى الدلتا وعاش مع أجدادى الأسفدة فى منطقة (موسى فنريب) بالقرب من مرافيت وبحسب إقامته الطويلة بينهم وخلقه زوجوه من إحى بناتهم وأنجب منها ولداً سماه (عبد الله) وهو موجود اليوم بطوكر فى العقد السابع من عمره تقريباً وتزوج من أهله الأسفدة وكون أسرة ورجع لأهله فى الشبارقة بعد وفاة والده الطريفى وأحتفل به أهله .وزوج إثنين من أبناءه فى الشبارقة مسقط رأس والده
وهو موجود حالياً بطوكر ويعمل مزارعاً متعه الله بالصحة والعافية ..
 هذه هى قصة المثل (فراق الطريفى لجملو}..وتحية خاصة منى للعم عبد الله الطريفى الذى تشرفت بمعرفته شخصياً فى طوكر عام 2010م فى زواج إبن أخى (خالد محمد موسى)

شكرا الحبيب ناصر على المرور والتعليق..

وشكرا لعبدالله الطريفى الإنسان البسيط الذى تقاسمته طوكر والشبارقة..
وشكرا لهذا الوطن الجميل ..