اللهيجة سكر

مساطيل قبضهم البوليس يعاكسو فى جكس..
القاضى سأل الأول : أحكى الحاصل:
يامولانا أنا قاعد مُرًخِم قدام البيت ..جانى الحبّة دا
وحديدة سنينة...بايتة فى الورشة..قال لى كيف ياأخو..مانهج
وهجينا..شارع ..شارعين ..الجكس ظهر..
نور طويل..نور قصير.. الجكس فصل..
ركنا الشارع... والنمتى كبس..إلتفت لصديقه..ولاكيف ياحبة..
رد صديقه... والله ياعبد جضمتو للطيش...

بالأمس كتبت فى هذا الموضوع بعض الخربشات
ولكن لاأدرى أين تاهت منى ... العامية السودانية
التى نحن بصددها ليست العامية التى كتب عنها
البروفسور:العلامة عون الشريف قاسم...
بل هى خلاسية ولدت نتيجة تطور المجتمع الحتمى
وإذدياد سرعة وتطور وسائل الإتصال...وظهور طبقات
متعددة فى المجتمع, وجدت ضرورة إستنباط مصطلحات
تتعامل وفقها ... ظهرت وفقاً لذلك مايمكن تسميته إصطلاحاً
لغة.. كلغة الشماشة...لغة الراندوك... لغة الحناكيش...لغة مجموعات الحرفيين
لغة السماسرة....لغة تجار المخدرات... هذه كأمثلة وليست حصراً إن صح التعبير.
المتأمل للعامية السودانية يلحظ فيها توسع وترادف ومعانى عديدة تصب فى معنى واحد
يصعب شرح المقصد من غير أمثلة :
زول يقوليك {جيت داخل توش}{قعد متحكر ومتوهط فى الواطة}{طار طير فررر}
{ختفو ليك ختفة حِدى}{جننو جن }{نبزو نبز مسح بيه البلاط}{زول ساكت قزاز فاضى}
لو تلاحظ الأمثلة المقدمة فيها تكرار لكلمات كلها تؤدى إلى معنى واحد...لاتجد هذا الغنى
والإتساع والترادف فى اللهجات الأخرى التى تنتسب للعربية... وهذه أعتقد تحتاج لدراسة وتعمق
من المتخصصين ...
ياعلاء غايتو تجيب ليك محن وتخلى الناس يلولو جناها...
هاك دى من لغة أصحاب الخيال الواسع..
واحد بالو طويل يسأل واحد..
- إسمك منو؟
- حسن دندش
-ساكن وين؟
-ساكن الديم
- ديم شنو؟
- ديم السلك
- سلك شنو ؟
سلك عجلة..العجلة عجلة كابتن
الكابتن كابتن فريق..الفريق فريق أول
الأول أول فصل.. الفصل فصل جامعة
الجامعة جامعة الخرطوم
الخرطوم خرطوم فيل
الفيل كبير.. كبير لاعب التحرير
التحرير تحرير عطبرة
عطبرة عاصمة الحديد والنار
النار نار بابور
البابور بابور بحر
البحر بحر أحمر
الأحمر أحمر شفايف
الشفايف شفايف بنات
البنات بنات كمبونى
الكمبونى كمبونى الحبيب
الحبيب بورقيبة
بورقيبة حاكم تونس
تونس الخضراء... خضراء دى ماسمحة؟؟؟
- خضراء دى منو؟
دى مرة حسن دندش..الساكن الد................
ونواصل .....

دفره شحمانه من الاخوه والاخوات المشاركات الموضوع دائر الزياده

واحد -(وريتونا الطفا النور منو) يعنبي عرفنا المستخبي

اتنين -(تشغيله) بعني كثره الخوض في موضوع واحد

وهلماجرا كفايه كدا بعدين تجي عا رف ياعلا ء الدين اي حاجة بدون تذكرة سفر مافي حاجة مجان سااااااااااااااااااااااااااااااااااااي نتابع ونفيدكم

بعض المصطلحات القديمة:
الفانوس: هو شخص ينتمى لمجموعة خاصة ولكنه مفلس دائماً
{الشيرنق حقو تعبان}ويقال له {الفانوس عدلو مشاويرو}
الكويتى: صاحب أكبر شيرنق وهو مميز فى المجموعة ومطاع
وله حيز خاص فى القعدة..ومن مهام الفانوس خدمة الكويتى.
النيجيرى: يأتى فى الترتيب الثانى بعد الكويتى.
الفراش:وهو شخص غير مرغوب فيه ومن خارج الشلة إلا أنه
يفرض نفسه عليهم{يسقط زى الفراش على النور}.
الكوكب:هو الضيف الذى لايساهم مع الشلة بعد إنقضاء مدة الضيافة{وهى يومان}

مامعنى الآتى:
الحنقوق:
دوا كلب:
الخوخة:
الأمينة:
الرامتوك:
الكَنيِف:
النُطُع:
العِقْا :
الشِبْرِيّة:
المخلوفة:
المحويب:
اللبّاب:
الضَنّاب:
ولكم كل الود

شكراً الأميرة:
على مرورك الرائع وهذا ماعودتينا دائماً أنتى المبادرة
بالنسبة لسِؤالك يمكن الإستعانة بأى وسيلة
بس دايرين مشاركة المغتربين لندرك مدى
تأثير الغربة عليهم حتى نكثف الجرعات
لدعم حبال الوصل بينهم وأشياءنا البلدية.
الإجابات ستنزل يوم الأحد القادم.
ولك كل الود

بكره ياخالد الحل
لكن مجهودك مقدر
ولك كل ودى

دايماً تأتى بالروائع
وتستشهد بالرائعين
شكراً الحبيب ناصر
وكلمة كنيف هى كما تعلم عربية فصحى
موجودة بكل المعاجم..ولكن كانت تستعمل
كلغة عامية فى منطقة طوكر ظلت فى ذاكرتى
منز الطفولة الباكرة..
ولك كل الود...

الله أكبر ,, الله أكبر
روعة وأصالة تجلت بمنتديات السكر ...
اليكم بعض من مناحة بنونة بت المك نمر والتي تغنى بها الكابلي أحسب انها مليئة بالالفاظ العربية الفصحى والمعاني ذات القيم التراثية النادرة
ماهو الفافنوس ماهو الغليد البوص
ود المك عريس خيلا بجن عركوس
أحيّ علي سيفو البحد الروس
ما دايرالك الميته أم رمادا شح
دايراك يوم اللقى بدماك تتوشّح
الميت مسولب والعجاج يكتح
أحيّ علي سيفه البسوي التح
إن وردن بجيك في أول الواردات
مرنا مو نشيط إن قبّلن شاردات
أسد بيشه المكرمد قمزاته متطابقات
وبرضع في ضرايع العنّز الفاردات
كوفيتك الخوده أم عصا بولاد
ودرعك في أم لهيب زي الشمس وقّاد
وسيفك من سقايتو إستعجب الحدّاد
وقارحك غير شكال ما بقربه الشدّاد
يا جرعة عقود السم
يا مقنع بنات جعل العزاز من جم
الخيل عركسن ما قال عدادهن كم
فرتاق حافلن ملاي سروجهن دم
***********
الفافنوس نبات رخو ينمو على ضفاف النيل ويسهل قطعه
الغليد البوص هي القصبة الجوفاء الضعيفة
عريس خيل كناية عن الفروسية وعركوس من الكثرة
الميتة ام رمادا شح كناية عن الموتة السهلة التي فيها البكاء والعويل
وذر الرماد على رؤوس النسوة
الواردات والشاردات كناية عن الكر والفر في ساحات الوغى
بيشة منطقة مشهورة بأنها مأسدة عرفت بضراوة سباعها
الخودة هي الخوذة وبولاد هي فولاذ
ام لهيب من اسماء الحرب
جرعة السم كناية عن البأس الشديد والفروسية منقطعة النظير
واخيرا الممدوح هو الستر والغطاء لكل بنات جعل تلك القبيلة
المعروفة بالكرم والبسالة والنخوة والتصدي للظلم

الحنقوق: هو الجزء التخين فى السعفة.
دوا كلب: المشلعيب{المعلاق}.
الخوخة: باب صغير بين بيتين متجاورين{وهى مستعملة بمنطقة طوكر الى اليوم}.
الأمينة: الشِعبة فى منتصف الغرفة لتسند المِرِق.
الرامتوك:نبات يسمى أيضاً أبو اللصيق..تقال للزول اللصقة.
الكَنيِف: دورة المياه وهى عربية فصحى {وهى مستعملة بمنطقة طوكر الى اليوم}.
النُطُع: برش الدخان.
العِقْا : براز السخل المولود حديثاً وهو أصفر اللون.
الشِبْرِيّة: مظلة توضع للنساء على ظهر الجمل للسفر البعيد.{شدولها الشبريّة فوق القِعيديّة}.
المخلوفة: سرج الجمل.
المحويب: حبل لربط أرجل البقرة عند الحلِب.
اللبّاب: حزام يشد السرج حول بطن الراحلة.
الضَنّاب: شداد السرج عند ذنب الراحلة.
------ ------ -----
مامعنى الآتى:
الركوة--البُخسة-- القلوبية--التمكة--الكوركى--اللدايّات--العَمَار--البِلبِلْ--الكركب..البُمبَارْ.
المرة دى إمتحان ساهل..
حتى الخميس القادم...
لكم كل الود...

ناصر البهدير كتب:

برضو ح نعافر يعني خالد براهو البقدر على العفار دا ان شاء الله نلقى لينا حتة (قرار) يا عبد الرحمن برضو ما خسرانين شيء والسايقة واصلة ما يقوم يطلع اللحم بتاع تيس فطيس على قولة البجاوي ..


الركوة: الابريق المصنوع من الفخار (ما انهشم ابريق الرضأ)
البُخسة: القرعة البخشو بيها اللبن.
القلوبية: شرك الطير (يا مهبر شرك الغير).
التمكة: البطيخة. {مكيال وهى تعادل الملوة}لغة أهل الساحل.
الكوركى: اسم غريب عموما لكن في طائر اسمه الكركي معروف. اوعا تقول لى قاصد دا عشان تمشي تمتحن في اسماء الطيور تاني.
اللدايّات: يعني منقد لكن من حجار زى تلاتة كدا مش كفاية يا خالد (لدايات شايك الرامى).
العَمَار: حبر الريشة التي كان يكتب بها طلاب الخلوة وهو مصنوع من الرماد.
البِلبِلْ: (دي بالذات ما لاقتنا).
الكركب: (دي على وزن القرقف يمكن تكون حلة حبش ما معروف).
البُمبَارْ: سجق رز يا عمي (مصران بحشو بالرز المتبل غايتو الاكلة دي عن بعض الشعوب ما عارف عبد الرحمن جابه يكون من قرورة).

التمكة: مكيال يعادل نصف الكيلة الإسم مستخدم بالساحل حتى اليوم..
الكوركى:الحطب الكبير الطويل كانت تصنع منه القطاطى {تتكون القطية من القش النال-الفلكاب-الكوركى}
البِلبِل: هو السفروك{عصا نصف دائرية وهى بلغة البجا ولكنها من الكلمات التى وجدت طريقها للدارجة السودانية كالمحويب مثلاً}
الكركب: حزاء للنساء كان ينجر من خشب اللالوب ويكسى بالجلد{القِد} يكاد يكون إنقرض الآن{الإسم دلالة على الصوت الذى يصدر منه أثناء المشى}
البمبار: هو المصران الكبير المكسو بالشحم فى الخروف {ويصنع منه القُرار}.
هايل ياناصر...خالد تعب معاك...أنزلت الإجابات لأن البهدير أجاب على اكثر من80% من الأسئلة...
لكن هاكم ديل:
التِيلة- السُومِيتْ-الحُقْ-السُنْكَابْ-الرَشَادْ-البَاسِنْكوبْ-الشَفْ-الزُمَامْ-القَشّةْ-الشَعْفُوفَة-أُم جَقوقَةْ-أُم تَكشو-البُودةْ-العِدْ..
ولكم كل الود

مشكور العم عبد الرحمن والمشاركين

اضيف قليلاً فمعني الشعفوفة ( البرد والذي ياتي بعد المطر مخلوط بالهواء البارد في فترة الخريف وقد يؤثر علي البهائم الهزيلة ان صح التعبير

شكرا وليد ... دعني أغالطك شوية ياوليد
(الشعفوفة) هي المطرة الغزيرة المصحوبة بالهواء .... أما البرد الذي يأتي بعد المطر فهو مايسمى ب (الزيفة ) ................ رأيك شنو ياأستاذنا في علم التراث عبدالرحمن موسى؟؟

كلامك صح ياهندسة عمك طش الشبكة

ام تساب كتب:

عمنا الامير اين انت سائلين عنك يوماتى رحيل
علاء الدين طشيت شبكة ولا الجاك جاك من الارض ابقى مارق
كل الحضور الانيق
تعالوا واثروا هذا البوست الرائع بروعة اهل المصنع
يلا بعضا من المصطلحات والبيعرفها المره دى عنده جائزة بس تابعونا وخليكم قريبين
الكتقة ،،،،،،،،،،،{باب من الخشب لزريبة البهائم}
الكُشر،،،،،،،،،،،،،،، {مفتاح من الخشب لقفل من الخشب فى أبواب السنط}وأعتقد أنها إنقرضت أو كادت.
اللقدابة ،،،،،،،،،،،،،،{راكوبة أمام الغرفة وتسمى أيضاً الكشاشة}
الجر ،،،،،،،،،،،،،، {الزِير}
الكبِد،،،،،،،،،،،،{الباب}
يلا مستنياكم

كده كيف ياأميرة...{عندى حبوبة شايقية}
مع كل الود.....

شكراً الأميرة أم تساب
لكن بصراحة أنا إستعنت بزميلنا المهندس
طارق الشايقى الذى إستعان بوالده فى الشمالية
مما يدل على أن المسألة ليست سهلة..أهنيك على
زخيرتك الرائعة فى أشياء التراث.وأتنازل عن الجائزة
لتساب وميزاب بمناسبة التفوق...
مع كل الأمنيات...

أحيكم وأشكركم جميعاً علي الإفادة ,ذكرتونا ما نسينا أو كدنا أن ننسى من الكلمات والعبارات الجميلة ,عمنا عبد الرحمن نعزف ليك نغمه بى الباسنكوب ونعرض ليك ونهز البلبل والسفروق والشوتال والسيف ونتمولص ونندق بى الجدوه تعبيراً عن شكرنا وسعادتنا بحضورك الأنيق ,مستلزمات الجبنة :- الوقاية -الحق -اللقولاب أو الشرقرق -اللداية محل توقد فيه النار للطبخ
أعرفو لينا كلمات من نهر عطبرة الكمروع -البغو -الكدمبس -السندقيقة -البرامه -القليبة -السعن -الخرج -المجوز-السحارة-الشقاقة -النجامة -السلوكة -المنتباب -الشنقليتة -الساسوية-المترار -البنيقه -الهمساسة -الوردة -الطرمباش

أعرفو لينا كلمات من نهر عطبرة الكمروع -البغو -الكدمبس -السندقيقة -البرامه -القليبة -السعن -الخرج -المجوز-السحارة-الشقاقة -النجامة -السلوكة -المنتباب -الشنقليتة -الساسوية-المترار -البنيقه -الهمساسة -الوردة -الطرمباش
الكمروع:
البغو: المريسة الخرج: من الجلد يجلب به الماء بالحمير المنتباب: الوردة:
الكدمبس: المجوز:صفحتين متصلتين ولهما غطاء الشنقليتة: الطرمباش:
السندقيقة:فى الساقية تشبه الترس السحارة:من الخشب تحفظ فيها الملابس الساسوية:
البرامة: الشقاقة: المترار:أداة لغزل القطن
القليبة:زى الخُرُج لكن من الخيش النجامة:أداة لحش النجيلة البنيقة:
السعن:إناء من الجلد يحفظ فيه اللبن السلوكة:أداة للزراعة اليدوية الهمساسة:
دى قدرتنا ياهيثم وأحيك على إلمامك بتراث منطقتك وأشياءها.

الشقاقة -اداة شبيهه بالسكين لشق السعف والسعف لمن لايعرفة هو ما يستخدم فى صناعة البروش والقفف والعتانيب
والعتنيبة دى ذى البرش لكنها ملونه وهى بت عم النطع ودا الما بعرفوا
لوازم المزارع :-
*النجامة :اداة لحش القش او النجيلة شبيهة بالمسطرينة التى تستخدم في البناء .
*السلوكة -اداة للزراعة تستخدم لحفر حفر صغيرة ترمى بها البزور تصنع من الحطب شبيههة بالسفروق مقوسة ومسننة
*المنتباب -هو شبية بالفأس الذى يكسر به الحطب ولكنه أصغر و أخف لانه يستخدم فى قطع الحطب اللين كالجريد والسعف وغيرة وهو سلاح المزارع *المنجل غنى عن التعريف كالمشار يستخدم لحش القش .
*-الشنقليتة :-هى اول مرحله نمولأشجار الدوم و النخيل عند خروج النبتة من سطح الارض فى شكل سعفة واحدة
*الكمروع:- هو ما يبرز من ساق النخلة من بقايا الجريد المقطوع سابقا ,يستخدم فى تسلق النخلة ولعل التسمية آتية من ان المتسلق يضع كراعة على الكمروع ليصعد النخلة
*-الساسوية فى الكدمبس -الساسوية هى قطعة الزجاج المكسورة -والكدمبس هى الكوشة أو مكب النفايات
*-المترار -إجابة صحيحة لعبد الرحمن اداه لغزل القطن او الصوف
*البنيقه - يعرفها الترزى فتطلب منه ان يخيط لك عراقى بى بنيقة ,لعلها قريبة من الياقة او اللياقة والله اعلم
الهمساسة -الوردة - شبيهتان فى المعنى تطلق على الحمي او الحمو أم برد مورود وعندى همساسة يعنىأعراض ملاريا
الطرمباش -والسفروك والبلبل بكسر الباء هى شئ واحد وهو عصاة مقوسة يتم إختيارها بعناية من أشجار السلم ويتم نحتها فى شكل قوس مسنن الأطراف وهى سلاح أرض جو لقبائل الشرق ومن جاورهم بنهر عطبرة والبطانة يستخدم فى الدفاع عن النفس والصيد
ويمتاز الطرمباش بسرعتة ودقتة فى إصابة الهدف .
البغو: هو ما بداخل الدوم الأخضر وليس الجاف الموجود بالسوق -الدوم الاخضر بداخلة ماء حلو الطعم وشئ ابيض حلو الطعم يسمى البغو فهو حلوى أطفال ذلك الزمان سعادتهم لاتوصف اذا احضر الوالد دوم أخضر لم ينضج .
الخرج: من الجلد يجلب به الماء بالحمير -إجابة صحيحة لعبدرحمن الخرج -والسعن -والقربة كلها من الجلد تستخدم لجلب وحفظ الماء واللبن وغيرة من السوائل .
*السندقيقة:هى كتلة خشب شبيهة بالتى يستخدمها الجزار لتكسير اللحم ( البرمة) ولكن السندقيقة يستخدمها صانعى حبال السعف فى مرحلة من مراحل إنتاج حبال العناقريب يسند فيها السعف ليتم دقة او طرقة ثم ترطيبة تمهيداً لفتله وبرمة ليصبح حبل (اخوكم حبالى قديم )
*السحارة:من الخشب تحفظ فيها الاشياء الهامة مثل الذهب والملابس -اجابة صحيحة لعبدالرحمن
*القليبة:زى الخُرُج لكن من الزعف فهى عبارة عن قفة كبيرة توضع على ظهر الحمار لنقل الرمل او التراب او المحاصيل وغيرة
مع تحياتى

والله ياأم تساب
غلبتنا بس العرجون باقى لى
نوع من التمر أو مرحلة من
مراحل البلح .نرجو الإفادة بالإجابة
ولك كل الود....

كتب علاء الدين:
وهنالك عبارت نستخدمها ولكن ما عارفين معناها والعارف يورينا ذي شنينة أم قرينات أو النيني اليشقك وختنو قرض ولحق امات طه قفاي اعوج والمكشن بلا بصلة ونرجو الافادة من عمالقة العامية السودانية
واحد رطانى قِح ومتشالق ياعلاء:
النينى اليشقك: النينى هو مرض يصيب الأغنام وغالباًيؤدى للوفاة.
ختنو قرض: دى شكلة نسوان جرى فيها سباب وكلام مر كالقرض وهو معروف بمرارته.
قفاى أعوج: قفاى تعنى خلفى وهى أن ماتركته خلفى من مال أو أسرة لايحتمل إبتعادى ويجب العودة بسرعة.
المكشن بلا بصل:وهذه صيغة مبالغة لأن الكُشنة وهى رائحة البصل المغلى فى الزيت لايمكن أن تتم من غير وجود بصل.
{أسع أقوم أوريك المكشن بلا بصل}مبالغة.... والباقى ماعرفتو ياعلاء.
بس هاكم دى!!!!
أكمل الجزء المشار إليه ب......... .
{الممعوطة ما ...........}{فراق الطريفى لى ........}{الجرب يطير........}{السايقة .........}{الفى بطنو حرقص ...........}
وكل الود.....

كتب علاء الدين
الممعوطة ما بتطير تأليف طبعا {صح 100%}
فراق الطريفي لجملهُ{100%}
الجرب يطير ما بيخاف من الهواء طبعا دي برضو مكنة مني{مابيمشى}
السايقة واصلة{100%}
الفي بطنو حرقص يمشي ويرقص {براهو يرقص}
وكل الود والإحترام والتقدير كمان
ما عارف .... لكن أول امتحان اشتغل فيه كويس ...
هايل ياعلاء معلوماتك ما تأثرت بغربتك رد الله غربة جميع الطيور المهاجرة
ويلا أحكى ليكم قصة {فراق الطريفى لجملو}
وبالمناسبة بمحض الصدفة عرفت هذه القصة فى {طوكر}
وهى قصة غريبة جداً والطريفى المذكور من قرية {الشبارقة}
شرق النيل الأزرق وفى الأربعينيات من القرن الماضى أراد
الطريفى أن يذهب للحج وكان له جمل قام ببيع الجمل فى {ودمدنى}
وسافر إلى سواكن وشاءت الظروف أن لايتمكن من الذهاب للحج
وكملت القروش فذهب إلى {طوكر} حاضرة المدن فى ذلك الزمان
ومقصد كل راغب فى العمل,جاء الرجل إلى {طوكر}وعمل بالزراعة
فى الدلتا مع أهلنا البنى عامر ومرت سنوات وزوجوه إمراءة وولد فيها
ولداً هو {عبد الله الطريفى} وتوفى وعاش {عبد الله}وسط أخواله وتزوج
وأنجب وعاد إلى أهله البشاقرة وزوج أبناءه من البشاقرة كما حدثنى شخصياً
وسارت {فراق الطريفى لجملو}مثلاً سايراً إلى يومنا هذا......و{عبد الله الطريفى}
مازال أمد الله فى عمره يعيش فى طوكر ويتحدث لهجة البنى عامر{التقرايت}
بطلاقة تدعو لللإندهاش خاصة من أمثالنا الذين فارقنا تلك الأرض الطيبة صغاراً
ولم نتقن لغة الأجداد ألا أننا نفهمها ويصعب علينا الرد بها يقولو علينا {رطانتنا مكسرة}
وبهذه المناسبة نوضح أن طوكر كانت فى ذلك الزمان مركز جذب للباحثين
عن الثروة والعمل فكانت كل قبائل السودان موجودة فيها وحدثت مصاهرات
عديدة فيها ربطت كل أقاليم السودان إلى يومنا هذا بطوكر وكذلك كانت فيها
جاليات عربية مثل الحضارمة أهل حضرموت واليمانية والمصريين والموريتانيين
وإلى اليوم موجودة فيها أحياء تحمل الأسماء العربية مثل {حى الشناقيط}{والبيوماب}
وكانت فيها جالية هندية كبيرة وبهذه المناسبة أنا شخصياً لى حبوبة تزوجها رجل من ضواحى
{بربر} منطقة تسمى{القمبرات } ورحل بها إلى أهله وأنجبت البنين والبنات وتوفت قبل أعوام بعد أن
شاهدت أحفادها وبنيى أحفادها رحمها الله صارت رابطاً قوياً بيننا وبين أهل {القمبرات إلى اليوم.
وبالمناسبة عمكم {الرزم} وكلكم تعرفونه كان تاجراً معروفاً فى طوكر قبل أن يأتى للمصنع وله أراضى
زراعية فى طوكر إلى يومنا هذا كما عرفت من إبنه {عثمان} و{سلمان أبو دقن}فى حلفا أيضاً كان فى
طوكر أيام عزها ...هذا قليل من كثير من شهرة هذه المدينة التى كانت معروفة فى بريطانيا فى الثلاثينيات
والأربعينيات لأنها كانت تغزى مصانع {يوركشير}البريطانية بأجود أنواع القطن طويل التيلةوكان هناك خط
سكة حديد فى فترة الثلاثينيات ينقل القطن من طوكر إلى المحالج فى بورتسودان...
ولكم كل الود.....