قعدة جبنه بمزاج

هذه اللوحة يانازك
فاقت القعدة بمزاج إلى حدود الإدهاش
التفاصيل مدهشة حد الروعة.
شكراً على الإختيار الراقى.
ولكِ كل الود.....

نازك يوسف كتب:

آآآآآخ يالجبنة ..
وياحليل قعدت الجبنة..
ياخ والله الواحد متقريف ليهو
لشمة قلوة..
جميلة هي لمة الجبنة بطقوسها الجميلة
والونسة ..
والأجمل يا نازك اللوحة المعبرة..
تسلمي ياخ ..

علاء الدين حسن بخيت كتب:

الفاضل زاهر
تحياتي ياجميل ... وتحياتي للرائعة صاحبة البوست الاخت نازك
وبمناسبة القريفة دي طبعا شكلها عجيب ووصلت بنا الى اقصى درجة , وعشان نفكها جربنا كل انواع المكيفات المباحة وما فكت , ما خلينا نسكافي وقهوة عربية وتركيه برضو ما فكت ... ربنا يرجعنا اهلنا سالمين ...غانمين ... ومتكيفين
هل تصدق اخي زاهر في أول اجازة من المطار طلبت من اخواني التوقف عند اقرب ست جبنة ولكنهم رفضوا وقالوا لي اصل البيت وخلي الشفقة دي

الحبيب علاء ..( كيفك)هههه.. عساك بخير ..
تعرف يا حبيب أنا مرة نزلت إجازة
وإتلحت ليك خالتي ( جبنة ) بعد المغرب ..
كانت لمة جميلة يا علاء .. فيها عجائز وشباب من الجنسين ..
ياخ الجبنة يقلوها ثلاثة مرات من زحمة الحضور ..
رجعت وخليت أولادي رجعوا بعدي .. خالتي شيلتهم
( جبنة ألمونيوم وشرقرق وفناجين )
ومن يومها يا علاء ..أنا أرسل لي خالتي في التياب علي الموضة
( جبنة بي شمالو .. فنجاني إنكشح مني .. البن البن علي وزن النبق النبق ) أها يا خوي أنا قريفتي طيرتها مني التياب .. هههههه

حاشية: أسماء التياب المعروضة في الرف الفوق دا .. لا وجود لها في الواقع .. فشنو والكلام للسيدات .. ماتحردن العشاء مطالبات بهذه التياب .. أنا غايتو أرضيت ضميري ..