إلا نحنا

موضوع: إلا نحنا الأربعاء 18 يناير 2012, 3:45 pm

الفاتح جبرا
في كل بلاد العالم توجد على الطرق الرئيسة خطوط عبور مشاة .. إلا
نحنا (تقطع الشارع وإنتا وحظك بقى)
في كل بلاد العالم يوجد ناطق رسمي واحد للحكومة إلا نحنا (أى مسئول يمكنه النطق )
في كل بلاد العالم يوجهك شرطي المرور إلى أن هذا الطريق إتجاه واحد إلا نحنا
(يخليك لمن تدخل) !
في كل بلاد العالم تستخدم الركشات لنقل الأغراض إلا نحنا (عندنا تستخدم لنقل البشر
والخمور كمان) !
في كل بلاد العالم لا تتعطل دواوين الحكومة عند مجئ ساعة الإفطار إلا نحنا (الفطور
وبعدين الشاي فالصلاة ثم .. تعال بكرة)
في كل بلاد العالم لا يمكن أن يزورك شخص في منزلك فجأةً إلا نحنا ويقول ليك (كدى
أفتح لينا التلفزيون نشوف الكورة) !
في كل بلاد العالم إذا قبض عليك تقود سيارتك دون رخصة قيادة تم إياقفك إلا نحنا ..
تدفع الغرامة وتمشى (ما الغرامة أهم من السلامة وكده)
في كل بلاد العالم يتم إستخراج الأوراف الثبوتية للمواطنين مجاناً أو برسوم رمزية
إلا نحنا تطلعا بالشئ الفلانى وتجددها بالشئ الفلتكاني
في كل بلاد العالم يوجد هناك أكثر من نادي قوي يتنافسون سنويا على بطولة الدوري
... ويمكن أحيانا لأندية متوسطة الحصول على اللقب ... إلا نحنا .. يا الهلال يا
المريخ (البقدر علي ملايين الدولارات دى منو؟)
في كل بلاد العالم رقم الإسعاف معروف إلا نحنا (تفتش ليهو فتيش ولمن تلقاهو يكون
المريض موضوعو إنتهى)
في كل بلاد العالم يتم تخصيص حصص للموسيقي في المدارس إلا نحنا (ومع ده عندنا
عشرين مليون فنان)
في كل بلاد العالم توجد لافتات توريك إلى اين تفضي بك الشوارع التى تسير فييها إلا
نحنا (لو عاوز تمشي حته فعليك الإستعانة بصديق) !
في كل بلاد العالم هنالك سلال لوضع النفايات على الشوارع إلا نحنا (ويقولوا ليك
هيئة ترقية السلوك الحضري) !
في كل بلاد العالم لا يمكنك صرف دواء من غير روشته (من الدكتور) إلا نحنا لأنو
مقابلة الدكتور (حكاية) !
في كل بلاد العالم عندما يستوقفك الشرطي فإنه يبتسم لك ألا نحنا فإنك تبتسم له (من
الخوف طبعن) !
في كل بلاد العالم توجد بالمدن أماكن لقضاء الحاجة (مجانا) إلا نحنا فإنك لا
تستطيع أن تقضيها (كان ما معاك حاجة)
في كل بلاد العالم لا ينصب شخص في وظيفة دستورية إلا بعد أن يمر مترقياً بعدد من
الوظائف إلا نحنا فيمكن ان تكون (دى أول وظيفة ليهو) !
في كل بلاد العالم تكافئ الحكومات المغتربين لدعمهم الإقتصاد ألا نحنا فالحكومة
(تطلع عين ابو اهل الخلفوهم)
في كل بلاد العالم يعتزل السياسيون في سن مبكرة إلا نحنا (كم وتمانين) ولسه عاوز
فرصة يحكم !
في كل بلاد العالم لا توجد شركات حكومية تدخل سوق الله أكبر وتنافس الناس إلا نحنا
أكتر من (500 شركة) ده غير (الرايحات)
في كل بلاد العالم يتم فتح ملفات الفساد والتحقيق فيها إلا نحن (نفتح ليها حفرة)
وندفنها
في كل بلاد العالم لا يسمح للوافد (بدون أوراق) العمل إلا نحنا .. شغالات ..
سواقين ركشات .. عمال كافتيريات والمسؤولين عاملين نايمين !
في كل بلاد العالم يستخدم أفراد شركات الأمن لحراسة الشركات والمؤسسات إلا نحنا إذ
تجدهم شغالين في الإستقبال (مع إنو ده ما شغلهم ولا مؤهلين ليهو)
في كل بلاد العالم تعمل السفارات على حل مشاكل مواطنيها إلا نحنا فسفاراتنا تعمل
على (شربكتها) !

في كل بلاد العالم تستخدم كلمات مثل .. لو سمحت .. شكراً .. متأسف .. إلا نحنا
(ليه ما تعرف)؟

في كل بلاد العالم يستغرق إنشاء جامعة عشرة سنوات إلا نحنا (ممكن نعمل عشرة جامعات
في سنة واااحدة)
في كل بلاد العالم الحرامي بعاين في الواطة إلا نحنا (الحرامي يعاين ليكا جوه
عيونك)
في كل بلاد العالم لا يمارس عملية التطبيب إلا من حصل على إجازة علمية وتم تسجيله
من الجهات المسؤوله إلا نحنا (ناس الأعشاب والشنو ما بعرف فاتحين ليهم عيادات عديل
كده) وكمان بيعلنوا في الصحف والقنوات !
في كل بلاد العالم يعتبر أغتصاب القاصرين جريمة توقع عليها أقسى العقوبات إلا نحنا
.. شهر شهرين سجن وكم سوط كده !
في كل بلاد العالم لن تجد في الصحف إعلانات لمرضي يطلبون من ذوى القلوب الرحيمة
التبرع لعلاجهم إلا نحنا (العندنا ديوان زكاة) !
في كل بلاد العالم توجد بين الأحياء مساحات يمارس فيها الأطفال والشباب الرياضة
والالعاب إلا نحنا (عملوها كووولها عمارات) عشان كده مش ح نتحصل على مداليات ولو
من صفيح !
في كل بلاد العالم توجد بالأسواق أماكن لإيقاف العربات إلا نحنا (لأنو المحلية
قاعدة تأجرها لبتاعين الطبالي وكده)

كسرة :
في كل بلاد العالم يمكنك معرفة مخصصات المسؤولين بسهولة إلا نحنا ما تعرفها إلا
لمن المسؤول (يتسرق) !

موضوع: رد: إلا نحنا الأربعاء 18 يناير 2012, 4:08 pm

تحياتي علاء الدين

وشكرآ علي هذه المساحة الجميلة

وعبرك التحية للكاتب السخر الفاتح جبرا

موضوع: رد: إلا نحنا الأربعاء 18 يناير 2012, 7:23 pm

اختيار موفق حبيبنا علاء الدين ...
والفاتح جبرا كعادته لخَص مشاكل البلد باسلوب
ساخر وجرئ ,,, وكعادتي دائما ماأستهل عموده
بقراءة " الكسرة " لما تحتويه من حكمة وحكاية تشغل
أذهان العباد , ثم اتابع بقية العمود ,,

بالله دا إسمو كلام ياعلاء...
وبرضو إلا نحنا...

موضوع: رد: إلا نحنا الأربعاء 18 يناير 2012, 10:05 pm

ما يصوره لنا الفاتح جبر بأسلوبه الساخر هو عين الحق بجد نحن معادلاتنا كلها مقلوبة تعليمنا مقلوب وبنقول ثورة تعليم عالى الصحيح ان تكون ثورة تدمير عالى ،،،،
الوضع الاقتصادى المزرى فالجميع يعلم بمدى تدنى الجنيه وضعفه امام العملات الاجنبية وهنا ياتى حاج ماجد سوار ليقول اننا امام تحديات اقتصادية وهذا اسم دلع جديد للتدهور الاقتصادى المريع الذى يعانى منه اقتصادنا المتهالك فمن قبل قالوا على المجاعة انها فجوة اقتصادية
برضو بنقول الله يكضب الشينة

موضوع: رد: إلا نحنا الخميس 19 يناير 2012, 2:46 pm

شكرا لكم اعزائي الكرام
زاهر... عائد ... عبد الرحمن ... اشراقة
وشكراً على مروركم الصادق ولكم التحية والتقدير جميعا
أولا اتفق معكم باعجابي الشديد عن كاتبنا المخضرم الفاتح جبرا فدائماً مقالاته الساخرة تحوي بداخلها رسائل قوية وتعكس أوجاع المواطن , ويقدمها لك في قالب كوميدي ليرسم لك البسمة المنزوعة والدهشة المتكررة في آن واحد ويعجبني في مقالاته انه لا يتكلف ويدخلك بصدق وعفوية ويشفي غليلك
ثانيا الصور المقلوبة والمتزايدة بمتوالية هندسية على المواطن المغلوب متى يمكننا ان نعدلها ؟؟؟؟؟؟

موضوع: رد: إلا نحنا الخميس 19 يناير 2012, 3:09 pm

يارب تتعدل

موضوع: رد: إلا نحنا الأحد 22 يناير 2012, 9:23 pm

سلامات اخ علاء ...الفاتح جبرا صحفي ساخر وجرئ..وانا بقول لماذا كل بلاد الدنيا تذكر المقامات إلا نحن نقول فلان وعلان وكأنهم لا يستاهلون شاهدوا تلفزيون العالم سوف لن تجد أحداً يقول فلان أو علان دون إعطائه حقه يكلمة أستاذ أو دكتور و و و ...

**كسره
أتفائل ياجبرا عشان ربنا يصلح الحال

موضوع: رد: إلا نحنا الإثنين 23 يناير 2012, 8:41 am

[quote="نازك يوسف"]

سلامات اخ علاء ...الفاتح جبرا صحفي ساخر وجرئ..وانا بقول لماذا كل بلاد الدنيا تذكر المقامات إلا نحن نقول فلان وعلان وكأنهم لا يستاهلون شاهدوا تلفزيون العالم سوف لن تجد أحداً يقول فلان أو علان دون إعطائه حقه يكلمة أستاذ أو دكتور و و و ...

**كسره
أتفائل ياجبرا عشان ربنا يصلح الحال

تفائل يا أستاذ Laughing

جبرا

كان الله يعدل الحال

كده كيف ؟؟

» رواح .. الروح ..
» العالية الامين .. عشرات حبابك