ما اجمل الاحلام ولولا الاحلام لضاعت منا الحياة هكذا نحن نظل ممسكين ومؤمنين بكل الاحلام الجميلة لانها وقود حياتنا البائسة
حقيقة الدنيا في وشا
يصابحك بالصدق ضاحك
وهي
معاني الصدق والامل الودر
بت بلد جابت بعانخي
وفيها نيل الكون سكن
ممشطه كان مشاط امي
وبتعرفني
تقول مني
كانت ضاحكة للدنيا
وهي المحتاجة يا غنيه
هبشت
واتفرهدت
واتوكلت
ما فضحت الحال التراب
وهي المكومة تحت خراب
ما قالت الحق غاب وضاع
او سلمت قاصدة الضياع
ما اصلو البت
سلالة ناس
يقينا الحق اكيد واقع
ولو طالت ليالي الزيف
ليالي الحسره والمحقه
ليالي الذلة والتنكيل
اكيد بشرق صباح النور
بعد ما قلنا يا الله
وكسرة خاطر الطيبين
قامت فوق
وهي كانت فوق
معزة وعفة ما بتموت
لمت للصغار قرشين
وقالت هيا للتعليم
عشان درب الخلاص ده يبين
وهي كانت ام
وكانت اب
شقيقة وخال
زميلة وفال
ودرقة تصادم المجهول
وبت عامل حياته كفاح
بدفق لغاية الموت
وكانت في الحواري زمان
بتلعب زي لعبنا كمان
الا اللعبة ما تمت
ولسه القصة في الخاطر
وهي كان مجروحة يا ناكر
ويا واقف
وسارحة دوام مع الحاصل
حكاية سفرة المريود
وحق المويه والصابون
ايجار البيت
جنيه طباشير
وتصريح الشغل والبيع
وعلاج الوالدة
لو هي تطيب
وهبت صايحة يا ساتر
وستر الحال
وساعد زول ضعيف ساهر
وهون كربة الايام
واتشابت على الاوجاع
وقالت كلمة ضائعة زمن
كل يهون
لو العزة موجودة
ودمعة خوفنا مخنوقة
ولو الدم
بشيل ويجيب
