[font=Arial][color=green][b]
أن تنقل قناة فضائية عرس زول لا مشكلة....
أن تشاركه وتشارك أهلو الفرحة لا مشكلة.... أن يجيبو لينا فنان في العرس
المنقول و يرفع لينا الضغط والسكري ويتور علينا القولون..ويصينا بالشلل
الرعاشي لا مشكلة... أن يتوسط زول عند أسياد القناة عشان ينقلو عرس ود عمتو
لا مشكلة.... المشكلة وكل المشكلة أن تشارك القناة بكل عدتها وعتادها..
وإمكانياتها. ومذيعينها ومذيعاتها... وكل الطاقم.. في عرس مكاواة... نعم
مكاواة واضحة وبينّة وما دايره ليها رفع ضو... العريس يشبّح إيديهو ويرفعن
قدام الكميرا عشان يوري الحنة... ويجي ويقول دي ما أول مرة اتزوج.. لكن
عرسي دا عن حب.... ويرقص بكل ما ربنا ختا فيهو من عضلة ولحمة وشحمة..فيهتز
مكاواة.. ويرقص غاظة... ويدخل إيديهو ثم يهزهن داخل جلابيتو المطرزة..مع هز
الرقبة قدام الكاميرا... الجلابية التي خيطت مخصوص لهذا الزواج
المكاواة... ويتعمد أن يرقص أمام الكاميرا كأنو بيقول لي زول ووووووي عرسنا
فوقك!!!!... مكاواة لمرا تانية.. والنضم دا واضح.. من تعليق أخوات
العريس.... الواحدة فيهن صوتها راح من كترت الزغاريد.... زغاريد
المكاواة...وتجي تقول والله فرحانين..جنس فرح ما يعلم بو علا الله...
و(بركة يا يمة العرس البت البنحبها وتحبنا) وفي سرها تقول ما زي ديك يا يمة
بركة العرس فوقها قليلة اللدب الما عندها سعلة في زول!... و(البتحبو
ويحبها.). وفي سرها تقول يايمة ما زي ديك الضوقتو المراير وكرهتو عيشتو..
زعلني جداً استغلال العروس الجديدة لمكاوة انتاية أخرى... ربما يكون العريس
اتزوج عليها...أو تكون مطلقة تعاني من آثار واحباطات الطلاق... أو مغصة
ونار الضرار.. التي زادها اشتعالاً... النقل الحي والمباشر للزواج
عليها....والعروس الجديدة مصنقرة في الكوشة مهجومة ومرجومة من البي يسو
فيهو ناس العريس ديل والخلعة باينة في عويناتا والخوف يا غالي تطلع العروس
الجديدة ازفت من المرا الأولى و من باكر دي تركب ليهم وش الككو وتقلب ليهم
الكرتونة ويقولو يا يمة يا حليلا ديك وبري بري نضر دي أصلو ما شفناهو...كما
زعلني استغلال القناة الفضائية وزعلني أكتر استغلالنا نحن والذين اتهجمنا
نحن جماهير المشاهدين لهذا الزواج الضرار.... وبقينا مندهشين...ونضرب أخماس
في أسداس... لكن للأسف اتعاطفنا مع الذي كان مستهدفاً من هذه
المكاواة...مهما كان سبب زواج العريس المكاوي دا... ما مفروض قناة تعتبر
الأولى من حيث المشاهدة... أن تشارك في هذه السخافة.. وأن يضعو في الاعتبار
أن الطرف المتضرر أيضاً من مشاهدي القناة...وما يفتحو باب زي دا... باكر
والله ما يتقفل وتُستغل القنوات الفضائية وبرامجها الجماهيرية لتمرير أجندة
أقلها ما شفناهو يوم الخميس الفات.. الليلة يا حليلو الفرق الحبان أنا
تومي يا حليلو!!.......
قفل الباب:-
قل لها .. إنّه يفيق على جرح وتغـفـو سنينه فـوق لوعهْ سكب الدهر من أساه
رحيق فـتحساه جُـرعة إِثْـر جُرعه قل لها .. إنه يهيم .. وأخشى أن تواريه
رحلة دون رجعه[
كاتب الموضوع
د.عادل الصادق المكي
