مرثيـــة المرحوم (حميد)

شريان الشمال أحزَن لِي يَتَّم زي قِبيل
قَبلَك شَال سَمِيك يا خِلِّي وَلَداً كيف عَدِيل
حميد سيفي وضُلِّي في الزَّمن البَخِيل
دمَك فوق دِماهو يَصَلِّي سجدْات الرَّحيل
يرشَح بالمِسِك ويَجَلِّي بوحَات يوم تَسِيل
... يا ريتني وعَساي ولَعَلي لو يا ريت تَقِيل
يوم اليوم فَديتك خِلِّي لو كُنت البَديل
نحلَم والقَمر مُتجَلِّي بالزين والعَديل
لكن القَدر ما بخَلِّي للأحلام سَبِيل

انهد حيل سقف الصبر واتنسل شعاع خيط الشمس وبقت الشمس محلانى
اليوم وقعت حيط البيت القديم اليوم يبست شجرة الشعر وانتحت صفق حلو الكلام
اليوم قبض ملك الموت روح الوزن المقفى ورملت حروف القصيد وضاعت احلام الغبش المدردحين
اليوم دفعت البلاد اغلى ضريبة واكبر ايصال لشارع الشريان وجفت شرايين القوافى واتوسدت الحاج يوسف
اليوم رقد على الحاج يوسف اغلى زول مات واتفكينا عكس الهواء وبتنا من بعدو القواء
اليوم رحل السمح الفنجرى القدامى المامون على بنوت الفريق بهار ملاحن والملح
الدغرى يا دخرى الطيابة المافك ريقو من الغلابة وكلو صح

اليوم حزب الغلابة يفقد نصفة اليوم انطفأت نار حدادة حمتو وماتت مناجل المواجهة
وانكسرت الطوراى وجفف مداد الشعر ويبس بحر الكلام وانصف سامر الحروف
برحيل حميد انسدت كل دواوين الشعر وعشش العنكبوت على جدرانها واكلت دودة الارض اسقفها

لا حرف يوفى ولا كلمة ترتقى بنا الى سموك ولا شئ بعدك يكون
غير نفوس راضية بقضاء الله وقدرة والحمد لله
انا لله وانا االيه راجعون

ربنا يتقبلك يا حميد قبول حسن ويغفر لك بعد حروف اشعارك وبعدد كلمات كتاباتك
وبعدد اى زول قراء لك وبحجم الدموع السكبت هذا اليوم واكتر واكتر
تبقى حيا فينا بكلماتك وبا شعارك

شكرا جزيلا فواز الدويد على هذه اللقطة البارعة وانت تتحفنا بالعضم الشاعر خليفة ذلك الشاب المبدع ..
لقد التقيته فيما بعد فترة منتصف التسعينات في بورتسودان واستمعت اليه عن قرب ..
والف رحمة ونور على الراحل المقيم حميد ...

الشكر لك الجميل فواز وصار الكلام من بعده اوهام وصار الحلم كوابيسا واشجان
وماذا سنقول فى الذى طوع القول ونسج منه عباءة احلامنا المقتوله فى من كان يصبر والدنيا ويل
واليس هو من قال
نسمه نسمه يا رب هبوبك
من شمالك او جنوبك
انه والد وناصر الطبقه العامله نبض الارض حراس الحق انه الولد المو عاق الولد اللاسرق لاخان
انه دليل الحق الاتى
ومن بعده لنوره حلابة اللبينه وست الدار وقاسم امين والذى يمشى بيننا العم عبد الرحيم
بكيت قبل ايام ومن قبلها بكيت وانا اشاهد الجموع المحبه لمنجم الكلم الجميل وهى تحضر
من اجل المشاركه ولو بالقليل
فحميد هو النبع الذى كان يمدنا بالثبات ونحنا نصادم فى السكه التى علمنا ايها كان منا ونحنا منه
هو صديق الثوار وحارسهم فى ظلمة الزنازين الظالمه وهو قوة دفعهم الكامنه لانه حميد التربال العامل
المناضل الصامد الذى لم تغيره العمارات الشوامخ والاسامى الاجنبيه
له الرحمه ولنا الصبر النبيل

شكرا فوَاز وشكرا لكل الاخوة المتداخلين.......
بالأمس القريب استمعت الى كلمات من الشاعر
محمد طه القدال في حق رفيقه الراحل حميد في قناة الشروق ,,,
( وكثير من الناس لايعرف أن حميد رجل صالح,, كان يعطي
للجيعان لقيمة ,, وللعطشان جغيمة ,, وكانت له اسهامات في مشروعات خيرية لاتحصى ولاتعد ويمكن وصفه بمنظمة
طوعية متحركة )....
ألا رحمة الله على فقيد الشعر والانسانية محمد الحسن حسن سالم حمَيد...............

ان حميد هو نبع الانسانيه الذى لا ينضب وهذه هى الحقيقه التى لا تحتاج الى
تاكيد ايها الرائع باشمهندس عائد السيد وهذا ما يعرفه كل الذين كانت لهم صلات
ومواقف مع الراحل الانسان ومن المواقف التى اشهد عليها واقسم ذاك القسم الصادق
موقف كنت انا من ضمن الحاضرين له وهو انه وايام الدراسه بمدينة سنار دخلنا الى الجامعه صباحا وكنا فى
حيره من امر الشاعر الذى سيكون ضيفا لاحتفالات موسسة الجالوص الثقافيه ونحنا فى هذه الحيره جاء الخبر اليقين
فى اتصال من دكتور جعفر يخبرنا بان حميد فى طريقه من الدمازين بعد المشاركه فى تابين الرمز بادى
وهو الان ذاهب الى الخرطوم فخرجنا انا وصديقى الشاعر الكتيابى الصغير ودكتور زهير ونحنا تسبقنا
الدهشه والشوق الى جمرة نضالنا الوقاده حميد ووصلنا الى صينية سنار ونحنا نترقب ظهور التربال الزميل المعلم
حميد وجاء وتسالمنا بكل الاشواق وذهبنا لتناول الافطار ونحنا على ذلك كانت يد حميد لا تتوقف عن العطاء لكل سائل
وفى ذلك اليوم عرفت حقيقة حميد الفكره تحدث معنا حديث الاب مع ابنائه حديث المحب لاحبابه ووافق على الذهاب
معنا دون تانى او تعجيز ورفض النزول فى اى مكان سوى الداخليه لانه يعرف ما نعانى منه فى ظل هذه الاوضاع
التى كان يسميها اوضاع السجم وكانت ايامه معنا من احلى الايام جملها حميد وما يفعله من فعال انسانيه ظلت خالده فى الذاكره له الرحمه والمغفره والى جنات الخلد حميد مع خالص احترامى

مرثية الشاعر الراحل محمد الحسن سالم حميد..
للشاعر محمد خير درو..
تبكيك البلد بى حالها
من جواها حرقة والم
ومنو الماصبه دمعو عليك
حد الرعشة واتالم
منو الما اسودة وجهو لبس
ملامح مكن كأبة وهم
نصب مابين ضلوعو خيام
يقيملك للابد ماتم
هم فوق هم بنبكيكا
اكتحلت عيونا سام
طبيعة الهم يكتل الزول
اذا ما مات امامو عشم
نبكي عليك دموع نحتت
على صفحة وجوهنا وشم
ولو يشفع بكانا عليك
بكيناك بى دموع الدم
الله يارحيم القلب يا انسان
ياخاتم الشعر والنم
قفلت بيوت شعرنا حداد
وشل مفتاحها واتقدم
سبتها فى مهب الريح
وامواج البحار الكم
اذا ما انقص مرق القول
بيوت اشعارنا تتهدم
&&&&&&&
يا شمعة كملت بالرياح
تنزف دموعها حروف دهب
مهديه للينزف جراح
ومدخورة للزمن الكعب
علمتنا الحب والسماح
وكيف ننتفض ساعة الغضب
اختر تعوم عكس الرياح
وبيناتنا تختار التعب
رافض معيشة الارتياح
ماغرتك اعلى الرتب
لابس قضيتك زى وشاح
وقابض عليها لهب لهب
مؤمن بانو الفجر لاح
ما دام ضياء نجمو انسكب
لابد لليل من صباح
ولابد للجب من عتب
صدقت نبواتك بطاح
كانن خلاء وعمرن قصب
بيوضه ضوت ونورة لاح
برسيمه نور وانجلب
يازول موسم بالصلاح
لاغش نضمك لاكضب
وطنك تضرى مع الرياح
نفسك يطير منو الكعب
نفسك تستفو بالسماح
والالفة بين زنج وعرب
ونفسك تضمدلو الجراح
وتمسحلو دموا لانسكب
وكل مايميل بالرياح
ترفعلو ايديك زى شعب
فايتنا وين ريح العوارض ولعت
وعش العصافير اتخرب
بين مطرقة نوبة
وزنوج وسندان عرب
اتقسمت غابة الطيور
اتوزعت رقدت حطب
اتعلق الموت فى الرقاب
والحله صانى كما الترب
مين تانى يقوى على الحروف
ويملاها بالحب والغضب
حرف الجسارة وراك مات
وحرف النضال ما انكتب
وعلى قدر مايبخل زمن
ويضيقبنا الحال الكرب
نخلة غناك نهزها
اجوادة بالضل والرطب
الله عليك ياامير
الحرف والقول والادب
تفيت على اليبخس غناك
وتبت يدا العاداك تب
زى حبك الناس لو تحب
هذا البلد ما اتنكب
فايتنا وين يازول حنين
طلقة حروفو غضب غضب
فوق حالها تتمدا وتنوم
لاتمشى لاتختى العتب
حلفنا مانسمع غناء
من فت مانسمع شعر
نقفل اضانا من الخطب
خطبا تودر مابتجيب
غير الهواء وعوج الحطب
وكل الشعر اصبح
وراك كاويق قصب
وحتى الاغناى بقت كتر
متل الضريسى تقوم حرب
غناء فيهو حاجات مؤلمة
لاعندو دين لايرضى رب
لاتعاليم من قبيلة
ولا فضيلة ولا احترام
كل الخلق مملولة فى العشق الحرام
دا زمن مهان انسانو ميت ومستهان
لا انت زاتك تشبهو
لانحنا فيهو بنشبهك
شتان ما بيناتنا يا انسان
شوف الناس بتعشق ايه
وانت عشيقتك السودان
وشوف الناس تفكر كيف
وفكرك بالوطن مليان
وشوف الناس بتملك ايه
بيوت وفلل دهب كيمان
وملكك كان عشق وطنك
وبيوت الشعر والاوزان
وملكك كلو حب الناس
ايد ممدوده للالفه
وايد مخفية للاحسان
معروف بالكرم يانيل
قدر ماضاق روئ العطشان
فى ناس اتوزعت حقك
وحق المهمل الغلبان
شتت الهموم للناس
وقسمت الوطن كيمان
جيوبهم يوت ملانى قروش
وجيبك بالقناعة ملان
اذا قول الحقيقة جهاد
فى وجه السلطه والسلطان
عمرك كلو عشتو جهاد
عشان وطنك كما الاوطان
يبقى معافا يبقى شديد
وارضو وعرضو يبقى مصان
ايا انسان على مر الزمن تاريخ
يضل حرفك شموخ نخلات
على تقنت اراضينا
يظل منحوت على الابواب
وفوق حيطان بوادينا
يظل مرسوم بحبر الدم
على راحة ايادينا
حمامة ترك على الاغصان
وفوق دوحة اغانينا
ومحل ما نمشى نلقاهو ويلاقينا
يبهر فى سمانا نجوم
يهدهدنا ويصحينا
ويفرحنا ويبكينا
ونبكى وبى اسف مفضوح
على حيبة امانينا
ونبكى عليك يا انسان
سكن فطن القلب فينا
&&&&&&&
حقيقة حروفنا خجلانى
ومنكسة راسها جم قولك
وكل القلنا ما حيساوي
واحد بيت شعر هولك
تزرع وتسقى طول اليوم
تحاحى وحارسو قندولك
تقيب قبل الحصاد وتفوت
تفوت والناس ينادولك
تفوتنا ونحنا مقهورين
يضمنا بيت شعر هولك
نكون قصرنا يا انسان
اذا اهملنا محصولك
&&&&&&&
منو البر الوطن غيرك
منو البى عشقو كان مجنون
كم لبيت نداء وطنك
لا اتخازلت لاحاتخون
وقفت على التماس وامامى
فى عز الحرابه كتال
وقت كملن رصاصاتك
سليت حرفك المسنون
منو الزيك نلت رضاء الوطن يازول
دفعتلو عمرك المكتوب
وقت روح رويتو بدمك الدفاق
لى عزة ترابو تصون
بينك وبينو كان الريد
وكان الالفه والاشواق
وكان اكبر من الحب التقتلو ظنون
عشت معاهو ابسط حال
ومت عزيز بسيط الحال
ومعاك ماتت بساطة الضوء
وجسارة السرة
وعزة عبد الرحيم وفطين
الله من القدر الوقع
فرزعنا زى فلعت حجر
فى صير قديم
افراحنا زي ورق العشر
ضاربى الخلاء ووجه الاديم
حتى اليجيبنو الصدف
شاحب مكندك وطعمو نيم
اتحتت الامل النضايربو الحياة
وراكزنبو حيل
ابا ما يقيف ابي يستقم
لاحولا يا الحزن الشدهنا
وسكن دواخلنا ومقيم
سعة القلوب مابتحتمل
زى مر فجيعتك ياشهيد
وحزنا اكبر
من نسمى حزن اليم
دا حزن مؤبد ومستديم
&&&&&&&
تنز كل الحروف دمعات
وتفوح كل الاغانى شجن
وقدر مانحنا غنيناك
نلاقى حرف غنانا اللجن
ولابشبه حروف انسان
يمجد بى غناهو وطن
يوالف بى غناهو الناس
ويصالح فى الحرابه زمن
ندي كلماتو لامن مات
يرش نيران حروف بقن
يكورك ونحنا مشدوهين
هموم وظروف وغفلة وظن
فيا انسان اذا فقدك حزن ابدى
دخلنا جراح واستوطن
اذا اتشتتنا ما اتلمينا
فى واحة غناك طيبين
مامعنى حياتنا اذن؟
نسكت روحنا من النوح
نلاقى عيونا تانى بكن
نعاين لى مراكبك ديك
لافردن شراح للريح ولا عدن
نعاين ويمتلكنا الخوف
تكتفنا اليالى حزن
يا انسان عيونا الراح
بين الضفة والرحراح
لاقمرا وراك بهر
ولانجمات صباح ضون
اذا ما الدنيا ضاقت ليل
وصبحنا بلا ملاز وطن
اكيد يالطيب الانسان
بيوت شعرك مفتحة
للغلابه سكن
ومفتحه للفقارة سكن
ومفتحه لاتعابة سكن

الشكر والتحايا لك استاذنا البهدير والتحايا للرائع جدا جدا المتفرد محمد خير
فمن حقه ومن الواجب عليه وعلى كل المحبين الذين يعرفون قيمة الانسان حميد
من حقهم ان ينثرو الدموع والاحزان
فدموعنا التى نزلت من اجله لن تتوقف بعد وستظل تجرى عليه كلما مرت الايام

» المرحوم محمد ابو عنيبة
» عزاء آل المرحوم علي سليمان
» عن حميد
» نعى أليم
» أفراح آل المرحوم عبد الحفيظ الطيب