ســـــــــــــودانيـــــــــــــــــة

ربنا جابك ســــودانية سمحة وجدعة وبت تتراد
في عينيك براءة اطفالنا وفرح العالم بالاعياد
بس تتخيلي ايه البيحصل لما يقابلك زول رياد
انا فتشت في كل الدنيا زيك وين في ياتو بلاد
واي افق يرتادو خيالي القي اوصافك منو بعاد
وقبلك كم محقنا عمرنا وقلنا القسمة والله اراد
وبيك الله عوضنا صبرنا وبقت الطرحة نصيب ومراد
خوفي عليك من خوفي عليك وعين خلق الله والحساد
وخوفي عليك من فيض اشواقي ولهفة قلبي علي الميعاد
ويكمل ليلي الاقي صباحو ولسي برتب في الاوراق
شان تتحقق اجمل منية ولي تكوني ام الاولاد
ربنا جابك ســـودانية سمحة وجدعة وبت تتراد
انا حسيت من اول نظرة بحن لي حضنك زي الشافع
وما بتحمل بعدك لحظة ومشتاق ليك وروحي تنازع
واتاكدت انا من يوم داك اني في حبك واقع واقع
وانو معاكي عديلي الخطوة وبيكي بلازم حسن الطالع
مابتزكري يوم لاقيتك واتخللننا في لحظة بعضنا
واداخلنا زي الوان قوس قزح الرائع اتقادمنا
واتقاودنا الروح في الروح بي عرض الشارع
اتقاسمنا النفس النازل واتبادلنا النفس الطالع
غزلنا بساط الريد الطاهر فرشنابو كنيسة وجامع
سويناهو ملاجي اطفال ..سيرة وجرتك وسيف وهلال
وغيرنابو الامر الواقع وقبل تمس شفتينا القهوة
اتمطقنا معاني النشوة والاحساس للبعد السابع
ســودانية لا شرقية ولا غربية بيكي الدنيا معاكي وردية
روعة زوقك في هندامـــــــــك واضحة جليا
وعزب حديثك حالي كلامك آثر كل الناس يا بنية
ومين الشافك وما اتمنا ودوبا وغنا
اريتك ليّ دقيت بابك وكان خطابك فوق لي المية
الدينكا النوبة الجعليين الشايقية
العجم الاغريق اعيان الدول العربية
قدمو ليك شيكات بيضــاء وانا قدمت بياض النية
ومدو عليك متاع الدنيا وانا مديت الريدة هوية
والاحساس والحب الصادق بين سوداني وسودانية
شكراً كونك ما بِشروك الراس مالية
وشكراً كونك ما اغراك مفتاح عربية
وشكراً كونك زي النخلة عزيزة وابية
وشكراً يألعلمتي الدنيا كيفن تبقي الريدة قضية
وشكرا كونك في وجداني تعزمي الفرحة علي عينية

مبدع يافوَاز ,,, وأشد ماأعجبني تناولك لمصطلحات
وعبارات عصرية مواكبة مثل ســــودانية سمحة "وجدعة "
و"زول ريَاد" و"بت تتراد" ,,, تأتي منسابة ومنسجمة ببساطة دون
كلفة أوعناء,,, لكنني اظنك تقصد "الأوراد" بدلا عن الاوراق في
البيت التالي ليتماشى الوزن والقافية وقوة المعنى:
ويكمل ليلي الاقي صباحو ولسي برتب في الاوراق,,,,
وشكـــــــــرا كونك انعشتنا وهيجتنا بشعر في منتهى الجمال
فانطلق ولاتبخل علينا بمداد قلمك الأنيـــــــــق....