طرقت الباب حتى ....

عوووووووك
يا ناس الحِلة سلام ..... ويا ناس البركس سلام ..... ويا ناس خمسين بيت سلام ..... سلام لي عموم ناس المصنع دقيت الباب كو كو كو ... وما في زول قال لي عينك في راسك ودفرت الباب وخشيت واصفق واصفق يا ناس البيت سلام شكلو مافي زول في البيت ياربي الناس ديل راحوا وين ؟؟؟؟ يارب تكون لمة ناس في خير.... سرحت وفكرت واحترت وقلت هسع مشواري دا يروح شمار في مرقة .... ولا زول واحد القاه عشان اتونس معاهو شوية .... وكان في مُرادي القاكم كلكم ونبل شوق السنين الحرمتنا منكم ................ وجيتكم زول ونسة وضحك وشمارات وكنت متقريف لي فنجان جبنة معاكم ولكن ما لقيتكم مرقت ووقفت تاني في باب الشارع وصنقعت وبحلقت قلت يمكن القى لي لافتة توريني انتو وين ؟؟ رحلتو؟؟ ولا طلعتوا وتاني راجعين ؟؟؟ برضو ما لقيت حاجة وفي النهاية لقيت لي قطعة فحمة وكتبت في الباب حضرت ولم اجدكم ............. المتيم بكم ود الحِلة ( بكسر الحاء ) ..... وباكر كان ربنا اداني عافية جاييكم بس ان شاء الله القاكم موجودين

جيدآ جئت أيها الحبيب علاءالدين ..........
أمبارح بالذات وفي وقتك ده اغلب الناس كانوا مشغولين
بالقمة(هلال-مريخ) ,,,, والتي _كالعادة_ انتصر فيها الموج
الأزرق اذا استبعدنا حالة الهرجلة والعك الكروي الذي ظل
يلازم كورتنا منذ أمد بعيد,,,,, شكلك ماعندك اهتمام بالكرة
يااستاذ لكن ملامحك your feature أشبه بالزرقاء ومااختيارك
لون الازرق في الكتابة الا دليل على صدق حدسي... وبالمناسبة
الست /امتساب وآل تساب جميعا ,, في حالة بيات وحداد ولن تسمع طرقك هذا نتيجة لميولها الحمراء ونكسات الاحمر المتتابعة.....
اما مندكورو وممدوح والزم ونبيل الذين وعوض ادريس وخالد بخيت وكل بني الازرق سيلبَون النداء على جناح السرعة...
لك خالص الود لاهتمامك وسؤالك المتواصل عن جميع افراد المنتدى.......

ها قد جئنا يا افوكاتو منتدانا
جئنا والشوق باعيننا وكما تغنى بها الراحل المقيم جينا ليك والشوق دفرنا
انها الاشواق دوما تتدفعنا لان نقهر الظروف ونتحدى الصعاب
الهلالابى المتيم عائد السيد على الرغم من عشقى اللامحدود للاحمر الوهاج الا اننى لم اتمكن من حضور المباراة او حتى معرفة النتيجة الا فى وقت متأخر وهذا ان دل على شى انما يدل على ان الكورة فى بلادى تحتضر وما يفرحك قوون بشه

لك اخى عائد ولكل القبيلة الزرقاء هدف بشه العاجبكم وربى يتم مرادكم مايجى واحد زى الرابطة يفسد عليكم الفرح اعملوا حسابكم

شكرا لكم أخي عائد وأختي أم تساب والحمد لله رجعتوا بيتكم وخليتو الطشة والحوامة فوق بيوت الناس والعقبال لأخوانكم واخواتكم الباقين يجو بدري ويتلموا عند أهلهم من ضو
يا سلام يا عائد مباريات هلال مريخ ترجعنا للزمن الجميل حيث كنا نشجع الكورة الجميلة في الزمن الجميل بالمصنع بس دا كان زمان ( زمن جوز الحمام تلاتة ) كورة هلال مريخ بالمصنع كان لها نكهتها لا شحناء ولا بغضاء والتشجيع كان بالكلمات لا الملاكمات وأذكر كنا نجتمع في منزل العم عبد الرؤوف سعيد عليه الرحمة وكان مشجعو الهلال عبد الماجد أحمد مكين وفخر الدين عبد الرؤوف وجدو مواطن وغيرهم ومشجعو المريخ شخصي الضعيف وعبد العظيم شروم وبرعي المصري ونتعارك ونهددهم بفوز المريخ على الهلال ونضحك ونعلق ثم نعود الى ديارنا غالبين أو مغلوبين ولحسن الحظ ولمهارة فريق المريخ كنا غالباً منتصرين زمن عاطف القوز وحامد بريمة وسكسك وكنا نمسخ على الهلالاب وجبة العشاء ثم يتحرك الركب وتنضم اليه مجموعات اخرى من مشجعي المريخ الى ديار آل اللمين ( عبد الله الامين وعمر والدارس وكلهم على حسب ما أذكر كانوا هلالاب ونهتف ( فووق فووق مريخنا فوق ) ... ( بالطول بالعرض مريخنا يهز الأرض ) ... (مريخنا صعب كاساتو دهب و...... فصيح كاساتو صفيح ) .... ( دخلت بي وين يا فلان الشين )
وغيرها من الهتافات الحماسية الجميلة ولكن الان تركنا عالم الكرة كما تركنا عوالم اخرى وبقت علينا هذه الحكاية :
قالوا في واحدة ما تكره شيء في الدنيا قدر كرها للكورة و ما عندها أي معلومات ، ولسوء حظها قام عرسا واحد هوايته الأساسية الكورة. و هم في شهر العسل كانت في كورة مهمة طرفها الفريق البيشجعو العريس، قام ساق المرة و مشو الملعب. بدل ما تسكت و تتفرج!.. العروس قنبت تسأل في العريس ده شنو و داك منو ! لامن جات عند الحارس ! قالت ليه الزول داك واقف براه بعيد كدي ليه؟ قال ليها ده! ده أحسن حارس مرمى في البلد! انت عارفة ده سجلوه بكم؟ ده دافعين فيه 70 مليون و كل شهر بيدوهو الشي الفلاني إنت قايلة ده هين؟
ردت بسؤال ! 70 مليون!!!!!!! ليه بيعمل شنو؟
رد عليها: ده ما بيخلي كورة تمر و تخش قون الشبكة دي ما تتهزا أبداً.. حارس ممتاز خلاص
بعد تفكير طويل و تأمل العروس قالت للعريس:
هسع بالله الناس الغبيانين ديل لو جابوا ليهم ألف طوب أحمر و روري رمل و كيسين أسمنت و بنو ليهم حيطة في الحتة الواقف فيها أبو سبعين مليون ده ما كانوا وفروا قريشاتم ديل؟
كل الاماني بأن يتغير حال السودان للأحسن وكذا الكورة السودانية مع خالص الود للجميع

قمة الروعه والعتاب الجميل استاذنا علاء الدين والشئ الذى جعلنى املك الرغبه فى الرد
على هذا البوست هو ان اهل البيت استاذى علاءالدين ما يزالون فى ذلك الغياب الكبير
وحقا طرقت الباب حتى كلا متنى
لك التحيه الخالصه استاذ علاءالدين

شكرا استاذ علاء على هذا العتاب الجميل لاسرة المنتدى بقلة المشاركة
يا ريت يكون خطوة الاستاذ علاء هى ديدننا وذلك بطرق الباب يوميا وان لا نبخل بالتواجد

احمد حسن الحلفاوى كتب:: شكرا استاذ علاء على هذا العتاب الجميل لاسرة المنتدى بقلة المشاركة
يا ريت يكون خطوة الاستاذ علاء هى ديدننا وذلك بطرق الباب يوميا وان لا نبخل بالتواجد

ونحن معاك .. يا ابوحميد ..
نوافقك الراي

الاستاد الرائع /
علاء الدين
متعك الله بالصحة والعاقية
لك العتبى حتى ترضي
زين عالم ----قبيح
دائما الشبكة تلومنا مع الاخوة الاعزاء حتى اضطررت في التعامل مع سوداني
لكن اقول لك ايسماعيل صبرا
كيف لا وانت المتوشح دوما بالصبر
حب المنتدى من حب المصنع
تفضل دون ان تطرق
ستجد الجيع يلتفون حولك
حبا وجودا
لك التحية مجددا

وماا غيابى عنكم إستغناء ولكنها هذه المصائب التى بلانا بها عهد الإنقاذ..

ظللنا مقطوعون عن التواصل معكم بسبب {شركة زين }بسبب توقف النت عبرها قرابة الشهر وذلك حصريا فى المنطقة شمال مدينة حلفا..بسبب عطل فى المستقبل فى البرج القابع بالقرية 21..وخسرنا إشتراك شهر كامل مدفوع مقدما ..ولاعزاء لنا ولا آذان تسمع شكاوينا ..شكيناهم على الله ..وماعافين ليهم قروشنا الأكلوها ملح..
شوقنا بحر..ودموعنا مطر..
ولكم العتبى حتى ترضوا..
{وزين عالم شين}

وها نحن نطرق ذات الباب لنتفقدك لاننا نفتقدك ونفتقد طلتك العزيزه علينا فاين انت يا افوكاتونا ؟؟؟
كل المنى ان تكون على مايرام

» قصيدة طرقت الباب حتي كل متني الشاعر إسماعيل صبري