ياماشى للشروق

ياماشى للشروق
حاج الماحى
ياماشى للشروق شيل لى السلام مطبوق
كان قيدى مُو مغلوق والله نـاوى اســـوق
بسم الله ياشفوق يا خالق الخلوق
يسرلنا الرزوق نجمع لنا حقوق
نقوم نحادى النوق نحمـلن علوق
عمودنا يمشى روق
نقيم الليل نسوق نسريبا للشروق
اثنى الكلام مطبوق للصادق المصدوق
القلـبهو شفــوق الـزال لنا المـحوق
المسخى والفسوق الكفهو مطلوق
ما كنَّ لى حقوق
كان بابو مو مغلوق للسايح المريوق
فى الحرى والواقوق صافى الخلوق روق روق
شاخصة العيون لافوق يجـرى العـرق سـبلوق
ضجـت وقـاف السوق العاصي صـاح مغلوق
النار لسانا توق
جاه اب علامه يحوق
لولا العلينا شفوق والله مافى مروق
الجسمهو معبوق فوق الدلال مدفوق
تبسيمو كالبروق عـلى البـدر يفوق
يكيل صبى الموق العزو مو ملتوق
صاحب هديه النوق
سيد البراق ام طوق ياخوى عليهو الشوق
اصحابو ماهن جوق فرسان تنادل العوق
صديق مع الفاروق عثمان الوفا يسوق
الليث على المذموق ملاّكا جابا ربوق
باعن رفيق فى السوق
الطير كبود وحلوق قط ما صبح مريوق
يا اخوانى طال الشوق يبكى المحب معشوق
فاتوا الرجال بى فوق سايحـين لباسا دلـوق
قـيد اللـبيب مـغلوق صايبو الكسل موثوق
عازم يدورلو مروق
يارب يكون مطلوق
سيد المدينة ام سوق عن بابو اقيف واتوق
الماحى يا محموق فعلك جميعو فسوق
دينك ضعيف متلوق حالك عليك مسروق
ان كنت ماك محوق ليش ما بتحادى النوق
قاعد على ام فاشوق
للسخرة والماروق
سَوْ مدحو ليكَ مَتُوْق ان كان تسير معتوق
بختم صلاتي تفوق ثم السلام مطبوق
كالطيب عبيقو يفوق عد الزرع والسوق
ماقام غروب وشروق الطير قطا وغرنوق
لى شافع المخلوق واصحابو جمله تحوق

الله يديك العافيه وانت بتعطر فى المنتدى بروائع حاج الماحى الراجل الصوفى المليان بحب
النبى والمشتاق يلاقيهو وان طال الزمن