وادي ام بقر
محمد حسن سالم عمر (حميد)
تنمارى ...
يا وجعي العتيق
نار .
والمهيرة تحاحي كر!!
دم .
والمحنة سحيق سحيق!
مندلقي
من وادي ام بقر
منطلقي
بيني هوا وحريق
مارقاني
بي غُبْن النبي
وغرقاني
في الحزن العميق
..
إضنين بناتنا
مقطّعات ؟
حلقه وسنونه
بلا بريق
حلمه وعيونه
مفقّعات
دم دم لسانه
الريق دقيق
خيل البعانخي
الصاقعات
شاءت مطر
شاءت حريق
أطراف تنوني
مجدّعات
جضّال
على طول الطريق ؟؟
...
ده قدم مروّة بتد حنين
بي طينه بي وسم الكُريق
بي طرقته وكشره السنين
الكان بتمرقبو الحِليق
أهْ تاني ما ضرعت جرف تحتاني، ما قَرَعَت مريق
حفياني ما انفدعت تلف
في الدارة تنحرقص بِريق
هي التربة ياريت تنعرف
يا بت عقابه ورا برقيق
فتّينا جملة حرِف حرف
والدنيا كمتره فد عِريق
...
ده وشيش غلام الله الوِليد
الجايي من دار ود قمر
كان القرايي بلا ابن زيد
من مرَّة يحفض للسور
جنا عمرو ما دودرلو صيد
صادوهو حقداً يا ام بقر
واشري زي ده حلاتو ريد
موصلاتو يقطعه لْيه قدر
..
منّح عزيف الريح بعيد
وارتجت أغصان الشدر
ناحن قماري نخج جريد
والساقي دمع الدم هدر
..
مين يا شهود والدنيا عيد
يقدر يشيل لامو الخبر
أم اشنو يي دي من الوريد
وإلى الوريد تحت الزفر
..
جنب الغجير القال أخير
ينجم وسطنا وكت فتر
أدّينا آمني وارض قرير
علَّمنا بوِّيغ المتر
وأدانا ميمونة وبدير
علَّمنا أريحيةْ الغجر
يا عم"رسول" علّك بخير؟
أهو لسّه راجين المطر
..
قول تاني ما ضلّف حمير
ما شرشر اللحظة وهبر
لي مشرقيتو ورا الحفير
لزّالو طردين السفر
..
عوّافي يا شيخنا أبّكُر
مفروضة ساقك بي دبيب
والليلي تمّوها الكُتُر
رمّوها في ساقةَ الحبيب
قول تاني ما قفّز تمُر
ما جاك نجرلك عنقريب
من تاني ما انفرجخ تخُر
عرقايتو عِن نقْر الدليب
..
لا حتّى جورجِ أبو الرجال
مخلوف على ود ابحليب
من جاي تشوفن بس هلال
من غادي يا رمز الصليب
سايحاً هوا استهوا الشمال
كم من ملاريَتُو كال نصيب
حمحم مع الصف ربّا شال
فـي انفعال يا للغريب
..
لا حولا
يا وادي انبقر
لا عوزي
من هادي الذبيح
يا واطة ...
يا جو ..
يا بحر
حارالي وين كفنو؟
المسيح؟
..
أضلع علي قوز الرماد
أطلع
وأصيح ....
يا حوّا، يا النيل،
يا الفِدي،
يا الخير
ويا أزرق،
بنات عشميق، كُري،
يا همزة، يا اب كبدي، الفحل،
يا العوني،
يا شيخ الهدي،
يا بادي يا أب ريق
يا عشيق الموية والطين
يا ام نجف،
يا اب شوك وكرُّوق
يا كرَف .
أي يا بنات رحمة أم رحط يا امّات رحيق،
يا امّونة، يُحمد،
حُمَّد اُحمد، ود حلايب، يا الحسين،
ود زينب، إدريس ـ
يا اللمين،
يا خرشن، الزين،
بت عتيق .
يا ماري، يا غنّوم،
ويا أدروب،
صهيب الروم، عكود،
أب غُرّة،
يا الجكُّوم، سلامة، التايي يا شلّوف، حوايي،
يا أبو الشريق
يا العازّة، يا حمتو، الشراد، يا حاجِّي،
يا دلدوم، ولاد باعوض
ويا بلّة أبطبيق.
بت طه يا ام سالم،
سوار
يا جنبلان وكدإنقا، عدلان،
يابشارة الدندراوي
أب لمبة، حمدان، يا مِريق
يا السرّة، يا سرّار، سليم الساري، يا الله وكيل، مراح عبُّود، سمح جيبو، العجب، مسمار،
علي العربي، الصبُر، عجلان ..
..يجيني نهيق نهيق .
يا سيدي يا اب ابريق صلاة الغيمة فوق طمَّ الحريق،
يا اب عوق ...
...
وعووك ...
...
...
يا كلّكن ...
يا اهل الفريق؟
...
دي (الضيقة)؟
صُر؟؟
بهلوا الفريق
بابح ..!
يكاويني النعيق
يهزابي أبو التيْ تي
يكاد يفقعني
قرقير الحريق
...
يا الله .....
صنقع للسمي
وبآخر نفَس
منّو اترمي
وتلحقني تاآح
طقّت كواريك
البلد
ضيبة ونباح
غربا ومزاح بالتاح تراح
حرم المسيد ..
حمام من الدم ..
مستراح
الواطة تنسربن حريق والسروي يلوي الجو
مع الصقّار ..
صياح
لا غيره والرخم الجبان
والبومة والغربان
وأنا أب ضبّان
طليق .؟!
...
...
في الخوخو منكوت العشر
حَرُوم جِنون الدنيا
ملبوشات ظهر
دهنت
تدخّن لي عروس
فوق حفرة
كانت يوم .. بحر
ضفرن مصارين البطان جورسيه
وضنوب الخيل ..
شَعر
شيخن يشنِّف في مهر
ملك القهر
ضارب الدقيق
كارب
يسخّن في لحوم
بلدي السليق .
...
خبّيت ...
أحنِّس في المطر
يفزعني
في وادي ام بقر
نطفي الحريق !!
يلحقني شيطان
بي حجر
وأسقط فليق,
زي كضبة!!
ما بين الجرح والدم
عليق
تزنقني جنيّات غُلُف
في (الضيقة)،
بي بيض
بي ضُلُوف،
مخروقة،
صوف
وشعر عروس مخنوقة،
عضمي اللت ضهر،
بي كلوي
بي عفشة،
أب قبيح،
بي حدوي
بي عكف السروج
بي ما تبقى
على السهول
وعلى المروج
وعلى البوادي
من الخيول
ومن الصنوج
ومن الطبول
ومن الزنوج
ومن الذهول الفي أم بقر بي ما تشظى
على الحريق
بي من تلظى
مِن البشر
تمطرني
بي فقر الفريق ..
تمسكني حمّاديرة
أدوش
وأطرش دموم
تأسفلي ..
أسفَّلي مِدْ تراب
مِنِّي .. اترمي!
يا نبَتا عرّابك مِنو؟
وأنا ماني صارقيل الطمي!
ضامّاني ريحتك
في شنو؟
وحاماني لي غيره
انتمي؟
صنقَع ..
يصنقعبي العمي
من اسمي نسمي
الديدبان راس السمي،
انزيَّن حليق
...
...
...
يا اهل الفريق؟؟
...
...
مجنونة
وأمّات الحمام
مسجونة في حمّى الحريق
غمراني بين غمّة الأسى
وصاقعالي ..
فيق!؟
فيق ...
ده الطريق
...
يا والله
كمّلت الرسل
قبّال يجي الزمن
الصفيق
وحمّلتَ قلب أهلي
العُزاز في الضيقة
ذُل ما لا أطيق
ودايرني أطُل وطن المثل
وين ألقى لي دربك
رفيق ؟.
يا الله كُلما ترمي ضُل
يا قام بُقل
يا انسام حريق
..
شهِّلني يا آمون جلّد ..
صبراً ..
قدُر يفرجلي ضيق
يا ورّني اتحالى الجراح
بي ما يليق بي حال ولد
شقي وانحسد
في نحسو !
في حسّو الرقيق؟
كتب أ أسد جم با بلد
بي دمّو
في لوحو الشقيق
من سنطة فوق القيف
قعد في الرملة
يتهجَّى
ا لـ صـ بـ اح
تاح تاح تراح
طاحبو الحريق
...
أنا باقي جبل الضيقة
يا يابا الصراح
دردمني أضيق
وأمسك حبال صبرك
عليك
بي طوله ..
ما قدر الجراح
ثمَّ السماح يابا الشفيق ..
بدِّل تمورو دي
بي سلاح
يحرسبو
في وادي امبقر
للجايي من ضهرو
العريق
يا إما في كبَد البلد
معناهو وآح،
زي ماهُو في حقَّ الله
راح ..
لحق الفريق
..
"أُسٍ يا صبي ..
أخُّو وأفَي
بريِّة
من العنيّة
فِن الزعيق الفاوَة
وأملا عضاك .. ثبات أمسِك شباطين الزمان
بي قوّة ..
عفُّو يا اخو البنات
لا تندبي
مُوت بي كرامة ..
ولا السبي
قالت حمامة جناها طاح
وجناحه راح
وسط النقيق
"هُو آمون نبي؟
وما دخلُو؟
في هادي السليق
ما دخلو في هادي الحريق
خلْ للقيامة الللقيامة
ودا الطريق
..
أشهق لما شاء الشهيق
ما تنمغس
زي البريق ..
يلاّ انغمِس
نخلة انغرس
شاق عرقك التُربة الحريق
بين الجماعة
الموت عرس
أهلك معا أهلك غريق
ما بين خبوب الدموارم
حجبات فكيك
المنترِم
ما أجدو
ما يجدي الزعيق
أهلك معا أهلك
عميق
سف الزبد
وألحس ربو حزنك
دقيق
مين عارف اتعوّض شهد
مش هو الشهد
صبر الرحيق؟"
..
قال برتكان شاهد عيان
نجا باحتضان السيسبان
"كان ياما كان
كان ذات زمان
زيْ سنبلة انحرقت بلد
وكان يا ولد
كان يا تجن
يا كان تحن،،
حِن للأبد
لي أم من الماضي
السحيق
في يات بكان؟
من يات زمان؟
كانت هناك؟
كانت هني؟
لا إنت عارف
لا غناك؟
بس يا ولد ..
باتت حلم،،
صارت مناك
بِقت أمتك .. في ذمّتك
عنت البلد
قدَرك عناك..
قدْرك ضناك
غنّاك .. عَناك
لله يا شايق تشيق
مكتوبة تبقى كَبِِد حزن
لبطن غريق
وترميك قسمتك
في مدن
تبنيها بي سهرك
تقوم
من نومه دنان الحزن
يوماتي تنكفرن عليك
من باب وكالة يتمنَّك
لي باب وكالة
وشيك وُشيك
لامِن تبيعك للمنافي الغربة حلم الكُضُّبُن
لا قُلْتَ للريح لا السفُن
وين ماشي بيك؟
عوّافي يا جلاّبي
كايس اليشتريك؟
...
...
قًشْ دم عينيك
رُش الغصن
من راحتيك
قرِب إليك ما بيك حزنُ .
...
...
ما خلّو أضان ..
غير الغبن
غير البتنصنت
عليك
ما قطّعوها ..
دليق دليق
ما جدعوها ..
على الطريق ؟؟
...
...
صفا وانتباه
...
...
فيق
يا صديق
ما فيكَ ما بكَ
من بكا
وجرح اتنكا
وكربة وبلاء
عربونو كانت
كربلاء
للغربة من دون غربة
لا
اذهب وقلبك
قاتلا ...
إنّا لجنبك متكأ
حدَّ الحريق
...
...
نبحك؟؟
هباب
نتحك؟؟
سراب
عمرو السراب بلالو ريق؟
زٍِنُّّّّ الزعيق
واستخلف الله يا رفيق
فالباقي
من ناس الفريق
الناجي
من هادي الحريق
يي ديك مراكب الباشا
كاسحابن ...
رقيق "!؟!
