احبكم أهلي بالمصنع جميعا اينما كنتم ..
والعفو والعافية ..
ونيتنا صافية عسل على لبن ..
عاوز اكلمكم كلام .. ان شاء الله يعجبكم جت ..
بمناسبة راس السنة دي (كل عام وانتم بخير وعافية وكل الامنيات تحت البطانية) نفسي اعرف وين كنا بنقضي راس السنة زمان في المصنع وزمان دي في السبعينات والثمانينات وقولو كدا بداية التسعينات والكلام دا كلو في القرن الماضي طبعا يا خسارة في ناس هنا ما حضرو الكلام دا ولا شافوا جامع الخشب بتاع البركس ولا شافوا سينما بيرق ولا حضروا زمن العشش كانت بتتحرق بالعدسات والله اعلم الكلام دا ما جبتو انا اسالو منو اولاد الحلة وقت كانت المواصلات تمرق من السوق للمستشفى وبالعكس!!.. شفتو نحن كيف بقينا كباااار قدر حلق الداهية المصت ابار البترول وشجرة يا عم.. في ناس طبعا ح يزعلو شديد لما نجيب سيرة العمر دي خاصة فلانة ديك الله يستر ما تمسح البوست دا وتكشح كسرة امها برفسة من كراعه الشترا ديك .. يا ربي لسه بتشوت طبق الكسرة وقت زول يساله يقول ليها عمرك كم؟ والحكمة زمان تقوم وتفلع جداد الحلة وخاصة سعدية دا كانت عندها معاهو عداوة شديدة وسعدية دا ديك جيرانا .. ذنبو شنو ما عارف والله؟
يا حليل زمن الكسرة الكان البِلد فيها الفار ويتم اربعينو ويمشي والله انا بتكلم جد لكن الفار لما طلع من النفاس ما شفتو .. شفتو بعيني وعندو ست فيران صغار زى صباع الفيوزات بتاعت الرادي ومكوع ووالد في الطبق زى التقول ماجرو من جيرانا ودا كان اول يوم في الولادة.. عظمة شديدة!!
المهم قدر ما صنقعت ودنقرت وفكرت واتلفت ما عرفت نحن كنا وين نقضي ليلة راس السنة؟.. غايتو متذكر لما تجي فرقة اجازة زى يوم عيد الاستقلال بنعمل برنامج رياضي وحفلة ومرات بنمشي رحلة يا البان ولا ام رهو ولا الرميلة والعجب خم الرماد برضو نعمل رحلة ومرة اتذكر رتبنا للرحلة وطلع رمضان في نفس يوم الرحلة انقروا ما مشينا ام رهو واحدين صايمين واحدين فاطرين غايتو العفش على مسؤولية صاحبه داخل البص.. انا غايتو الموية بين فطرتني وما فطرتني وعينى على طحنية الفطور والغدا لسه ما مرق .. الحمد لله كنت عيان عندي ملاريا والما مصدقني والله يسأل عبد الله ميتو؟.. شوفو الناس التانين فطرو ليه؟ ... بالمناسبة في ناس حاضرين الرحلة دي هنا معانا والله .. امرقوا النصيحة وورونا منو الغرق في الجمام وقرب يروح في حق الله .. سبحان الله اسه كبر وشايل حال الشباب شديد .. برضو ما بقول اسمو .. دي فضائح ما عندنا بيها شغلة الا كان جا واعترف وكان ما اعترف بكلمكم يوم 30 فبراير الجاي يعني بعد شهرين السنة الجاية 2013.. اتفقنا على قول ندى القلعة ويا خسارة دي ما حضرناها وضاعت علينا .. زمنا كانت حنان بلوبلو بلبلت حنان الناس كلها جنس رقيص وجديع ..
دا كلو كوم ..
لكن كان في واحدين بعملوا الليمون بالملح ويسكرو بيهو .. والله متذكرن شديد .. مافي داعي للفضيحة .. شن ليها السكرة الما ليها طعم ... دي سكرة ولا صواتة ملاح يا ربي؟ ..
والما مصدقنا يسال ولد جيرانا (دقُش) ..
نفسي بالجد اسمع مداخلات من الجيل القديم والجيل الجديد يعني بالعربي كدا كلكم اولاد الانقاذ او عيال نميري او عيال عبود كان في واحد حى لسه؟ وكان في واحد حضر الاستقلال دا عز الطلب يجي مارق ويوصف للشباب ديل ويقول لينا الحقيقة هل استقل السودان ام استغل؟
