حوار الدموع
• ماتشوفو الجير ده ... انا زول ابوي كادح جدا ..!!
• اول مقال عبر عن انتمائي للمساكين كان في رابعة اولية ..
• قصة المرض ورحلة العلاج قطعتهّا .. في حشاي
• حرصت علي اخفاء مرضي عشان ناس السمؤال وسبدرات مايجو يختو لي قروش تحت المخدة
• قلت لاولادي لما اموت علي مهدي لو جاء وقف في حافة قبري وقعد يخطب وقفوهو ...
• اصدقكم القول .. انا اقرب الي باب مغادرة السودان من البقاء ...
• حوار امير عبدالماجد –هيثم كابو – محمدعبدالماجد - سراج مصطفي
• منذ وقت .. اوفترة سمها ماشئت قررنا ان نذهب الي هاشم صديق لنزوره .. زيارة نطمئن من خلالها علي شاعر بقامة هاشم صديق .. صدقوني اود ان اكتب عن هاشم لكنني اخشي انه لايحب مثل هذه المقدمات .. هاشم صديق الذي اعرف .. لايحب ان تبحر عميقا وان تتحدث عن حبك له .. لذا لن ابحر مع ان الابحار في حب الرجل مشروع وحبيب الي نفسي .. قلت يوما انني اشكر الله تعالي ان جعلني احيا عصر هاشم صديق .. وبصدق اشكر الله تعالي ان جعلني احاور هذا الرجل .. بقلادات صدقه .. وحبه العميق ..وفهمه .. والفكرة عند هاشم صديق قد لانستوعبها في المرة الاولي لكن مجرياتها وتطوراتها ستشرح كيف ان الرجل يملك الي جانب الادوات الابداعية والعلمية (حد شوف خرافي )...
• اتفقت مع الحبيب هيثم كابو ان نزوره في المنزل ...زرناه وجدناه يقرأ القرآن والكتاب علي فراشه .. الكتب والادوية الي جانبه .. جالسناه بعض الوقت .. كان هذا يوم الخميس الماضي .. يوم السبت كان موعدنا صباحا .. انا وهيثم ومحمد عبدالماجد وسراج مصطفي .. لم نحدد الموعد للحوار .. لم نحادث هاشم اصلا عن حوار ومع ذلك عزمنا ان نحاوره .. تقبل الامر بصدر رحب وجلسنا معه لساعات طوال في حوار عميق وممتد ... اثرنا ان نبدأ حلقته الاولي بالعملية الجراحية قبل ان ننتقل الي القضايا الكثيرة التي حاورنا هاشم حولها والافكار والرؤي التي طرحها .. هذه هي الحلقة الاولي والمرة الاولي التي يكشف فيها هاشم صديق خبايا العملية الجراحية التي اجريت له بتولوز .. مدخلنا كان ونسة عن الجير الجديد في بيت هاشم وهو جير لونه اخضر يسر الناظرين .. حوار جانبي بيننا التقطه هاشم صديق واظننا بدأنا الحوار قبل ان نجلس في صالونه العامر ...
• كنا نسال بعضنا ما الذي جعل الاجهزة المختصة دائما علي مختلف النظم لديها قناعات بان هاشم صديق شيوعي ..
• هاشم صديق يلتقط الحوار ثم يجيب ..
• يمكن .. المصطلح اللغوي بتاعي والواقع الطبقي
• يعني حكاية الواقع الطبقي مع الجير السمح ده منطقية ..!!
• ( ضحك ).. ماتشوفو الجير ده ابوي زول كادح جدا و نحنا من ماقمنا ممكن تقول العزة مع الفقر..
• والدفاع عن حقوق المظلومين ...!!
• انتو عارفين انا اول مقال انشاء في رابعة اولية كتبته عن حقوق المزارعين .. وقتها جاء الاستاذ وهو برجعّ في كراسات الانشاء للطللاب سال مني .. قلت ليهو ايوه .. قال لي اقيف علي حيلك .. وقفت قال لي الكلام ده جبته من وين .. قلت كلام شنو .. انا قلت يمكن عملت لي حاجة والاستاذ عايز يدقني .. زمان كانو بشدوك في الجلد
• اخر الحصص ...!!
• ايوه متذكرين الموضوع ده طبعا .. المهم قلت ليهو كلام شنو يا استاذ .. قال لي كلامك ده بتاع نحنا لازم ندافع عن العمال والمزارعين .. قلت ليهو والله ماعارف يا استاذ انتو ختيتو مواضيع قلتو الناس يكتبو فيها وانا كتبت ..
• وانت قصدت وقتها تعبّر عنهم من خلال البتسمعو من محيطك ...!!
• انا ماقصدت ولافكرت فيها عشان اطلعهّ ..ايوه في انتماء طبقي خلاني اكتب عنهمّ وده البسموهو في الفلسفة الماركسية الانتماء الطبقي لكن بطبيعة الحال وفي المرحلة المبكرة دي من عمري ماكان عندي للكتبته اسم ...
• هاشم صديق شيوعي والا بعثي دي حانيجها خلينا نسال لماذا اخفي هاشم صديق مرضه عن الجمهور والاعلام ...
• اخفاها بمعني شنو ...!!
• ليه ما وريت الناس انك عيان وتعبت واتعملت ليك عملية قسطرة نحنا سمعنا بيك في فرنسا
• (ضحك).. ده قصة قطعتهّا .. في حشاي عشان الناس مايعرفو
• ليه ...!!
• عارف انا كنت حريص انو الموضوع ده ما يتنشر ولما اتنشر الكلام ده كان بعد عملت العملية في تولوز وقتها اتصلت بي اسيا الربيع من لندن استأذنتني عشان تنشر الخبر .. قالت لي ياهاشم بعد ده ممكن نتكلم وننشر .. قلت ليها ممكن وفعلا نشرت الخبر والناس قلقو لكن اطمأنوا لانو العملية كانت اتعملت فعليا
• ده كله ليه ..!!
• (صمت للحظات )..شوفو لوانا راقد في الفترة بين مرضي والعملية حتي لحظة اكتشاف حقيقة مرضي وقرروا لي عملية .. في الفترة البسيطة دي لوجاني السمؤال خلف الله والا عبدالباسط سبدرات ورفعوا مخدتي وختو لي ظرف مالي كان متّ ... ولو قمتو انتو كتبتو في جرايدكم ياصاحب القلب الكبير والماعارف شنو .. واخيرا اجهد قلب شاعر الملحمة .. كان تعبت .. تعرف انا مرات بتذكر الحاجات دي
هاشم صديق داخل المستشفى فى فرنسا
• قاطعناه .. بتتذكر وتتوقع ردات الفعل ...!!
• طبعا .. انا عندي بنتي اتخرجت طبيبة هسي .. كانت معاي في المستشفي .. قلت ليها كلميهم اي واحد من الصحافيين عندو زول راقد هنا وجاي المستشفي مايسمع انو هاشم راقد هنا
• الصحافيين برضو ...
• ( ضحك) عشان مايجو يصوروني بي اللبسة المشختّه دي ..
• نرجع للظرف التحت المخده مشكلته شنو ...!!
• ماصادق ...انت مامعاي وانا مامعاك .. جاي تتفقدني بعدّ مرضت .. هو انا سبب مرضي منو .. بعدين انا عندي جمهور وقراء عارفين مواقفي ..
• و... تاني ...!!
• بعدين انا مابحب الضعف والشفقة ..
• دي ماممكن تكون هواجس ..!!
• لا .. اطلاقا وبعدين ممكن اكلمك عن هاشم عنده هواجس والا لا .. لكن انا احيانا بعمل مراجعات كده للمبدعين الرحلو عن دنيانا .. ليه الاسراف الشديد في الكلام عن زيدان .. زيدان ده مافنان مبدع وكلنا عارفين كده .. ليه لما كان راقد في الحاج يوسف مافي زول جاب خبرو ... انا هسي بتمني زي ما مرضت في هدؤ اموت في هدوؤ من غير جرايد وكبار مسؤولين وبدون هتافات وانا وصيت اولادي وقعدو يضحكو .. قلت ليهو شوفو اما اموت في زول واحد لو جاء وقف في حافة قبري وقعد يخطب وقفوهو ...
• ده منو ..
• علي مهدي ... قلت ليهم مايجي لابس طاقيته الخضراء ديك ويطمئن انو انا متّ ويخطب فيكم .. ويقول عني مالم يقله مالك في الخمر .. قلت الكلام ده لمكي سنادة .. يضحك ..
• عندك مراجعات للمشهد ده مؤكد .. لكن بتراجع مواقفك ..!!
• احيانا بتامل قصة حياتي بكل تفاصيله .. من الطفولة وحتي الان .. بستغرب وبسال معقولة اكون ده انا .. ليه انا ما اتفتت .. عندي واحد صاحبي من ضحايا الصالح العام عمل ليهو تاكسي .. الناس لما يركبو مع بتاع التاكسي بتكلمو في مواضيع خاصة كأنو بتاع التاكسي ده ماعندو اذنين ومعارف وبفهم وممكن يكون صديق للزول البتكلمو عنه .. المهم قال لي مرة ركبو معاي ناس بتكلمو عن هاشم صديق وعن قصيدة حصلت فيها مشكلة وفي اشاعة انو اعتقلوني .. واحد فيهم قال للتانين انتو هاشم صديق ده ما اتفتت لغاية هسي ..
• زي الكلام ده بزعلكّ ...!!
• ابدا .. دي بلاغة ..فعلا مفروض اكون اتفتت .. لكن في شيء جواي بقويني .. ربنا سبحانه وتعالي نجاني .. وربنا هو العارف ببوطن الزول وعارف هاشم نضيف والا لا
• نرجع لتفاصيل العملية التي اجريت لهاشم صديق ..!!
• انت عارف انا كان مفروض اعمل عملية قلب مفتوح هنا ودكتور عوض عبدالله وداني لغاية الجراح .. ده العمل لي عملية القسطرة ..الجراح قال لي نسبة النجاح كذا .. ونسبة الموت كذا ... قلت ليهو انت عندك ناس ماتو .. قال لي كتااار... قلت ليهو بموتو بي اخطاء والا بي شنو .. قال مرات تعمل كل شيء صاح ومع ذلك المريض يموت .. لما مشيت فرنسا الطبيبة الفرنسية واقفة بنت اختي وهي لغته الفرنسية ممتازة جدا .. سالت الدكتور الفرنسي فقال ليها نسبة النجاح عالية لكن مع ذلك ممكن يموت في العملية
• زمن العملية كم ...!!
• اربعة ساعات ...
• شلت همها ...!!
• لي هسي مافي زول عارف الظروف المرّت بي هاشم صديق شنو في الفترة دي غير اولادي لينا وقصي ومعاهم زول واحد في بيتنا ده
• قررت تمشي فرنسا عشان تعمل العملية ليه ومتين ..!!
• شوفو انا مشيت فرنسا بي معجزة
• كيف ...!!
• عندي بنت خالي بتعزّني جدا قاعدة في فرنسا .. زمان كانت شغالة في واحدة من مؤسسات علي مهدي .. اتصلت علي وقالت لي ياهاشم انا محتاجة لشهادة وانت عارف اني اشتغلت في مؤسسة علي مهدي وانا عارفة علاقتك بيهو وانت الوحيد الممكن تجيب لي الشهادة دي منو ... اتصلت بعلي مهدي ومشكور ابدي حماس شديد وطلع ليها الشهادة ورسله ليها من مكتبه .. كانت سعيدة انو الامور تمت بسرعة فاتصلت تشكرني وتسالني ووقتها كنت عيان والعملية خلاص حددنا وقتها
• كنت حزمت امرك وحددت مواعيد العملية ..!!
• ممكن تقول كنت بسال في روحي اعمله والا ما اعمله .. المهم سالتني عن احوالي فقلت ليها انا كويس بس زهجان .. قالت لي طيب ماتجي علينا ... لاحظ انها في تولوز في فرنسا وانا في ام درمان .. قلت ليها انتي قايله روحك قاعدة في القضارف انتي في تولوز في فرنسا .. قالت لي بطل حساسيتك دي نحنا حانعمل ليك اجراءاتك ..
• واتعملت الاجراءات ..!!
• نعم لكن انا اعتبرتها زي الحلم كده .. عموما بعد سبعة يوم جات الدعوة .. بعدها الناس خوفوني من الاجراءات في السفارة الفرنسية .. ومن البنت المسؤولة عن استلام الورق ودي عندها قصة معاي
• مشيت السفارة الفرنسية ...!!
• مشيت .. قعدت في الصف لاهاشم صديق لافي زول بعرفني لغاية ماوصلت الشباك .. سالتني المسؤولة وقالت لي انت ياسيد هاشم كيف تكتب المحطة البتنزل فيها تولوز .. قلت ليها انا ماشي تولوز .. قالت انت ماعارف انو في حاجة اسمها الاتحاد الاوربي .. انت حاتنزل في فرانكفورت .. .. اجراءات دخولك بتتعمل في فرانكفورت .. بعدين فجاة وهي بتسال فيني قالت لي معقولة .. ازيك يا استاذ هاشم وسلمت علي ووقالت لي انت عارف انو والدتي ترجمت نبته حبيبتي .. وبالفعل عرفت والدتها وكنا عملنا سويا علي الترجمة بمساعدة عميد كلية اللغة الفرنسية جامعة الخرطوم وقتذاك جان كلود
• الامور اتسّهلت ...!!
• ساعدتني في الاوراق وتابعت الموافقة التي جاءت من فرنسا .. بعدها اتصلت بدكتور عوض عبدالله استشيره .. قلت ليهو انا مسافر ماشي فرنسا .. اعمل العملية واسافر والا اعمله بعد ما اجي ..قال اعلمه بعد ماتجي .. لكن انت مسافر وين .. قلت ليهو ماشي فرنسا .. قال لي وين في فرنسا .. قلت ليهو تولوز ..بدا يصرخ في التلفون .. قال لي انت محظوظ جدا لانو تولوز دي احسن مكان بتعمل فيهو عمليات قلب بدون تدخل جراحي .. ونحنا بنستفيد من ابحاثهم .. وقال لي انت تكون محظوظ جدا لو الاعراض دي جاتك وانت في تولوز لانهم بعتبروها حالة اسعافية .. وبعالجوها مجانا .. قلت ليهو افرض ماجاتني اعمل شنو .. المهم قلت ليهو انا عايز امشي اتعالج بالدرب العديل .. قال لي دي قروش كتيرة .. و في النهاية اتفقنا اعمله هناك
• والقروش من وين ..!!
• باقي تعويض التلفزيون كنت عامل حساب الزمن وخاتيها .. مابتعرف بكرة بحصل شنو .. المهم حولت اي جنيه عندي لدولارات ..
• وصلت تولوز قابلت الدكتور مباشرة ..!!
• عندي خطيب بنت اختي الماشي ليهم فرنسي جنسيته فرنسية و اخته شغالة في المستشفي حددت لي موعد مع الدكتور وانا جيت من السودان اصلا شايل تقريرو سي دي .. الدكتور الفرنسي شاف تقرير دكتور عوض عبدالله .. ياسلام علي دكتور عوض عبدالله .. هذا الرجل من اشهر اخصائيي القلب السودانيين .. اي كشف علي هاشم صديق برّجع لي القروش .. ولامن اتكلمت معاهو في موضوع عملية القسطرة وهي كم مليون قال لي دي بنشيله منك لانو فيها حق المستشفي .. بعد عملوا لي العملية قال لي لينا بنتي تعالي معاي .. سالته في شنو .. قال لي شوف ده ماقراري ده قرار ناس المستشفي .. قرروا يرجعوا ليك قروشك .. لما ناقشته قال لي ياهاشم انت الاديتنا ليهو هيّن ..
• كانت معاك تقارير من دكتور عوض ..!!
• ايوه الدكتور الفرنسي قرأ تقارير دكتور عوض وقال لي ده تقرير ممتاز جدا .. واثني علي دكتور عوض وقال لي انا مامحتاج اشوف الـ (سي دي) بعد التقرير ده
• قرر يعمل العملية ..!!
• ايوه .. وقال لي عندنا نظام حديث والعملية بتاخد اربعة ساعات .. وحتقعد معانا من اربعة الي خمس ايام .. المهم وراني الاجراءات .. وقال لي في سؤال مهم جدا هل عندك القدرة علي تحمل الكلفة المالية للعملية .. قلت ليهو حاتكون كم يعني .. قال لي ماعارف .. لكن تقريبا حوالي عشرة الاف يورو ..
• بالسوداني حوالي كم ...!!
• لقيته حوالي خمسين مليون سوداني تقريبا ... جينا قعدنا انا ورشاء و بنتها ضحي حولنا القروش العندي لليورو ..
• كملتّ عشرة الف يورو ..!!
• نقصت حوالي الف يورو كملناها من البيت ... واتعملت العملية
• دي المرحلة الاتصلت فيها اسيا الربيع ..!!
• ايوه بعده كان الخبر نشر .. جاء الدكتور طلب مني ابعد عن الانفعال .. تاني يوم جاني قال لي مفروض تقعد معانا خمسة يوم لكن ماشايف في معني ليها .. انت بخير وانا شايف انو انا عملت عملية جيدة جدا ومافي خطورة عليك الغرفة في اليوم ايجاره الف يورو .. الافضل تمشي البيت وفعلا رجعو لي باقي القروش .. رجّعت الالف يورو ورجعت السودان معاي حوالي عشرين مليون
• اتذكرت كل الشريط وانت داخل العملية وطالع منها .. البلد .. الاولاد..و..
• (مقاطعا )..الاولاد... انا اخر حاجة عندي قصي ولينا .. قصي اتخرّج الحمد لله وكان في شمال كردفان واغرب حاجة قصي هو الاكتشف مرضي .. حكيت ليهو الاعراض المرضية في التلفون .. قال لي يا ابوي دي اعراض ضيق شرايين .. وحاليا قصي عمل (بارت ون) تخدير ولينا عملت سنة اولي ..
• لما عرفت واتاكدت من طبيعة المرض شفت المشهد كيف...!!
• لما جاني المرض ده كان عندي احساس باليتم .. بديت احس انو النسيج المجتمعي بيهترئ .. ده مش من المجتمع حولي بس حتي محيطاتي كانت بتعاني من ده .. فجاة بديت اكتشف التغيرات .. عيان وعندك اشكالات في القلب ..حتي الشكيت ليهم مافكروا ليها .. ما اكتشف الموضوع الا ولدي بالتلفون .. صدقني انا حاليا بقيت مهموم جدا بالمشكلة دي
• خفت من الموت وحيدا ..!!
• مابقول ماكنت خايف من الموت .. لكن اهو انت وحيد .. انت والنيمة دي .. رحلت الوالدة ورحلت والدة قصي ولينا .. انا والنيمة دي برانا .. وبعض الاصدقاء البجو يفقدوني .. ومن حسن حظي انو اصدقائي من بسطاء الناس .. مامن الحيشان .. ناس بحبوك بي جّد .. صاحبك يكون عامل وحافظ شعرك كله .. تمشي بيتهم قبل ما تعرفو كويس تلقاهو مبروز قصايدك .. تجي زوجته يوم وقفة العيد تخليك انت وزوجها قاعدين بره .. تراجع لي بيتي وترتبه وتجيب معاها الخبيز والحلاوة .. (بكي هاشم صديق )...
• .. ثم عاد ....
• ده كان مؤثرو مافارق معاي ممكن تقول كده .. جات رشاء بنت خالي ... شرقتني باهتمام وحنان وخوف خصوصا لما عرفت اني عيان .. وانا داخل علي العملية كانت بتبكي بحرقة .. الشاب الفرنسي المدخلني العملية سالني منها .. قلت ليهو دي اختي ... استغرب .. قال لي هي منزعجة جدا..قلت ليهو نحنا كده ... رشاء اعادت لي التوازن هي وبناته وصديقي الفرنسي( الجعلي ).. زول وقف معاي حتي شنطتي الجيت بيها مشي معاي السوق عشان نشتريها وكان مهتم بي جاد ..
• رشاء وعائلته اعادوا لهاشم التوازن النفسي ...!!
• اكدو لي انو الناس كلها ما واحد
• بعد العملية ليه مافكرت في فترة نقاهة علي الاقل في تولوز نفسها ...!!
• كان مفروض امشي اقضّي النقاهة في باريس .. وكان في كلام مع عبدالله بولا عن اقامة هناك .. المهم قررت ارجع السودان .. لكن لما قررت كان في سؤال كبير .. انزل وين وانا محتاج رعاية .. في بيتي هنا انا والنيمة .. قررت اتصل ببنت اختي ايمان خالد عبدالوهاب دي زوجة محمد وداعة .. ايمان قريبة مني .. اتصلت بيها قبل مغادرتي فرنسا بيوم .. في البداية اتخلعت .. وفرحت جدا لما عرفت انو العملية نجحت وصحتي كويسة .. جاي متين .. قلت ليها بكرة .. وقبل ماتسالني قلت ليها حا انزل معاك .. قالت لي سبحان الله انا قبيل بتكلم معاهم قلت ليهم ان شاء الله هاشم خالي لامن يجي ينزل معانا ..
• نزلت مع ايمان في البيت ..!!
• لقيته منتظراني في المطار .. شرقوني بالحب .. قعدت معاها تلاته شهور وانا احيانا عندي الحساسية .. حساسية مرات فيها هلوسة .. اسال نفسي كده .. الناس ديل مش يمكن اكون ضايقتهم .. يستحملوني بي ضيوفي .. شرقوني بالحب .. لما جيت ماشي الدوحة بكت بشدة وحرقة
• قرار الذهاب الي الدوحة وانت في فترة نقاهة مش كان متعب ..!!
• بالعكس انا كمّلت فترة النقاهة وكنت فعلا محتاج ليها .. قضيت وقت اسطوري .. السني وموسي الامير ووجدي كامل .. ناس رايعين وجمهور بيحبك ويحترمك .. تلاثه ندوات كل ندوة بعنوان مختلف .. اذا الندوة ساعة ونص مرات من المنصة للعربية بتعمل معاي ساعة ونص... وفي الدوحة برضو كان في عرض اقعد هناك وحتي الان ورقي هناك واحتمال امرق .. انا الان اشعر انني علي باب الخروج من السودان
• اتعلمت من التجربة ..!!
• علمتني التجربة دي ان المزيد من الصبر جيد وخلتني اكون قوي ومتيقنّ .. انا عارف انو جمهوري واسع وكان مفروض يكون في الصورة .. وانا برضو محتاج للدعم المعنوي لكن انا واثق انهم حايقدرو الظروف التي عبرها هاشم صدبق
• ملتزم الان بوصية الاطباء...!!
• الاطباء قالوا لي تمنع القلق ولا اخفيكم انني تعثرت صحيا حتي بعد العملية لوقت بسب (الزعل) وذهبت لدكتور عوض عبدالله قال لي في حاجات ممكن نلحقه وعندنا علاجه لكن في حاجات عندك .. ماتقدم تنازلات علي حساب صحتك .. لو الامور ممكن تخرج عن السيطرة غادر السودان ..
• قرار مغادرة السودان صعب علي هاشم ...!!
• شوفو انا لما جاي راجع من قطر لاول مرة اشعر اني ماشي للامكان .. دي اول مرة اشعر بالاحساس ده ..
• قاصد شنو ...
• ارجع اقرا قصيدة نعي جميل بتلقي فيها كل الحاصل ...
• القصيدة دي بتديك احساس وترجع تشيله منك ..!!
• في ناس هبشتهم .. وبكتهّم .. صدقني الظروف هبشتنا شديد .. عندي صديقة غابت عن السودان اكتر من سبعة سنين لامن جات راجعة مشتاقة لاسرته مالقته .. شعرت بي غربة
• لازلت حاسي باللامكان ..
• ايوه ..
• تعرفو حاصلة لي حاجة غريبة ممكن تعتبروها حاجة عاطفية .. انا من السودان ده قصوّهو ... (سكت )... وتابع .. (دمعتي بقت قريبة )... ماحاسي انو ده السودان .. بي ناسه وجغرافيته .. الوطن كيفنو .. بشيل ومابديك .. تفتكر رغم الفقر ماكان ممكن هاشم صديق يضايّر ليهو عربية بدل يمشي لي هسي بي كرعيهو .. كان ممكن ..
• طبعا ....
• نواصـــــــــــــل ...!!
