شلوت الترزي

موضوع: شلوت الترزي الأحد 20 يناير 2013, 5:48 pm

مستغرب مالك ؟؟ يا عزيزي القارئ ؟؟
جايي ( وردلب ) جاري علي بوستيني ..
مش في بوستات كتيرة غير بوستيني دا تستحق القراءة ..
ولا دار تشوف الترزي دا شلت منو ؟؟
عموما مرحباً بك هنا ..
هنا حيث تتشكل كل هموم الدنيا .. وآهاتها .. وغمها .. وتبدأ تشلت فيك .. واحدة واحدة .. هم فوق همهمة ..
الناس تتفرج وما قادارة تقول ( بغم ) او ( بقم ) .. فرقت شنو يعني .. Sad

تطلع من صباح الرحمن من الاوضة .. يلم فيك :
برد :: يشلتك ..
يا الله ويا آمين ... تتخارج من الحمام .. وتلبس هدومك الكوم والردوم .. وتطلع ( وحنكك يركض من شدة البرد ) ..
تطلع تدور العربية ( السيارة بتفخيم الراء ) يلم فيك :
برنامج في الإذاعة يشلتك ..
ومذيع :: يشلتك ...
ومتداخلين يشلتوك ..
وتبقي مارق بنمرة ( اربعة ) العربية ما تدور .. برضها تشلتك ..
مجرد دخولك الشارع العام ( الهاي واي ) تلم فيك الزحمة تشلتك ..
وتصل المكتب متأخر بي ربع ساعة ..
ودخولك المكتب عيون كل الموظفين .. تشلتك .. جاي متأخر .. التقول انا شغال في البيت الأبيض ..
مجرد ما تقعد في كرسيك .. يرن التلفون .. يشلتك ..
المدير يشلتك ..
رئيسك في العمل يشلتك .. وكمان ينق معاك .. بالانجليزي .. نقة شديدة ..

واحد قداد سااي جايي يشيل شيك .. ولا مصيبة زمان .. يقول ليك انت زول ؟؟ ( يعني انت سوداني ) .. ( لا لبناني مظلل ) تقول ليهو ايوا .. يقول ليك من وين ؟؟ تقول ليهو من الخرطوم ..يقول ليك : يااخ كان معانا واحد سوداني .. اسمو محمد عوض .. بتعرفو ؟؟ اقول ليهو لا لا والله .. يقول ليك يااااخ سوداني .. !! الله .. يعني انا بعرف كل السودانيين القاعدين في السعودية ؟؟ يقول انت مش من الخرطوم ؟؟ تقول ليهو ايوا .. يقول ليك محمد عوض دا زاتو من من حتة جمب الخرطوم اسمها دنقلا .. Laughing

هنا انت بتختصر الموضووع وتقول ليهو ايوا .. آآآي يااااخ بعرفو .. بعدها صاحبنا ينبسط ويقول كان شغال معنا .. لكن سبحان الله اتوفي تقريبا قبل 10 سنوات .. .. شلوت عينة Crying or Very sad

..
تتقدم شوية يجيك تلفون من واحد من اصحابك .. يحكي ليك ظروفو .. بالشرح المُمل .. وبعدها يقوليك عايز 1000 ريال لغاية نهاية الشهر الجايي .. وانت ( مقشط ما عندك حق الصعوط ) .. لكن ما بيصدقك .. يقول ليك الغربة غيّرتو .. وناس السودان كلهم قافلين منك .. فاكرنك زول مرطب .. وناسيهم .. وناسي حنانهم .. وانت الشلاليت شغال فيك .. واحدا تلو الآخر .. ..
تلفون من البيت .. التلاجة فاضية .. البنيّة عيانة .. الكهرباء قطعت .. سلك التلفون اتقطع .. .. الحلة وقعت من البوتوجاز .. إدفقت .. و ناس فلانة جايين يتغدوا معنا .. و ماشين المستشفي نحلل .. ( نحلل دي اكبر شلوت ) المحللن لها شنو ؟؟
تلفون من السودان : يااااخ الاسعار مرتفعة .. المصاريف اضاعفت .. الحال مائل .. الحقنا بي حاجة سريعة .. بتاع الايجار جننا .. ( شلوت ابراهيم الترزي عديييييل كدا )
تلفون من صاحبك .. ناسينا .. كبرت معاك .. بقيت جعـــ ...ـــة كبيرة .. مفتري .. لقيت الريالات ونسيتنا .. ما شغال بي ناس دفعتك .. نسيت ايام المصنع الجميلة .. ( شلووووووووت يبكي عديييييييييييل كدا ) ..
واحد جايي من السودان من اهلك .. شوف لينا شغل .. ادينا مصاريف .. اقامتنا لسة ما طلعت .. وصّلني ناس فلان وفلان .. وانت راجع تعال غاشيني .. ( شلوت مرررر وما بتقدر تحكو )
راجع البيت .. الصيدلية .. السوبرماركت .. غيار زيت العربية .. رسوم التايوتا .. وبعد دا واحد يجي قاطع قدامك يسب ليك ويسب لعمر البشير ( يستاهل cheers

) ويسب لاي سوداني منذ ابونا ( حام ابن نوح ) .. ويقول ليك سااارح وين .. مش تخلي بالك وانت سائق ؟؟؟ ( شلوت من سعودي عربي مقطع )
ترجع البيت داير تنوم ... تعبان مهموم .. مثقل .. منهك .. عطشان .. جيعان .. تلقي المدام لابسة احلي لبسة عندها .. ومتعطرة بأجمل عطر .. وووووووووووووووووووو .... وتقول ليك : نسيت يا حبيبي اليوم عيد زوجنا ؟؟ شلووووووووووت من طراز ( ابّاتيه الترزي ) ...
وبرضو تقولوا لينا .. شلوت الترزي مافي زيو ..
رحماك يا رب ..

موضوع: رد: شلوت الترزي الأحد 20 يناير 2013, 6:45 pm

والله يا خالد والشلوت مضايرني لدرجة اني طلعت من المكتب نص الدوام الليلة ومرقت البيت وكاضم من الوقت داك لكن اسه الحمد لله قدرت رفعت راسي حبه وضحكت ...
شكرا ليك كتير وتاني شلاليت كتااااااار وواحد ان شاء الله من كراع حصان دامر ولا من كراع حظ الكبيرة ديك.. وخليك دائما مشلت يا جميل..

خالنا الرائع ..
عارفك انك اكتر زول مشلت ..
ومن عهود سحيقة ...
ولم تكتفي منك دائرات الزمان ..
وشلوت حصان دامر وكراع حظ .. لعمر ابيك انها احلي واجمل واروع من كل شلاليت الهم والغم في عربة لا انتهاء لها ..
يسعدني دوما حضورك ..
وابتسم .. واضحك لردودك الرائعة التي تعتبر غذاء روحي .. في غربتي البهيمة ..
اشكرك مرار وتكرارا.. ( اتذكرت العبارة بتاعت الكيزان ) ( عنوة واقتدارا Razz

) .. بالرغم من انها ما عندها معني .. لكن خليها كـــ شلوت صباحي ..

يا لطيييييييييييييييييييييييييييف يا حسانى الزول يجى داخل المنتدى من الصباح تلم ليك فيه شلاليتك تخليه يجرى جرى لى بره ،،،،،،،،،،

يا اخوى فكها شوية قال شلاليت انتو فى دافورى ولا شنو ؟؟؟؟؟؟؟؟؟؟؟
كتابتك دوما تعبر عن حالتك المزاجية وهذا اكثر ما يلفت الانباه لكونها صادقة نابعة من جووووووووووووووووه بلا زيف او تكلف وكذلك الخال كما يحلو لك ان تسميه فهو ايضا يشاركك الحزن ويبدع معك
يعنى منتوج ثنائى خطرعديل كده
اها اقعدوا عافية اقصد اقعدوا شلاليت

ام تساب يا رائعة ..
شكرا لحضورك .. الزاهي ..
هي محطات الحياة .. تستوقفنا .. لكنتب علي جدرانها .. ما بدا لنا ..
انت والخال .. عندما تجتمون تشكلون لي اجمل لحظات الكتابة .. لانكم تدركون ما اكتب وما احس ..
شكرا لك .. ولا داعي للجري .. فـــ الجري دا ما حقي ... نتحمل كل شلاليت الزمان ونعبر عنها بمنتهي الألم ..

زمان كنا مفتكرين اصعب حاجة في الدنيا الشاكوش ولكن بعد داك اكتشفنا انو الشلوت حاااااااااااار شديد
والله يا خلودي شلاليتك عينه والغريبة انو كل يوم تأخد كم واحد منها , دا لو ما كانت كلها
لكن اكتر شلوتين بعاني منها بتاع السؤال الروتيني دا
انت زول؟ ياأخي دا انا ممكن اكون يوميا بجاوب عليه ؟ حاجة تجيب وجع المرارة
والشلوت الاخير من شلاليتك بتاع عيد الزواج دا انا كل سنة بنساهو واقع في محنة جديده
اللهم أكفنا شر الشلاليت ما ظهر منها وما بطن

ما براكم يا خالد وناصر وعلاء... الزيكم كتيرين بس كاتمين ...خاصة المغتربين.... حتي العودة للديار ولأحنّ الناس ... يا ناصر الحكاية شنو خالد بيقول ليك
(خالنا الرائع ..عارفك انك اكتر زول مشلت ..) الحكاية شنو .... ولا زي كلام الأخت أم تساب لاعبين دافوري ...
تواجدنا الكتير في المنتدي هروب من الشلاليت برضو ...
ويا أخي خالد وحسب كلام ناصر ( ولا من كراع حظ الكبيرة ديك.. ) عايزين نعرف الكراع ده مقاس كم ؟ عشان نقدر نحدد قوة الضربة .... ودمتم

موضوع: رد: شلوت الترزي الأحد 03 مارس 2013, 9:28 am

علاء الدين حسن بخيت كتب:: زمان كنا مفتكرين اصعب حاجة في الدنيا الشاكوش ولكن بعد داك اكتشفنا انو الشلوت حاااااااااااار شديد
والله يا خلودي شلاليتك عينه والغريبة انو كل يوم تأخد كم واحد منها , دا لو ما كانت كلها
لكن اكتر شلوتين بعاني منها بتاع السؤال الروتيني دا
انت زول؟ ياأخي دا انا ممكن اكون يوميا بجاوب عليه ؟ حاجة تجيب وجع المرارة
والشلوت الاخير من شلاليتك بتاع عيد الزواج دا انا كل سنة بنساهو واقع في محنة جديده
اللهم أكفنا شر الشلاليت ما ظهر منها وما بطن

شكرا استاذي واخي علاء ..
ولطالما هناك انواع من المعارك الحياتية
فثق ان البنية والدلدوم والكف وغيرها مازالت في الطريق
اما شلوت العيد .. فله طعم خاص .. فربما يلعب فيه جانب ( الحنك الرومانسي ) شيئا كثيرا .. فتكون لغة ( الرندوك ) هي المسيطرة علي الموقف ..

موضوع: رد: شلوت الترزي الأحد 03 مارس 2013, 9:33 am

نجم الدين دياب صالح كتب:: ما براكم يا خالد وناصر وعلاء... الزيكم كتيرين بس كاتمين ...خاصة المغتربين.... حتي العودة للديار ولأحنّ الناس ... يا ناصر الحكاية شنو خالد بيقول ليك
(خالنا الرائع ..عارفك انك اكتر زول مشلت ..) الحكاية شنو .... ولا زي كلام الأخت أم تساب لاعبين دافوري ...
تواجدنا الكتير في المنتدي هروب من الشلاليت برضو ...
ويا أخي خالد وحسب كلام ناصر ( ولا من كراع حظ الكبيرة ديك.. ) عايزين نعرف الكراع ده مقاس كم ؟ عشان نقدر نحدد قوة الضربة .... ودمتم

استاذنا الجميل الرائع والملهم نجم الدين
اشكر لك مرورك الرائع مثلك يا وريف ..
خالنا البهدير دا مشلت من زمن نسيبو عثمان سلطان كان حائم بين معتقلات حلفا والمصنع ..
مشلت من زمن خدو مشلخ ..
وشلاليت المغتربين دي عادية .. بس يا استاذ نحن بنستخدم ( الكركاسة ) حتي لا تصيبنا ( كراع حظ ) والتي تسأل عن قوتها .. فهي اضخم من ان تتصور .. كراع ارهقتها السنوات فاصبح ( شقها ) صعبٌ علي الازمان ان تسبر غوره ..

نقطة : 40098 تاريخ التسجيل : 01/01/1970

عدنا وعتابي لجميع العضوية ليه داخل كده قول لي كيف بس كده ......................... لم اجد بعد تصفح دام ال48 ساعة ولا حتي سوال عن الغياب الذي دام لمدة شهرين بلياليهم غصباً عني يا احبتي عارفين اليير وغطاها لاشبكة ولاغيرو لاميني بيكم مع جحيم العمل ولكن سيبك منو خليني اقول ليكم انااخترت البوست دا لاسباب عديدة بدون (شلاليت) اقصد بدون سبب اولها عشقي للعضويه الجميلة والثاني تفاؤل دايم بوجود ضالتي وراحتي عبر طيات المنتدي ولكم وللجميع اشواقي ولعلي الحق بالركب ان صح التعبيرالرائع دائماً الحساني والاساتذة لكم جميع الشكر اجزله الي اللقاء

موضوع: رد: شلوت الترزي السبت 09 مارس 2013, 9:10 am

الاخ الحبيب والصديق الجميل وليد سيد احمد
صاحب ورفيق دروب الحياة الشائكة ..
والله ساءلين عنك ..
ولكننا لم نجد من يجيب علي اسئلتنا فعرفنا انها مشغوليات الحياة وكدرها ..
ومهما تاخرتم فحتما ستأتون يا اصدقاء ..

مرحبا بعودتك من جديد .. لتحمل معنا الهم من جديد ..