عايزك تجي هنا ..
تقيف جمبي .. اوشي عليك الله خلي حركاتك دي .. الجو زاتو مسخن والحرارة مرتفعة
خلينا نخلص من الموضوع دا .. !!!
اوشي : ايوا يا حبة .. شايف خالد مستعجل .. عموماً برجع ليك بعد ما اشوف موضوع زولي دا ..
انا : اوشي يااخ انا نفسي اعرف انت الكلام الكتير دا بتجيبو من وين .. ؟؟
اوشي : من دكاني الكلو زنكي دا ..
انا : اوووف .. في اي وكت عايز تهزر .. ؟؟؟
اوشي : يا عمك خلينا نعيش اللحظة الفي شنو والمافي شنو .. خلدي يا قلب ..
انا : اسمعني هسة الزول دا بكون قاعد .. نشوف معاهو الموضوع ونحسمو ..
اوشي : خلاس ما ماشين نحن هسة .. يعني دايرني أأجر ليك كارو ؟؟
انا : هههههههه .. انت بتأجر كارو ؟؟ والله انتو الحلفاويين ديل تقول جدودكم شوايقة ..
اوشي : آآآآخ من الشوايقة ..
انت عارف .. كان قبل فترة انا وناصر البهدير نتجول زي جولاتنا دي.. وكل ما دخلنا محل القاهو ليك واقف .. مالك يازول يقول هنا كان عندي ذكريات مع زول رائع وجميل .. اسمو فلان الفلاني وفرتكان الفرتكاني .. يقوم يطلع الكاميرا يصور المحل .ز ويبدأ يسرد لي في الروائع .. بذكرني ليك ببرنامج ( رحيق الامكنة ) هههههههه .. ناصر داك زول جميل وموسوعة حلوة مفترض نستفيد منها ..
انا : اها هنا في حضرات القامات السامقة ما بتكلم معاك .. ناصر البهدير دا كان جا بي جاي كان خليتك ومشيت معاهو .. عامل لي عنقرتك الكبيرة دي ..
اوشي : جينا ماشين انا وهو بي جاي .. باالفة دي .. قال لي يااخ عمنا دامر الله يديهو الصحة والعافية .. ما بلاقهو .. آخد منو صورة واسلم عليهو وادفن جسمي بي احضانو ؟؟ لا هو ولا حصانو ولا كارتو ؟؟ هههههههه ..
قلت ليهو حليلك يا جميل .. حصان دامر هسع خبر كان زاتو ما عارف محلو وين .. ههه ..
وووو .. وووووووووو .......... ووووووووووووو .......
************************************************************
شباب سلام عليكم ..
الجميع وعليكم السلام ..
اوشي : يا جماعة نحن والله جايين نحل المشكلة .. لو انتو جادين بتنحل .. ولو كمان عايزين الموضوع يتطور كمان خلونا نمشي نشوف شغلتنا ..
ليلي : هو زولكم دا مالو بنكز .. ؟؟ لو كان وقف علي اللايكات ما كان احسن .. ؟؟ بعدين بعرفني من وين عشان ينكزني ؟؟ ينكزو يا يمة قطر عطبرة بورسودان .. .
انا : كدي هسة انتي ما تتكلمي قبل الرجال .. خليهو هو يحكي لينا بعدين انتي قولي كلامك .. ونشوف حكاية النكيز والايكات البقت منتشرة في حلتنا حدها وين .. اها يا محمد احكي ..
العجب : في احدي الممرات وانا بين قابع وسادر في غيي .. اذا بليلي الما بتغباني .. جاية من موقف لواري العرب.. اقوم يا زول اتكبكب .. واتكبكب لمن سفنجتي اتقطعت .. وبقييت اكشت .. ما قادر اصلحها عشان ما تخت في راسها ان انا زول حق سفنجة ما عندي .. ولا تخت في راسها انو انا زول كبكابة .. ههههههههههه والله بنات حواء ديل الواحدة فيهن تجهجهك لمن تقطع خيت نعالك .. اها المهم يعني المعني كدا .. مشيت البيت وبديت احكي لي ود خالتي .. عن الحب العذري الجنني دا .. قام قال لي هي مسجلة في الفيس بوك ؟؟ قلت ليهو : شن عرفني بيها .. قال لي دقيقة اديني اسمها بالكامل .. يازول اديتو ليك الاسم والبرج والهوتميل والفاكس .. قام قال ... لقيتها ليك .. اها لازم نعمل ليك حساب في الفيس بوك عشان تقدر تدردش معاها وتتكلم وتحنك .. قمت قلت ليهو يعني من هنا ولا قدام اكون فيسابي سااي ؟؟ قال لي آآآي .. ولازم تتصور صورة حلوة عشان تختها في البروفايل بتاعك .. وفعلا .. ظبط لي الحساب حقي يازول ومن ديك لحدي الآن انا عندي اكتر 1300 صاحبة في الفيس بوك .. بقيت زي جدي اسماعين اليوم كلو بقعد مع ست الشاي الخديرة ديك ولسة خاتة بنمبرها في حنانو .. المهم عشان ما اطلع برة الموضوع رسلت طلب صداقة .. وهي ما جايبة لي خبر
رسلت رسائل غرامية وهي ما جايبة لي خبر
رسلت صور ومشاركات وهي ما جايبة لي خبر .. آخيرا لملمت شجاعتي و ( نكزتها ) ليك نكزة خليتها اليوم كل تنطط تحلف تقول ما كلا ليها شطة ..
اها هي عجبتها ليك ( النكزة دي ) وبقت تنطط وتنطط .. لمن رسلت لي طلب صداقة .. وقمتو انا بدوري قبلتو .. وبدت القصص تكبر .. وهاك يا حبكانات واسكايبات وايملات وفاكسات وحاجات تانية حامياني ,, ... يطول الزمن وبقصر .. تقوم فاطنة بت احمد ود اللمين ترسل طلب صداقة .. ويظهر في يوياتي :: العجب ود الضو .. اصبح صديقاً لفاطنة بت احمد ود اللمين ... ( اعجب بيها ) تقوم يا زول ليلي تزعل مني .. كييييييييييف انا وفاطنة نكون اصدقاء.. ؟ وهاك يا شتائم .. وحظر حساب واعادتو تاني وحظرو واعادتو ..
المهم لعد زهجتني .. مشيت ( الخسوسية ) وعملتها ( بلوك ) .. تلاتة شهور هي بتحاول ترسل لي رسالة وما قادرة .. لامن دخلو الواسطات حتان فكيت حظرها .. .. وعشان اوضح ليها اني فكيت حظرها قمت ( نكزتها )
اللتاريها راجية دي .. ويلا قامت كلمت الدنيا والعالمين .. العجب نكزني والعجب نكزني .. و والله آخر زمن كمان جابت ليها ( نكيز ) ..
دا كل مافي الموضوع ..
اوشي : اها يا ليلي الكلام دا صاح ؟؟
ليلي : لا لا ما كدي انا لا بعرفو ولا حاجة .. بس من غير اي شي قام حظرني .. ( قصدي نكزني ) والله يا يوم الليلة صفحتي وجعاني من نكزتو ..
الجميع : يا زول هوي نحن هسة ليلي دي مودينها الدكتور .. لو ظهرت عليها اي آثار نكيز .. نحن ما بنرحمك ..
(((((((( يقوموا يا زول يودوا ليك فاطنة للدكتور .. وقاعدين الجماعة منتظرين نتيجة الكشف الطبي .. ))))
فجأة الدكتور يقول ليهم زولتكم دي ما خلو ليها صفحة فيس بوك ترقد عليها .. صفحتها كل يوم بتتعرض لاكثر من 20 نكزة .. ولو وقفت علي كدا كويس .. المشكلة الاعجابات وطلبات الصداقة الغير موافق عليها ... والرسائل الغير مقروءة .. وبعض من الدعوات والمناسبات .. دا السبب الرئيسي وراء تأخر حالتها .. ونحن هسع ما ح نفكها ح نرقدها في جناح خاص في شبكة قوية .. وشوية وشوية بنسحب منها الفيس بوك .. لاكيين .. لازم تشوفوا ليها عريس .. يكون فيسابي ..
الجميع : كيف يعني فيسابي يا ديكتور ؟؟
الدكتور : يعني يكون زول يومو كلو مصنقر في الفيس بوك .. وما ضروري هي تشوفوا فيس تو فيس .. بس يرسل ليها صورة بالفيس .. وبعد داك .. يكون العرس بواسطة الاسكاي بي .. واوضة نوم تكون فيسابية برضو ..
الجميع اها دي كيف .. ؟؟ عرفنا العريس الفيسابي .. اوضة النوم الفيسابية دي شن نفرها ..
الدكتور : يعني يتخيلوا انهم قاعدين في اوضة نوم .. ويدردشو مع بعض .. ويتخيلوا نفسهم ( هنايين ) .. .. ويعيشوا لحظتهم .. مع العلم ان البنت ممكن تتزوج ( فيسياً ) اكثر من عشرين رجل فيسابيا في اليوم الواحد ,, مش اخير ليكم من عريس واحد بس .. ؟؟ ولازم الكلام دا يكون مدعم بالاسكاي بي .. وبالتتالي دا زاتو بساعدنا في حتة بورة البنات ديل وبقلل تكاليف الزواج ..
وافق الجميع .. وبدأوا رحلة البحث عن عريس فيسابي ..
الغريبة انهم لقو اكثر 99% من ناس الفيس بوك هم اصلا عرسان فيسابييين ,, ومعرسين وما كلين الجدادة وخامين بيضة ,, ... هههههههههه حتي العروسة زاتها لقوها معرسا ليها 20 فيسابي .. الحل شنو ؟؟
براحة انا ويعقوب اوشي لملمنا بعضنا ورجعني بي خفي حنين .. وخلينا حنين حايم بلا نعلات ...
