الايام دي الناس نست موضوع لحوم الحمير .. فلحوم الخراف غطت على كل الاخبار , حتي لو في ناس اكلت لحوم الحمير ذاتو .. بعد الضحية خلاص اخيرا المعدة وجدت اللحم الذي تعرفه وتحبه , كتروا من لحوم الضان دي .. عشان تنضفوا بطونكم من اللحوم الما معروف مصدرها دي , شيلوا كفايتكم من لحوم الضأن لانكم ح ترجعوا تااااااااااني للحوم الحمير ..شكلكم كده , المشكلة كمان جابت ليها لحوم بعشوم في سوق حلفا .....! طبعا انا محتار في الزول الضبح البعشوم دا , وفي راسي مليون سؤال ...! هسي الزول دا لقي البعشوم دا وين ...؟ البحث عن البعشوم والجهد المبذول في القبض عليه .. اسهل منه انك تشتري خروف جلكسي عديل ... والغريب انو بعد ما تعب وقبضو وسلخو .. رماهو ...!! يكون اكل المرارة بتاعتو ورمي الباقي ..!! والمرارة دي لقي ليها شطة وليمون ..ولا ضربها كده ساااااي ..؟ المهم حاليا البطن اتعودت على لحوم الضأن .. واي زول بعد العيد يأكل حاجة ما تنفع مع بطنو .. على طول يعرف انو اكل لحوم بعشوم ...!! بعد العيد المثل الشغالين بيهو ( بطنك دليلك ) .. اي لحوم ما تنفع معاك على طول اعرف انك ( اتبعشمت يا معلم ) .
