أيوة لازم ى جميلة
نعود نغنى
برغم انو الحزن طول
زى تقول ما ليه أخر ولا أول
ما الوجع مليان غناوى
والحزن شايل حكاى
والبلد حيرانه تسأل
أيه بيحصل
وايه بيحصل
وحده وين هذا المسلسل
البلد صارت مفازة
والفرح سافر اجازة
والبيوت يوماتى تبكى
وكل يوم لازم جنازة
وبرضو لازم رغم هذا
ىا جميلة نعود نغنى
عشان طيور الريدة تسمع
والزغاريد تانى ترجع
والكلام الدابو لسع
فى صدور بنوتنا يطلع
ويبقى مرجيحات وشفع
أيوة لازم يا جميلة
نعود نغنى
وصوتنا يكبر
وريشنا يكبر
ونبقى تانى وطن محبة
والحرب نديها دبه
وتانى نرجع لوطنا
وتانى نقدل فى بلدنا
. . ما البلد حقتنا نحنا
ونحن أولادة الغلابة
وهية لينا الديمة يمة
ونحن ليها الديمة يابة
ونحن طالعين من جروفة
ونحن مارقين من ترابه
وكناديمة نغنى ليها
ولسه ما زالت حبابة
هى البداية
وهى النهاية
وهى الدواية . . وهى الكتابة
وهى الاغانى
اللسه جاية
وهى المسادير . . والربابة
. . اديك بلدنا
وديله نحنا
وتانى جايين زى سحابة
عشان يعود سودانا تانى
ويبقى فردوس للتعابة
ويبقى حرية وصلابة
أيوة لازم يا جميلة
نعود نغنى
برغم انو الحزن طول
زى تقول ما ليه أخر ولا أول
يا جميلة
كل بداية
ليها فى الاخر نهاية
والظلام
مهما طول
ليه اخر
وليه أول
