كيس الهبوب.. باب البذاءة واسع!
في حاجات كتيرة تطلعك من طورك مهما كان عندك صبر واخلاق كتيرة مدفقة.. حاجات بالجد تخليك تدي الواحد كف صاموتي.. وتبصق ليهو في وشو.. وتقول ليهو بعد داك دون حياء.. (........).. والكلام القبيح ده بعد ما تكون انتهيت منو هو في الاول.
صدقني لو لقيت واحد مصر يكضب عليك ومصر يواصل في الدعفسة دي وقلة الحيلة الما عندها معنى دي... أنت مضطر تنبذو باي شكل كان.. على الأقل عشان يعرف انو مسرحية (أعمل رايح) دي ما جايبه حقها!! والناس في النهاية بتصل لحقيقة اي كذبة ان كانت صغيرة ولا كبيرة!
دائم المستهبل والاوانطجي والأرزقي ذاكرتو ضعيفة وبصدق نفسو اكتر من اللازم بانو هو أحسن زول في الدنيا طالما سبحتو ترقش وماليه يدو الوسخانة دي ومع ده باستهتار وشوفونية يهزها في عين اي واحد.
ياااخي شوف ليك شغله غيرها وبعدين العبار ده ما قدر دماغك الصغير ده... صحي المثل البقول: (عرارة عرارة, أكل الفكي للمرارة, يبلها بي ريقو ولا بي موية إبريقو)..... وتاني في مثل برضو بوريك أن الدنيا مليانة بالنوع المفنوس ده مش للقروش لاي حاجة تخطر على بالك (متل ديك البطانة, ماشي مدلدل, وجايي مدلدل).
لعنة الله على الرزق البخليك تعمل ليك كليوات بالجنبة مليانة كلها شحم حرام ومنتظر يومو للدود والنار.
والكلام ده بخلي الواحد يقول بالفم المليان بانو الكوز ده ما ضروري يكون سياسي ومنظم في حزب الأرزقية وشغال مع النظام الواطي ده.. في أحزاب وكيانات تانية أم فكو قاعده في السهلة ساااى (لا في العير لا في النفير) بتاعة خموم وجرنبدية مليانة بكيزان أسوا من الكيزان البنعرفم على الأرض.. للاسف قاشرين بادوات نضال سااااااااااااى... أظنها طرحة نضال!!.
معليش:
مرات الواحد محتاج يكتب الكلام القبيح ده لما يلقى ليهو واحد بمثل عليه بخبث وفهلوة لا حدود له ومصدق نفسو بانو هو شاطر جدا!
صحي... لو طال عمرك بتشوف ضبح الجمال!
صحي النوم يا (كيس الهبوب) قبال ما تلقى روحك محروق في دفسة كوشة!
