عزاء خمسة نجوم...

قبل كم يوم قريت خبر في الجريدة ماعرفت اتفاعل معاهو كيف .. الخبر تحت عنوان تكاليف الموت تزداد غلاء في بريطانيا .. قالوا انو الجنازة بقت تكلفهم مايعادل راتب 4 شهور .. 7300 جنيه استرليني يعني تقريبا 300 الف جنيه سوداني .. وقالوا انهم عملوا دراساتهم ونصحوا الناس انهم يعملوا حسابهم من بدري عشان ماينضغطوا .. .. نفسي اعرف بس حيعملوا حسابهم كيف يعني .. مثلا يلموا قروش من بدري ويقولوا عشان لما فلان يموت ؟؟!! ولا ياربي الواحد فيهم بكون عارف نفسه حيموت بتين ويكلمهم قبلها بفترة كدة عشان يجهزوا نفسهم .. استغفر الله العظيم يارب ..
المهم الخبر ده طبعا طوالي رجع بي لبلدنا الحبيب سودانا الجميل .. وخلاني افكر اعمل دعوة للبريطانيين عشان يجو يشوفوا تكاليف العرس قصدي العزاء كيف ؟؟!!
ماملاحظين معاي انه العزاء بقى يكلف زي العرس واكتر منه كمان ؟! وبقوا الناس يخشوا في ديون عشان يقدروا يغطوا مصاريف ايام العزاء .. ماشاء الله الناس بكون مجتمعين لمة وونسة وضحك واكل وشراب زي كانهم في بيت عزومة او عرس مش في بيت بكا .. وكمان صينية الاكل فيها مالذ وطاب من الاكل والمقبلات وفاتحات الشهية والمشوي والمحمر والمحشي .. وبعد شوية قهوة وشاي والمغربية شاي حليب ولقيمات .. ويجيك صوت يقول ليك فلانة دي عندها ضغط مابتشرب القهوة ولا دي عندها حموضة مابتشرب شاي اعملوا ليها عصير .. وطبعا لو انفتحت جبهة العصير الجميع داير .. وتكاليف مابتنتهي والناس تخش في ديون تقعد تحلحل فيها بالسنين ..
زمااان الناس كانت بتساعد بعض وتشيل بعض ولو حصل لزول ظرف بتلقي الناس واقفين معاهو ويختوا ليهو في الكشف عشان يتساعد بيهو وتلقى مثلا بيت فلان طلع الفطور وبيت فلان طلع الغدا وبيت فلان طلع العشا وبيت فلان طلع الشاي والقهوة وكدة .. لكن اسه اهل العزا ياكلوا نارهم براهم .. والعجيبة لو ماكانوا ناس مواجبين وبختوا للناس في كشوفاتهم خلاص الرماد يكيلهم زول بخت ليهم ماف .. مااصلوا الحكاية بقت اعمل لي واعمل ليك .. حاجة لله ماف .. صحيح والله الجمرة بتحرق الواطيها بس الزمن ده ..
بيوت البكيات بقت عبارة عن فرصة للتجمع والونسة دون مراعاة لشعور أهل الميت ودي حاجة انا شفتها وعاصرتها بنفسي وكنت كل مااسمع الناس تضحك انا ابكي بحرقة اكتر .. صحيح الحي ابقى من الميت لكن كمان لازم نراعي شعور الاخرين على الاقل في الايام الاولى من العزاء ..
وفعلا كدة بنطبق المثل البقول ميتة وخراب وديار ..اها رايكم شنو؟؟؟نطبع كروت الدعوة؟؟؟

شكرا انيقا نازك ولكن لا داعى لطبع الكروت لانه ينتهى العزاء بانتهاء مراسم الدفن ولا شنووووووووووووووووووووووووو؟؟؟!!!!!!!!

موضوع: رد عزاء 5* الثلاثاء 20 ديسمبر 2011, 8:48 am

تبقى مصيبة كبيرة إذا التكافل بين الناس إنتهى
الحمد لله لازلنا فى مجتمع المصنع نتكافل ونواسى
أهل الميت وبالذات فى البركس أيام الفراش الأكل
الذى يشارك به الأحباب يكفى الكل ويزيد ودائماً
نوجه أصحاب المأتم بتقليل التكلفة,وفى السنين
الأخيرة تم شبه إتفاق على إختصار المأتم فى يومين
فقط.نرجو أن لاتنتقل إلينا عدوى المآتم ذات النجمات
الخمسة والتى نسمع بها فى البنادر,لدرجة أن النساء
يتبرجن فى الملابس والزينة والحُلى والحُلل وقالوا
واحدات يتحنن حنة جديدة عشان ماشات بيت البكا
إلى أين يسير هذا المجتمع السودانى الله أعلم...
اللهم إنا نعوذ بك من البطر والرياء والنفاق....
آآآآآمين...

اذا كانت المرأة تتحنن للعزاء فهذا جهل ما بعده جهل للأسف حريمنا أصبحن لا يفرقن بين ما هو ملائم لبيت (البكاء) وما هو ملائم لبيت العرس فالمناسبتين عندهن سواء ما دامت فيها لمّة ناس فتعرض وتستعرض ما لديها ولا يهمها مشاعر أهل الميت .. النساء عندنا في حوجة لدرس عصر في التعامل مع المناسبات ولكل مقام مقال
أمّا بالنسبة لتكافل الناس في المآتم فما زالت المجتمعات القروية متمسكة بتقاليد الأجداد وبالرغم من الكم الهائل من الأكل الذي يأتي به أهل القرية الاّ أنّ أهل الميت يؤجرون الطباخين وينحرون الذبائح تحسباَ لوصول عدد كبير من الضيوف
حتى أولئك الذين يعلنون أن العزاء ينتهي بنهاية الدفن يدخلون في ديون بسبب تدفق الناس عليهم ... المجاملات لن تنتهي ولن يرضى السودانيين بايقافها ولكن الاقتصاد مطلوب لكي لا تصبح ميتة وخراب ديار !!!

عبد الرحمن موسي ادريس كتب:: تبقى مصيبة كبيرة إذا التكافل بين الناس إنتهى
الحمد لله لازلنا فى مجتمع المصنع نتكافل ونواسى
أهل الميت وبالذات فى البركس أيام الفراش الأكل
الذى يشارك به الأحباب يكفى الكل ويزيد ودائماً
نوجه أصحاب المأتم بتقليل التكلفة,وفى السنين
الأخيرة تم شبه إتفاق على إختصار المأتم فى يومين
فقط.نرجو أن لاتنتقل إلينا عدوى المآتم ذات النجمات
الخمسة والتى نسمع بها فى البنادر,لدرجة أن النساء
يتبرجن فى الملابس والزينة والحُلى والحُلل وقالوا
واحدات يتحنن حنة جديدة عشان ماشات بيت البكا
إلى أين يسير هذا المجتمع السودانى الله أعلم...
اللهم إنا نعوذ بك من البطر والرياء والنفاق....
آآآآآمين...

والله فعلا لسه الدنيا بخير والسودان بخير

عندنا الناس الغبش واهلي في الجزيره يكون سيد العزاء
يتفرج وتقوم الناس بالواجب الاجتماعي
اي زول يجيب غداه ووفطور والشي البعجبني
شاي الصباح سادتي لسه السودان فيو خير يا جماعه
واهلنا في الريف والغبش ما زالو متمسكين بباقي القيم
ولكن توجد النقاشات وكلام الكوره ومشكله الدمازين

واكثر ما اعجبني وجود جمعيات في كل حي تقوم
باجراء اللازم للماتم وتجمع ماتبقي من خساره العزاء
وتقسم علي الاعضاء والفائض يسلم لاسره الفقيد لان العزاء
يستمر ايام
ولسه الدنيا بخير

موضوع: خمسه نجوم السبت 24 ديسمبر 2011, 12:14 pm

حقيقه والله خمسه نجمات الماتم
الناس عارفه هي بتعمل في شنو بالنسب ياخ عبدالرحمن يعني الواحده بتمشي غبشه بتلاقي ناس الماتم هم زاتهم لابسين شيك والله بالجد انا حضرت في البندر كتيرلان انا لما بمشي بفتكر الاقي الناس العزاء لابسين مثلا عادي لا والله من اللبس لي نعلان يعني حاجه مباااااااااااااااالغه والله بتذكر مشيت عزاء لصاحبتنا فانا كنت حزينه بعد ماعزيتم بس صاحبتنا هي بدت تتونس مع الناس وتتبسم معاهم ما عايزه اقول تضحك لان ماف زول يصدقني بالجد دا الحاصل لو الزول مشي اغبش الناس تكون نايره وهو زي الكلمه الشاذه

الله يعين الجميع

» الآبري
» أغبى خمسة اسئلة في العالم
» خمسة ايام فى حياة كل انسان
» خمسة جُمل لاتقلها للمرأة....
» عزاء آل سيد