عنبر السرة

موضوع: عنبر السرة السبت 07 يناير 2012, 4:07 pm

إنتهت وقت الزيارة في عنبر السرة وإنصرف الزوار بعد أن إطمأنوا عل حالة المرضى وفتحت رقية كيساً كان قد أتى به إبنها ميسرة ووجدته مملوءاً بالتسالي فأخذت توزعها على النسوة في العنبر وقالت السرة لرقية في إستغراب شديد بعد أن نالت نصيبها من التسالي وأخذت تلتهمها الواحدة تلو الأخرى:
" إنتي يا رقية يا بت أمي ولدك ده جايي من الإستاد ولا شنو؟
فقالت لها رقية وقد ناولتها مزيداً من التسالي:
" إستاد شنو يا السرة أختي؟
مباراة الهلال والمريخ لسع باقي ليها أسبوع
ولا بتسألي عشان التسالي؟
فقالت لها السرة: " آآآيي بسأل عشان التسالي
أول مرة أشوف لي عيانة يجيبوا ليها تسالي"
فجأة قاطعتهن خديجة زاجرة:
" هووووي يا حريم هوووي
ما تدفقن القشر في الواطة!
حسي بتجي السستارة
تعمل ليها شمطة ما ليها آخر"
فجأة دخلت عليهن الدكتورة سوزي التي تعوج لسانها بالإنجليزية
بين الفينة والأخرى وقالت لهن:
That is disaster!
أي هذه كارثة
فهرولت النسوة وأخذت كل واحدة منهن تلم قشور التسالي وتنظف المكان
ثم دنت الدكتورة سوزي من السرة وقالت لها:
" مالك فكيتي الدرب؟
فقالت السرة بصوت خفيض جداً:
Leave me alone
أي
" دعيني وشأني"
لكن الدكتورة قد سمعتها وأخذت تطلق ضحكة مجلجلة وسألتها مستغربة:
" هااا يا السرة بتتكلمي إنجليزي كمان
حكمة والله وحكاية تشغل أذهان العباد"
ثم إنصرفت وهي لا تزال مستغرقة بالضحك
وما إن إختفت عن الأنظار حتى تعالت ضحكات النسوة ساخرات من السرة وسألنها:
" هوووي يا السرة كلو ده يطلع منك؟
وين تعلمتي الإنجليزي يا شقية الحال؟
فقالت السرة: " أبداً ما بعرف إلا العبارة دي
سمعتها من بتي هويداً كلما أقول ليها أعملي حاجة
ترد علي بالعبارة دي"
فقالت رقية :
" ووواووو"
Wow
فقالت لها آمنة:
واو ولا جوبا إنتي كمان
أها ده كمان من رأسك ولا من كراسك
فقاطعتهن خديجة سائلة:
" إنتو يا حريم بونا أبتيت يعني شنو؟
bon appetit
عشان أنا ما عارفة إنجليزي كلو كلو
فقالت لها السرة ساخرة:
" معنها يعني بتك إسمها بونا"
فقالت خديجة مصرة على سؤالها:
" لا بالجد معناها شنو؟
عشان سعاد جارتي كلما تخش علي في البيت
وتلقاني قاعدة آكل تقول لي الكلمة دي
فقالت لها آمنة:
أول حاجة يا خديجة الكلمة دي ما إنجليزية شكلها فرنسية
والظاهر والله أعلم معنا بالعافية والهناء والشفاء"
وفجأة دخلت الممرضة حاملة ترولي الأكل
فصاحت خديجة بأعلى صوتها وهي تستعدل في جلستها:
" بونا أبتيت"
السفسة جااات
عنبر السرة 333zhif

موضوع: رد: عنبر السرة السبت 07 يناير 2012, 9:58 pm

شكرا ايتها العائدة بقوة نازك
وللمزيد من حكاوى السرة ونقلا عن منتديات النادى السودانى
هاكم الرابط لمزيدا من الضحك

[ندعوك للتسجيل في المنتدى أو التعريف بنفسك لمعاينة هذا الرابط]

موضوع: رد: عنبر السرة الإثنين 09 يناير 2012, 8:45 pm

تسجيل حضور اول
و وعد بالمشاركة

» السرة بت عوض الكريم