اصلو حبك ده اكبر***وكلو يوم جوايا بكتر
شايلو حبك دوام معايا
ومافي يوم بنساك فيهو وبسقي حبك من سمايا
وديمة فرحان بيك مفرهد خاتي ريدك في رواية
ومستني يوم تديني منو والقي منك بس بداية
الا قلبك انت قاسي وخالي قلبك يامنايا
وقلت كل البينا خوة وشفتي لي حبك سوايا
اصلو بس هاماك نفسك عمرو ما هماك بكايا
ولا في يوم حنيتي قلبك لا خطاك سارت ورايا
وبس بعادك لاقي منك وكل يوم بزداد شقايا
وبين حيط مقفولة عشت اعلم الريد الزوايا
واتوه بي قلبي احلم وتبقي اهاتك غنايا
ومن عزاباتك فترت ومن شجونة الديمة جاية
ومالقيتك في جمبي فرحة واصلو دايما بس برايا
حرام احبك واهوي زاتك والصبر كمل هوايا
وما عرفتي الحب حقيقة او محطات الدراية
لما يغرس زول هواهو برضو بحتاج السقاية
ومن طرف واحد احبك اصلو ما بتنتج نهاية
وياخي حسي وصحي قلبك كان صحيح فيهو النوايا
وقدري الزول البحبك خاتي حبك في الحنايا
وعمرو ما فكر في غيرك او يسيبك لي النهاية
ياخي جنيت من هجيرك جاي ليك كايس دوايا
جاي احلم بي ربيعك واسقي دمك من دمايا
اصلي مفتون بيك معذب وديمة طيفك كان مرايا
هسي بختم ليك كلامي وبنفس العبرة الجوايا
اريتو قلبك يبقي صاحي يبقي ماداير وصايا
وتبقي روحك روحي زاتها وبيها اهرب من ضنايا
