الغربة مرجيحة هوس

الغربة مرجيحة هوس
الوسيلة محمد النور محمد الأمين

نقرطته للجـفـلـن يقيفـن ألمهن
وتكيت لهن طبق المعاني غناء وعلوق
حنستهن وكيت أحن هربت غناى وقولي شوق
كان يجبرن خاطر المشاعر ويشفقن
حانات علي القلب الشفوق
ونسته نجمات السعد
يبقـنلهن وجهة ودليل
كنسته درب الأغنيات
دررته ضرع الكلمة بالإحسان يفوق
وفرشته إحساسي ورضاي
ما أحساسي من غيرن ذليل
حجلته بالذوق والسكات تعب الصبر
شان يستريح ضلا ضليل
حنسته ريح الشوق تسوق غيما يضلل دربهن
ينزل يبل ريق العطش
صقع التباريح النشف
والدنيا زيف
كيفن يجف
ما الكلمة بتنقع حروف
والغنية شلال ما بيقيف
هي المنية بتسبي وتـفـقي
وحابلة بالوعد الشريف
وأنا حيلتي بس آهة وصبر
ما الآهة ترياق العشوق
زى ما الصبر ضل الفرج
والمرة بتبين للبضوق
ما الكلمة مرواد الصدق
هو القبلي سلطان البروق
و أنا أصلي من غيرن شقي
دماعي ما بتصفى وتروق
أوجاعي بتناتل أساي
وشموسي مابتطلع شروق
آهاتي مجروحة حيا
وهواي مالاقـيلو سوق
من فرقهن شاخ البدن
لا ضحكة لا فرحا بيتوق
ومحنته تكيت من عندهن
ناديت ولا هن بسمعن
غنيت ولا حـسن غناي
رسلته دعوات الصلاح
قمح بلاهـن قـبلن
وقعدته موجوعا براي
ورميته حظي علي الودع
صقعـته وإتغـبن سماي
دنقرته وآسيت الرمل
أداني صرة وجودلة
وأداني زاملة بلا رسن
أداني قمحيلة وطريق
لا حـمدن سـر الكلام
لا فرحـن خاطر القصيد
لا جـمـمن في لهاتو ريق

لا لخلخن فرحا قديم
شان ينبسط حزن الليالي الروحـن
لا زحزحن همي وأساي
وكـتـفـته إيدي وبكيت
وبكيت . . . . . .
وبكيت معاي كل الخلوق
ما أنا عارفو
كضابا بغـش
لكن بطمن في الضمير
علشان مناي يهـدالو بال
وروحيتي تـتحيـن صبر
هن فارقن . .
مرقن قبل يستأذنن شرف الرحيل
ديل حنطن شوقنا ومشن
وآرن وعودنا علي التراب وإتسارقن
زي ما أتسرق نوم العيون من فرقهن
شالن حروفنا وكحلن
جفن المسادير إنتحاب
باعن ضميرنا بلا تمن
ما أتعودن زيف الغياب
لا المرقة من رحم الوطن
شيل الهموم و الإغتراب
لا الفرقة لا الأسى لا الشجن
لا الوحشة في الزمن الخراب
من غيرن الأيام قسن
عـقرانة رحم الأمنيات
ليلاتـنا بالحب ما صفـن
نبض المشاعر فينا مات
نزفـن جروحنا وما شفن
وإتمحقت بينا الصلات
مطر المواجع ما صبـن
ما الريد رحل من سوحنا فات
وعمرنا بالحسرة إندفـن
جفت شواطىء الذكريات
ما أتمخضت فينا الحروف
لا بشة في دنيانا ريع
صبحت قلوبنا ملانة خوف
عرقانة في عز الصقيع
مزدانة بالفرحة الحروف
لكن حزنا إنشره قـيع
ناقوسنا . . .
ناقوسنا بالوجعة إنغـبن
هيت وجيعنا وفينا بات
قادوسنا بي ري بورنا ضن
عقرن ضروعو وغاورن
ما عيونا بالأشواق بكن
طول السهر والنوح شكن
بالحرقة للنجمات حكن
عشعش في روحنا الهم سكن
وحرفنا دا السكتة إتمكن
حزنت ليالي الأغنيات
ما القول سدد خدو الدموع
يا حروف كفاكن أرجعن
ما الغربة مرجيحة هوس
عودن عشان تصحى الشموع
ما أحزانا بكرة بودعن
والقمرة بتعاود الطلوع
وشموسنا بالحب يسطعن
بالرحمة بتفافي الضلوع
وحروفنا في النم برتعـن
حنستهن ياحروف كفاكن أرجعـن
ما الغربة مرجيحة هوس
ونستهن إيه الرجوع
يا حروف كفاكن أرجعـن
ما الغربة مرجيحة هوس

انه الغربه والاشواق استاذى ناصر وهى التى تحرك مكونات الابداع السودانى بكل مكوناته وان كنت اصر على
وجهة نظرى القديمه وهى ان شعراء الشمال وخصوصا شعراء الطمبور هم الاكثر تاثرا بالغربه وهذا يعود
الى حنين انسان تلك المنطقه وكم كانت الامنيات بانشاء بوست يحلل ويوضح كيفية التناول الذى يتم للغربه فى الغناء
والادب السودانى وليتك انجزتا لنا هذا الحلم الذى نطالب به وبشده استاذنا القدير البهدير
فلك التحيه والاشواق

» محن .. في الغربة ..
» طعم الغربة . .