ظرفاء سودانيين

اولآ:- الفنان ابوداؤد

*** ابو داؤود مشى بيت فرح على اساس احياء حفل ،
لاكنه وجد الفنان القدير المرحوم / خضر بشير واقف على المسرح ويغنى
ومعروف بانوالمطرب خضر بشير بنفعل مع الغناء
عندما وصل ابو داؤود ووجد هذا المنظر سحب ليهو كرسى وقعد
يتفرج وهو زعلان جدا ، وكان امامه طفل واقف يشاهد فى المطرب خضر بشير
قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك....

*** ابو داؤود كان شغال حفلة وانتهت متأخرة ناس العرس اصروا عليهم يبيتوا في بيت العرس...
في الصباح ابو داؤود بتسوك في الماسورة جات ماشة بي جنبه مرة كبيرة في السن قالت ليهو إمبارح العب ساهر بيكم يا ولدى...
قال ليها:-والله ياحاجة العتب على النظر !!

***ابوداؤد كان بغنى فى حفلة والصف الاول كان
كلو جكس حجم عائلي...كلو واحدة اسمن من التانية
وبعد الاغنية الاولى قام الجماعة كوركو ليهو:-
بالله يا استاذ فريع البان ...قام عاين ليهم وعاين
للصف الاول...
وقال ليهم فريع البان كيف مع شجر التبلدى بتاعكم دة؟؟؟

***** ابو داود بغنى فى عرس والحفلة اشتغلت لحدى الصباح، ولغاية الوقت ده العروس والعريس ما جو، ولا شاف ليهو عروس ولا عريس لحدى ما الحفلة انتهت، بعد ما الحفلة انتهت قام قال للجماعة فى الميكرفون:-
انتوا يا اخوانا عرسكم ده خبر ولا شنو ?؟؟

****
الفنان النعام ادم طبعآ كان (اعمى) وراقد فى المستش فى عنده حبس بول
ابوداود مشى ليه زيارة فى المستشفى
وبعد السلامات والتهانى بالسلامة
قعد يتونس مع باقى الناس الجايين للزيارة
قام فجاة كده ابو داوود سكت مسافة طويلة وباقى الناس بقوا يتونسوا
قام انعام ادم سمع صوت الناس بس وقايل ابوداوود مشى ولا طلع من الاوضة
قام قال ليهم :-انتوا العب ده مشى ولا شنو؟؟
ابو داوود رد ليه:-
انت علشان حركاتك دى الله قاطع منك موية ونور

ثانيا:- الدكتور عوض دكام

***عوض دكام في مرة سايق العربية بتاعتو
وقف في اشارة
اتلفت يمينو لقى
حامد بريمة
حارس المريخ السابق
سايق لفت باك حمراء جديدة
ضرب ليهو العربية بيده
وقال ليهو :
ياعب لو ما كورتك دي
والطب بتاعي ده
كان مكاوينا تتطاقش

****في عيادته في بحري وهو يعالج احد المرضى
..وعنده تلفزيون في داخل العيادة وبدأت مباراة هلال مريخ
..ومعروف عنه انه لازم يحضرها في الاستاد
...خرج الى الصالة ووجد مجموعة كبيرة من المراجعين والمرضى
...واتلفت الى التلفزيون ورأى ان المباراة ستبدأ ...فالتفت الى المرضى قائلا
انتو عاوزين الجد ولا ابن عمو؟
انا من ما فتحت العيادة دي ما شفت واحد كتلو ضرس
امشو وتعالو بكره
وما في زول بيكتلو ضرس !!

****المرحوم الدكتور عوض دكام ايضا ومما يحكى عنه انه فى ذات مره
كان فى عيادته فدخلت عليه امراه عجوز فاستغربت من هيأته
وقالت له (ياهو انت عوض دكام؟) فرد بالايجاب,
فقالت: كنت قايلاك سمين وحلبي.

فاجاب: ولقيتيني ازييييرق وعفين!!!

شكرآ اختى ناهد ولك التجلة والاحترام واامل ان تزودونا بالجديد لديكم ....مع فائق تقديرى

مواصلة لسرد طرايف ظرفاء السودان نواصل مع احد اقطاب الظرافة بالسودان
ثالثآ:- احمد عمر الرباطابى

*** عمنا احمد عمرالرباطابي عليه رحمة الله مرة جماعة عندهم زواج فقرروا انو يجيبو فنان من كريمة يعني شايقي وقالوا :- احمد عمر دا اصلنا مابنجيبو المهم عمنا احمد عمر سامع كل الكلام وساكت....
المهم قدر الله انو الفنان المتفقين معاهو حصلت عندهم وفاة فرجع ليهم القروش فكان ماعندهم اي مفر سوي اللجوء الي احمد عمر وكلهم خائفين من ردو المهم في واحد تشجع وقال:- انا بكلمو...طبعا عمنا احمد عمر عندو كل التفاصيل وعارف الزنقة المهم مشي ليهو ولازم المقدمات فقال طبعا انت فنانا الكبير والضفر مابتطلع من اللحم وانت وانت فرد عمنااحمد عمر قول للجماعة قالولكم انا لمن تضايقو حتن تجونى؟؟؟؟

**** عمنا احمد عمر الرباطابي قالوا ليه الفنان النعام ادم اتكلم عنك كلام مافي محلوا فقال ليهم كمان مالو شنبو الزي الساعة ثلاثة الا ربع

*** فى مرة كان معزوم في سماية في الخرطوم وكان من ضمن أصناف الغداء صحن كمونية وفي ولد من أصحاب البيت لافي على الضيوف يا أخونا عاوزين حاجة ؟؟؟ظ
قام عمنا أداه الصحن بتاع الكمونية وقال ليه:-
لو سمحت جيب لينا كمونية...الولد أخذ الصحن ودخل جو الظاهر الكمونية خلصت .. بعد فترة الولد جاء راجع بدون كمونية وكرر نفس الكلام يا أخوانا عاوزين حاجة؟؟؟.. قام عمنا أحمد عمر قال ليه عاوزين صحنا الفاضي .

*** وكان رحمه الله عندو طرائف كثيرة مع أحد أبنائه:-

1) الولد كان بيسقي في الحواشة قال لي أبوه الحيضان ديل أسقيهن؟؟.. قال ليه لا ديل صايمات

2) مرة قال لي أبوه الفار الفار .. قال ليه يا ولد أنا كديس ؟ الولد قال ليها نان أنا قتلك أكلو؟؟

3) الولد جاب لي أبوه شاي وملا الكباية تب .. أبوه قال ليه ماليها كدى أدنقر فيها .. الولد قال ليه ما تدنقر فيها موج

*** جاء الى قريه اخرى بحماره الأبيض المشهور ومعروف اول ما يصل الفنان يجي واحد يستلم الحمار وينزل منو السرج والبردعة ويملص اللجام ويسوق الحمار يربطو في محل كويس ويديهو احسن الأكل وهو برسيم ولا قش اخضر وكدة.. ففي أثناء احدي فواصل الحفلة وقعت عين احمد عمر على الزول الساق الحمار قالو.( آ جنا الحمار جيهتو؟؟؟
قالو باللحيل؟ قالوا أديتو شنو؟ قالو:- ختيتلو( تبن) وختيت ليهو جردل موية. فقال احمد عم:-
( ما أديتو معاهن محارة عشان يبلط ليكم بيوتكم المشققات ديل؟)

*** عمنا احمد عمر طيب الله ثراه كان بيزور واحد صاحبه كل بعد فتره وصاحبه دا بيخاف من شيل الحال وكل ما يجيهو احمد عمر يضبحلو جداده وفى مره جا _احمد_وسال ولدو وين ابوك ؟
الولد:- تحت (يعنى فى المزرعه)
احمد:- امشى قولو الصبره جات

*** قالوا مره عندو صاحبو مغترب بره السودان اول ماسمعبو جاء مشى يزورو
ومتوقع منو هدية كويسة قام اداه فتيل ريحة وبس احمدعمر قال:-
للولد ابوك ده شم ليه ريحة ماكويسة فينا ولا شنو؟؟؟؟

*** مرة عمنا احمد عمر بيتغدى جو جماعة بيسالو عن حلة قبل اى سوال طوالى هجمو على الغدا فى ثوانى
كملو الغداء قاموا سالو عمنا احمد عمر عن الحلة (بعيدة شوية) قال ليهم :-
اكان مشيكم زى اكلكم دة حسع بتصلوا

*** عمنا ... احمد عمر ... عليه رحمة الله ... كان طريح الفراش فى مستشفى السلاح الطبى ...دائما يكون راقد و مغطى وجهو ... الجماعة كلما يحضروا لزيارته ... ابنته تقول ليهو يا ابوى اكشف وشيك ناس فلان جوا يشوفوك ... لما الحكاية كترت ... صرخ فيها يابت نابحانى اكشف و شيك اكشف وشيك ... انا شنطة شيلة؟؟؟

*** قال للرئيس فى ابوحمد ايام ازمة السكر:- نحنا هينيين بى نشرب الشاى بالتمر .. الكلام ناس حوش بانقا إلا يشربوه بى روب

رابعآ :- ود الزومــة

***
ود الزومة قاعد في الكرسي برة في الشارع البيت المقابلو طواالي فيهو بابين...سيد البيت عندو تيمان اولاد يشبهو بعض ...الوقت داك كان بلعبوا زك زك دة يدخل بالباب الصغير اخوهو يمرق بالباب الكبير ود الزومة عاين ليهم قال: هلاّ هلاّ فاكس.

*** مرة مشي مناسبة غداء دخل البيت في الحوش شاف راجل عجوز قاعد في المصلاية يدعو ومعلّق السبحة في اضانو...ود الزومة عاين للمعاهو وقال:- ذي العجلة الجنزيرا واقع

*** مشي المستشفي يزور بنتوا بعد الوضوع؛ جابت تيمان راقدين جنب بعض واحد فيهم بكي شالت التاني لقتو نايم ختتوا وشالت الببكي ...ود الزومة قال:- هلا هلا مدير عام قدامو تلفونات (تاني يوم لقو واحد ميت)


*** مرة قالو واحد ماشي في الشارع شافو من بعيد خاف على روحو خوف شديد
قام لقا ليهو عمود كهربا وقف وراهو عشان ود الزومة ما يشوفو
ود الزومة متابع..قام قال ليهو:-
اطلع من ورا العمود دا ما بسحرك عامل كدة زي الساعة اتناشر

*** قالو ود الزومة كان قاعد في بيتهم شاف ولدوا الصغير
بيحبي قدامه . وبعد شوية جاءت امه بتسال من
الشافع قام قال ليها باري درب المحرات ده حتلقيه
مشت تفتش عليه لقته لدغته عقرب واتوفي في الحال

سلام بعد غياب طويل عن المنتدى
تحياتي مجدي ادينا من طرائف خالك كردي

مجدى حسن شريف...
Like..

هلا بيك الاخ الفاضل/عبدالرحمن موسى ولك كل التجلة والوفاء لانك اهل لذلك...فعلا انا مجدى حسن شريف

سلامات معتز عطأالفضيل...وينك واخبارك شنو؟؟باذن الله اوعدك بانى ازودك بطرايف الخال كردى قريبآ...تحياتى بلاانقطاع

الاخ مجدى
سلللللللللللللللللللللللللللللللللللللللللام
خاشى توووووووووووووووووووش طوالى كده
اخبارك شنو
الحجاج كيف
حموده قرشى صفاء سونا
تحياتى للجميع

اخى عيسى اخبارك؟؟؟بالجدفاقدنكم نحن كلنا بخير وييينك ماظاهر؟؟الحاج والحاجه؟؟الايام دى معاى منصور وكل يوم فى سيرتكم

لك كل التجلة اخى عوض والى الامام دومآ كما عهدناكم

حلفاوى قالو ليه..
{جون دخل الإسلام}..
قال{دخل بدل منو؟}....