الزواج بعيون زهجااااااانة

** المأذون .. هو ذلك الرجل الذي ( يشربك اتنين في بعض ) بخمسين جنيه و .... يزوغ
**الزفة ..أن يركب العريس والعروس في عربية معلقة فيها دلاقين .. والعريس أول ما يقعد جنب العروس يقول ليها .. آااااخ أخيرا والله أنا ما مصدق .. العروس تتلفت عليهو وتقول ليهو بنهرة ... هووووي وحات الله أنا ما مصدقة
** شهر العسل .. هو أقصر شهر في السنة الشمسية .. من ثلاثة أيام لاسبوع
**رفيقة دربك ... هي تلك ( الانتاية ) التي تتزوجها ولما تكونوا ماشين في الدرب ، السنة الاولى تكون ماسكة من ايدا ، السنة التانية تكون ماشي معاها كتفا بكتف ، السنة التالتة ماشي قدامها مسافة متر ،الرابعة فما فوق تكونو دايرين تقطعو الزلط انت تجري قدامها برطع .. برطع وتخليها وراك وتقطع وتتلفت وتكورك فيها .. أقطعي تتقطعي نصين
**العلاقة الزوجية ... هي ( سيك سيك معلق فيك ) وبعد مرات معلق فيك بدون سيك .. شعارها ( يحلنا الحلا بلة )
**النسيبة ... هي تلك المرا البتمشي زي الفرامة وتتفقد عفش بتها وتلوي خشمها .. أريتو دولاب اليابة ..أريتو متبخ التابا .. أريتا تلاجة السجم .. غايتو يا بتي شلناك وجدعناك للكرور دا
** النسيب ... هو ذلك الرجل الذي عندما تشتكي ليهو من بنتو يشتكي ليك من مرتو ويقول والله النسوان ديل ما بقدر عليهم الا الله .. والله وقعت ما سميت !!
*********** منقول من عمود ( غيبوبة ) د. محمد عبد الله الريح بجريدة الانتباهة
__________________