شعر... قاسم ابو زيد

بناتنا جواهر زينة التاريخ
قاسم ابوزيد
وين فاتن بنات حوا البفكو الزعلة والكشرة
وين فاتن بنات الصح صحيحات الوفا العُشرة
ولو كحيت يفقدنك يتبن عشرة فوق عشرة
وين فاتوا البشقن توبن الوحيد على اتنين عشان سُترة
وين فاتن .. وشرور غيرن بقت علنى وكما الغازات ومنتشره
ما فاتن وما ماتن ... أظن قلن بعد صبح الزمن قشره
وين راحوا .. وين راحن .. ولا ارتاحهن
ولا اتذاعن على نشرة هنا ام درمان
حليلن ديك يكفن ديش بدون نشره
هنا ام درمان ضاع زمن الغنا الفنان
وعاد زمن الغنا الشتره
هنا ام درمان
خلاص اختلت الاوزان ..
محل الزول يقوم هنبول
لا مزمار ولا زمار ولا مطرا
تنوم تحلم .. تقوم تهنا .. تحوم تسلم
طريق الروح .. سليم الشكل والمعنا
خفيف الوزن والاحوال سعيد تكرم
ومين ضيّع وهل يرجع زمن تانى
ما الأول ولا البعدو
ولا الهسع .. زمن خير .. ومتغير
لكن فيه من الماضى والتاريخ
وهل يرجع زمن اسمح

شكرا قاسم ابو زيد
شكررا شعراء بلادي الاحرار

وكلنا نسال مثله وين راحن يا صديقى بهدير واريت العوده تكون مع الصباح الصبح قريب

مادام في بذرة حب .. يبقي العشق موجود
وعرقنا ما زال حي ما النيل كمان موجود
ويتنسم الشارع .. وانا بالغمام مسنود
لو كلي يبقي الصمت .. بحرق عضاي واقود
شان يبقي صوت النار ..ومن كلي يطلع صوت
ما تغني يا زرزور... انفض جناحاتك.. ضمد جراحاتي
ما ليلنا مهما يطول برضو الصباح حيعود ....

قاسم ابو زيد

» نص...قاسم أبو زيد...
» قاسم عيد .. عريساً
» قاسم سيد.. حبابك الف
» عبد الرحمن قاسم السياني .. الف مرحب
» حوار مع الشاعر قاسم ابوزيد