فالجميع فى البيت قد دقس ... تشغيلات ذى التشغيلات ...مراسيل ذى المراسيل .. جهجهة ذى الجهجهة ...تعال ياولد أجرى الدكان ..جيب لى حنة ..يا بت أجرى دكان سعيد جيبى لى نشادر
يا ود رجعا هسي دى حنة دى ! عاين ليها معولقة كيف ! قوليو الحنة (صنع فى الدامر) ! ..
يا بت انتى راسك وين .. نشااااااااادر نشاااااااااادر ما باكمباودر .. ارجعى سريع رجع فيك قطر ..يا بت يا سارة تعالى رشرشى لى البرندة دى سريع ما بدور حنة الحر !
و كوركى لى نفيسة جارتنا قولى ليها التمد لى شوية سرتية ..
انتو صحن الحنة الشالو منو يشيلكم البوليس ..
اى يا بت اعجنيها كويس انتى ما اشتغلتى طلبة قبل كدة ..
و بعد أن تتفرجخ و تتوهط وتتمركز ...و تضع الحناء ..
و تلقا يدينا فى وضعية السواقة و عاملات ذى يدين تايسون الملاكم ..
تبدا المرحلة التانية من التشاغيل .. يا بت فتشى لى اكياس ..
شوفى فوق راس الدولاب انا خاتا لى كيسين ...
دا شنو دا جايبا لى كيس اسمنت انتى البلادة ليك شنو !! طالعة لى ابوك ...
أجرى لى الدكان خلاس اتناوليهم ...
يا ود تعال شغل لى التلفزيون ..
سجمى دا شنو الكتل دا جيب لي شى ارفه بيو ..
لا لا الانجليزى دا ما بدورو شوف لى مسلسلة ..
أطلع القنوات الفوق ..
أنزل أنزل لسة .. أطلع .. أنزل .. أطلع .. أنزل !!
دقيقة وقف وقف النشوف هناية عرسوها الفى المسلسة دى !
المخروبة دى مختوبة ليها تلتاشر سنة !
خلاس خلاس أقلب .. أقلب .. التلفزيون دا مالو بقا لى مسيخ كدى .. خلاس أقفلو !!
يا بت تعالى قولى لى ابوك ادينى موبايلك بدور أتصل بى أمى ..
يا بت دا شنو الرامياو لى كدى !
أضربى الرقم تضربك صاقعة ..
أى تعالى امسكى لى الموبايل جمب اضانى ..
نق نق نق نق نق نق نق نق نق نق ..
يا بت اثبتى تتراجفى لى ذى محمد على كلاى ...خلينى النكمل كلامى ...
ونق نق نق نق نق نق نق نق ...
الرصيد قطع يقطع راسو الراجل دا عمرو ما بشحن بى كرت سمين ...
يا بت نادى أختك التبل لى الحنة دى نشفت واتشققت .. أى بليها ...دى شنو الموية البتغلى دى ! ..
طقشتيها يطقشك لورى فحم ..
جيبى الطربيزة دى واسيها لى !!
تعالى طايرة وين ... حكى لى رقبتى دى ..
لا لا تحت شوية .. أى خلاس طيرى طار فيك خفاش ..
كلمى سارة التخت لى لقمة أكلا !
برجف من الجوع ! ..
سارة دى شنو الكسرة دى مالا شوية كدة ..
دايرة تغدى كديس !
و الخدرة دى بايتا ليها يومين .. انتن كان ما كتلتنى ما بترتاحن ..
أكلينى واقفة لى ذى عسكرى المرور !
وبعد أن يُرهق الجميع .. و يخرج (زيتهم) ..
و يكرهون حياتهم .. تقوم من قعدتا .. بعد عملية الفسخ ..
و تقول جملتا الفقااااااااااااعةةةةةة
( غايتو على قولة المثل :
ماحك جلدك مثل ظفرك )
مخرج :
و هكذا انتشرت فى السودان جملة (مالك انتا محنن)!!!!
تنادى ليك شافع .. تقول ليو يا ود أجرى جيب لى كوز موية ..
يعاين ليك بكل وقاحة و يقول ليك :
( مالك انتا : محنن ؟؟) !!!!!!
تستحق كل هذه الخدمة واكثر بكثير ..فما ان تنتهى قصة الحنة حتى تواصل رحلة كفاحها المرهقة و التى تستمر لحياة كاملة من اجل باقى الاسرة !!
