ريا السودانية

ياطيان الزمن الغابر
كل دقيقة بتبنى اسية
تبقى عجايب الدنيا ثمانية
لمن تسمع قصة ريا
اولها قبل الإسلام يبداء وآخرها هسةامام عينى
وزمن البت بتقش لى ابوها دقنو وبرضو بتدفن حية
التاريخ عاد قصة يوسف
الجلاب ..الجب..الدم..الجلابيةٍٍ
وسبحان الله القادر يسوى ويربط بين يوسف وبين ريا
ريا طفيلة ملانة براءة بتدشر حِن وصفاوة نية
تسكن فى طيات احلامها تكبروتملأ الكون حِنية
بنية بدو بالصى بتشاشى تشيل كرباجا وسارحة سعية
وتدقش من دغش الله الباكر تصد متراوحة مع العشية
وريا كما الجينات فى الحِلة بتفتل وتحلب غنامية
وتحلم بى مرحاتا يقرنن ونجيضتاً فل وجزم مى نية
وباقية ضهر لى ابوها الكاسر كاسر فى شان هو السوة السية
قايلة الهاجرة مع الغنامة ولما تقوقى كما القمرية
وحت ضِرعاتا ملانة حجبت بتسرق نص الليل زندية
ونسيت جاها.. جمالا ..دلالا بتربط خنجر همباتية
وربيت بين مِعزاها وابوها وامها ميتة سنين منسية
يوم الكارثة الغرد بوما سرحت فى احلاما الوردية
وراحن منها خمسة نعاج
راحن منها خمسة نعاج وفاكرة الشغلة تكون عادية
وقاتلو آيابا نعاجك طلقن وفجأة إنطلقت فيهو النارية
وكشر وحمر ودنقر وصنقع وكنها قاتلو رميتلى جنية
قفل الكٌرنك وكتف اقداهاسرتلو قناية وطاح فى عضاما
كسر فوقا قنايتو إتناول عنجاويهو قلاها قلية
وريا تكوووووورك يابا بجبين
قطعت قليبى آ يابا بجيبن
قصيت ضهرى آ يابا بجيبن
وتف عضامها آ يابا بجيبن
وحت سنونا شليل قدام آ يابا بجيبن
كبدتى إنهردت يابا بجيبن
وكنها ماها حتيتة كبدو يقطع فيها بلا حِنية
ولما خلاااص الحيلو إنهدت وبقيت بين ميتة وحية
قاتلو آ يابا هدومى إنشرطن وخايفة الاولاد يضحكو فيا
وقف إتسند وعينيهو شرارة
فِرحت يمكن ثنا قرارا
وسل سكينو ولسة بجوط وخيرا بين الموت والموت
اتكيك آالشوم واقطعلك راسك
ولاارميك فى البير آ بنية
رفعت شوفا على نعيجاتا وسالت وجفت دمعة سخية
وقاتلو كما إسماعيل لى ابوهو سو الدايرو ترانى ضحية
إلا البير آ يابا ارحملى يمكن ربى يضارى على
لفحها ودمعتا فوق اكتافو وقصد البير فى اتــــعس ليلة
وريا تلوح لى نعيجاتا ودمعة شوق لى كل سخيلة
وباقى صٌراراً لسع لين كرها كبشها باقى بليلة
وكل ماتدفق دم فوق هِدمو تقولو آ يابا اعفالى مليتك
وكل ماتدفق دم فوق هِدمو تقولو آ يابا اعفالى مليتك
ودلنى يابا و اخدلك جمة وانا ببراك بباقى الحيلة
اوصك سو لى غنمك زربة وبهمك شوفلو شِديرة ضليلة
واسرح تالا السافل خرف وروغ للراحن جيهة ميلا
واحرص يابا على باقيهن وانفق وادى إنشالله قليلة
وابوها تقول ماياهو ابوها
ابوها تقول ماياهو ابوها وصل البي واداها كِحيلة
وقالها قولاً مو قول مؤمن آآخر يوم آ ريا الليلة
وتحت الدود راجيك إتناكت وبكرة عفنتك تغشى العيلة
وتبقى غبينتى إتفشت دابا
وقاتلو ودمعها هد هميلا يابا ارجوك لاتقول للحلة
ولا تقول ليهم ماتت عِلة
شان ما تشوه باقى سٌمُعتك قول لناس ختفتها قبيلة
وحاسة رحِمة المولى بهيلة
واجيك والقاك عينك مكسورة وتبقى حياتك يابا ذليلة
وابوها تقول ماياهو ابوها رفعها وكنها حاجة رذيلة
وطااحت جُب فى الجُب .,فى الجُب......فى الجُب
مرمية بتصرخ تهتف يااااايابا
يايابا ارجوك رفقاً بى ريا
هبطت وصوتها ملطخ دم
منفرتة صرختا مابتنلم
وياللهول الجُب لاحول ياااااااااللهول الجُب لاحول
قبر الكافر وعاصى المولى
ضلاماً يلوع فارس الجولة
وكيف بتقاومو اللسة طفيلة
نامت ريا لحافا دبايب وشوك وعقارب بتن حيلا
شجاعاً اقرع سل لسانووباقى عضام والدود وعويلا
رفقاتا يقوقن درب الرى السارحة -الفازعة-اللاعبة شليلا
وريا مربعنة كببببببد البير
ريا مربعنة كبد البير وصوتا إنبح وجوفا نحيلا
وحتى الارضة هرت صفحتهاوآنسن العقروب وحشتها
اما المأساة الهاردة الجوف ديسا الكان لاكسارا رميلا
ستو الارضة طعاما وسنو دبايب الجُب مِقلادة
والعقروب فرشنو وسادة وريا تعاين وفاقدة الحيلة
يوم من دون ماريا تحس نزل إلهى رحِمتو بهيلة
حامو اطفال بى حول الجب وكانو قبيل لُعباها وجيلا
سمعو ضجيج وهجيج وسكلب قصدوا الحلة ورحلو رحيلا
يكوركو وزردو الحلة كورك البير البير آ ناس الحلة
البير فى بطنو بتصرخ طفلةوانا بى اضانى سمعت سكيلا
إلا الناس ما ادوهم بال قالو البير مسكونة فبيلا
لمو الشفع وسولن بخرة وحذروا ماف زولاً يمشيلا
إلا المولى إن خت رحمتو ما طنيتو العبد بشيلا
قام الفارس ودالناير ولداً كان للحلة دليلا
قال آ ناس إن بقى شيطاناً حلف بطلاق امشيلا امشيلا
تب وقامت الحلة وراهو إستعدى وترك الخوف بى وراهو
وصل البير والناير ثابتاً فارس العركة البعوى صهيلا
وناظرة إنس ام جن آ الشوم قاتلو إنس لكن مظلوم
وطرز هايش خاتى اللوم إلا الشوك باقيلا مقيدا
وخفست إيدو الشوك لاحدووصوتا بقالو مسافة قليلة
ورغم دبايب الجب إستبسل إصارع إقاوم لامن حصل
وهبش إتناول باقى سبيبا مرقها ممعطة هشة هزيلا
كل الحاضرة تنوح تتأسف
كل الحاضرة تنوح تتأسف وريا إحساسا ولابتوصف
اما الناير مكشوط دهشة والف سؤال فى جوفو قتيلا
إنتى منو؟والجاكى شنو؟ اهلك وين؟ من ياتو قبيلة؟
قاتلو إنسان والدنيا رمتنى بت العِز من عايلة اصيلة
كييف والبير دبوب وعقارب؟ قاتلو إلهى رعايتو كفيلة
كيفك شهر وزيادة تعيشى ؟وعارفة البير ودالا محيلة
قاتلو هناك آ ودالناير جانى رجل ذو وشاً ناير
زكان بدينى لبن هيل ألبل كل ما يوم يملالى حليلة
داير المعجزة تبقى أسية قارن بس بين يوسف وريا
يوسف نبى خصاهو المولى لكن ريا حكاية طويييييييييلة
يوسف ذنبو ابوهو بريدو ,,,وريا ابوها إياهو عدوها
وهو الوهطها النار بى إيدو ,,,,,وانهى حياتا وطفى قنديلا
يوسف غيره اخوانو رموهو,,وحتى إن مون قاصدين يرموهو
شان إختارو دريب جلابةوبقع الدم ضبحولا حميلة
وريا جنيتا خمسة نعاج وبيرا عليهو الحايمة محيلا
ورغم الجب الجب لكن يوسف راجل وريا طفيلة
وريا مربعنة كبد البير ويوسف قضى ليالى قليلة
والقرآن ماعد دبايب فى بير يوسف ولاعقارب
يوسف عاش فى قصور الامراء وديك ياا الليلة سكنها حليلة
يبقى الوطن آآ ريا سمعبك
يبقى إتعقطو شاالوا الشيلة
ولا حكايتك لسة حكايتك كالعصفور واطياهو الفيلة
ولا حكايتك لسة حكايتك كالعصفور واطياهو الفيلة

شكراً عبد الرحمن والجميع فرقتوا علينا وبكيتونا بي قصة أم شوايل, شعر يصور بإبداع وتمكن واقعة أليمه ,ذكرتوني زمان كان في الساحة قصيدة شايقية أمونة بت الشيخ حمد

أمونة بت الشيخ حمد

أمــونـة بـت الـشــيـخ ابــوهــا كـان مـزواج خـلاص
نـــاســــــــــب جـــــمـــــــــيـــــــع نـــــــــاس الـبـلـد
مـيــلادا كـان عـرسـا كـبـير هيصه وضبايح مالا حد
يـوم الــســمـايـة اتـيـتـمــت حـكـم الـقـدر فـى الأم نفد
كـانــت شــبــيــه أمــهــا فـى الــقــدلـة والــعــود الامد
وبـقـت أمـل كـل الـشـبـاب وجـمالها فى بت ما اتوجد
فى مـرة رابـطـه قـلـيـبـها يـوم حبت قريب الشيخ حمد
واظـن كـمـان حـبـاهـا هـو سـوا الضلوع لى حبو سد
كـاتـمـيـن غـرامـن فى الـقـلـوب ولـع لـهـيـبـن ما برد
خـايـفـيـن يـصـارحـوا يـقـولـوا شـومـه لـلـدايـرنو رد
خـايـفـيـن عـيـون الـنـاس تـشـوفـهـم والخبر يملا البلد
والـحـب هـنـاك عـيبا كـبـيـر لا بـت تبوحبو ولا ولد
فى يــوم ابــوهـا ضـحـك كتير برم شواربو بلا الاسد
نـاداهــا آمـنـه تـعـالى جـاى فــوق الـبـرش اتربـع قعد
قـالـتـلـوا هـوى جـايـــاك خــلاص قـلـيـبـه فـرّ ومـا رقد
حـاج الـخـضـر عـارفـاهـو داك قـالـتـلوا ايوه ابو سند
جـانى الـصـبـاح طـالـب يـديـك دايـر نسـب شيخ البلد
وانـا قـتـلـو اهـلا بـيـك تـعـال يوميـن تلاته تكون عقد
راجـلا عـظـيـم عندو القروش عندو الحرير راقد ِمدد
وكـمـان قـريـب واخـو رجـال ماعونو فد يوم ما برد
جـرن الـدمـوع مـن عـيـنه شو سكتت وابت تديهو رد
بـس قـام مـرق خـلاهـا فـات لا سـبـه مـو كـايسـلا رد
عند المغيرب تانى جاها كدى لى محاسـن الحاج سرد
دايـر يـأثــر فى قـلـيــبـها لـو كـان تـقــول تـديـهــو رد
وكـتـيـن غـلـب واحـتـار خـلاص ولع فؤادو جمُر وقد
فـسـر سـكـوت الـبت رُضا جاب زولو لمه الناس عقد
والـمـال مـخـمـخـم والحريـر تحت الرجول مدوهو مد
يـوم الـصـفـاح والـنـاس تـجـوط بالـفـرحة مقلوبة البلد
امـونـه تـبـكـى بـكـا الـسـواد بـدل الـفـرح جـاهـا النكد
وبـشـيـشـها قـامـت لـلـمـروق مـنـسـرقـه مـا حسابا حد
كـان الـحـبـيـب راقـد هـنـاك والـصـدمـة قـدت قلبو قد
وقـفـت قـصـادو بـكـت كـتـيـر لامـن دمـيع العين جمد
قـام جـاهـا بى شـوقـوا الـكـتـيـر وقـلـيبو داك انهدا هد
قـالــتـلـوا مـابـإيــدى شـئ ديـل نـاس ابـوى وابـو سند
إتـلـمـلـمـوا وسـوا الـكـلام وانـا لا رضيت لا جبتا رد
داك عـنـدو مـالا مـو قـلـيـل وابـويـا شـاف المال سجد
ادانـى لـلـراجـل الـعـجــوز المـن عــروقــو الـــدم شرد
قـايـلـنى بـسـعـد بـالـقــروش ولا الـمـراح الـمـا اتورد
لـكــن مـحـال اسـعــد بـلاك كـان الـسـمـاء بـيـنـهـد هد
بـديـك قـلـيـبى وروحى ديل هناك بعيش صورة وجسد
واتــراجــت دخـلـت تـصـد لـكـن قـلـيـبـه رجـع رفض
مـسـكـت دريـبـا مو غريب كم بيهو صوت بنوت ورد
قـاصـده الـبـحـر دايـر تـمـوت لا عـيـشـه لا هم لا نكد
اتــرددت وقـفــت كـتـيـر لا مـن قـلـيـبـه خـلاص ثبت
شـافـت مـسـار الـنـيـل حزين حتى النخيل حزنان خمد
وبـشـيـشـها فـكـفـكـت الـحـريـر لا زيـنـه لا ربـيط عقد
مـا دام حـيـاتـهـا بـقـت دمـوع وقـلـيـبـه مـن زولا برد
قـالـت اخـيـر ارتـاح خـلاص ارسى وشقاى القالوا حد
فى لـحـظـة مـوج الـنـيـل عـلا فى جـوفـوا غابت للأبد