يا حليل زمان وحاجات زمان

التحية لك اختنا ام تساب

والله تقولى بتقرى افكارى كنت عايزة اطرق نفس الفكرة لكن كت حاركز على ثلاثة اشياء وهى السياسة والصحه والتعليم مافى مشكلة نديكم من القديم

زماااااان التعليم كان تعليم قبل ما يعبثوا بسنوات الدراسة مرة يعملوها 6 - 3 - 3- ومرة يعملوها 8 - 3 والله نظام الاربعة - اربعة - اربعة كان ممتاز ولا غبار علية زمااان كان بتصرف جميع الكتب والكراسات وحتى الاقلام مجانا لكل طالب وحتى ملابس الرياضة وادوات ومستلزمات التددبير المنزلى كان تأتى من الوزارة زمااان ما كان فى قروش الشهر ولا قروش درس العصر ولا قروش الاختبار والامتحان والقائمة تطول زمااان المتخرج من رابعة ممكن ان يتوظف وينخرط فى دواويين الدولة بكل ثقة اليوم خريج الثانوى يتعثر فى كتابة حتى اسمه صحيح زمااان المعلم كان شخصية محترمة جدا ومهابة اما اليوم حدث ولا حرج

ندلف الى الصحه زمااان ما كنا بنعرف حاجة اسمها ملاريا ولا فشل كلوى والسرطان دا سمعنا بية قريب دا زمااان زمن المراكز الصحية كان كل شى متوفر وبدون مقابل تعال شوف هس كان عندك جرح بسيط يقولوا ليك جيب الشريط واللصقة والدواء وهلم جرا

حليل ساسة زماان كانوا شايفين شغلهم وكل وزير كان بيعمل للسودان القارة ما كان فى انحياز لابناء منطقته ولا خدمات موجة لمدينته ولا محابه لابناء منطقته حليل زمن اقتصادنا كان تمام وجنيهنا كان بيساوى تلاتة دولارات

حليل زمن السودان كان واحد موحد ولا تمرد ولاحروب ولا شهيد وعرس شهيد حليل زمن الاحتفالات والمهرجانات والاعياد ليت عجلة الزمن تدور وترجعنا للزمن الجميل